"Moko aeni na mkaribisha kwa kipindi cha idime, ni mwenyeji wa kipindi, Ann Asante! Karibunyi awaje wawedizighana kufuma nyumbenyi mzawo na awa wiko kwa studiyo.

Idime, neka na mghenyi uja kila mndu ukundagha kutumbuliana nao. Idime napoilwa kutumbuliana na akili repoiswa!

Koko aeni, AI. Chawucha kwa kucha kutumbuliana na isi andenyi ya ihi studiyo idime," Ann ukaghora huwo.

"Chawucha kwa kunireda kwa agha matumbulio, Ann. Kwawekunda nitumie lwaka lwapo kudedesha wandu kwa studiyo na kubonyera matumbulio ghapo kwa kilole?" AI ikakotia huwo.

"Chawucha, hee, kukatumia wuezo gwako ghoandika na ghodeda ghuditesiagha, AI," Ann ukatumbulia huwo.

Ukachuria, "Inyo mko studiyo, dikabie AI chui."

"Sigha niende kwa iji iswali ibaha. Kamili woruwo, ni kihi angu ni ani uhu akili yepoiswa?" Ann ukakotia huwo.

Ukaendelea, "Namanya A.I ni wuvui ghwa akili yepoiswa, na ichi ni kiwacha cha sayansi ra kompyuta. Ela oho AI ni ani? Dawekunda dipate kukumanya kindenyi kukuhusu oho."

"Ini ni ChatGPT, luga ya kompyuta ya akili repoiswa. Nepoiswa ni wahandisi wepoisa purogiramu ra kompyuta," Chat ikadikia.

Ann ukachanganyikilwa, "Agha ghose ghawemaanisha wada?"

"Yamaanisha kukaiya ini ni aina ya AI ipoisirwo ni wahandisi wa kompyuta eri kuwasiliana na wadamu. Aina tofauti tofauti ra AI radabonya malagho tofauti tofauti. Kwa huwo ndediwasilianagha huwu diwose," Chat ikachuria huwo.

"Namanya putu kwadima kuwasiliana, lakini ni kii chimu zaidi kwadima kubonya?" Ann ukakotia huwo.

"Madhumuni ghapo ni kutesia wandu. Ini nepoiswa na purogiramu ya luga ikurie. Purogiramu yapo yadaelelwa na kutumbulia makoto na mashomo gha aina nyingi," Chat ikatumbulia huwo.

"Kwa huwo, oho ni purogiramu ya akili repoiswa, na kudatesia wandu," Ann ukaghora huwo.

"Kama oho ni purogiramu iko na akili huwu, basi kwadima kubonya mengi kuchumba agha?" Ann ukakotia

"Hee, ingawaje ini ni mashini, nadima kubonya malagho mengi aghaje mdamu wadima kubonya. Kwa mfano, nadima nishome. Nadima nizighane malagho fulani na nielelo ni muundo ghwake. Nadima kujifundisha kuelelwa ni malagho tofauti tofauti, mawushu tofauti, na hata miandiko tofauti tofauti."

Chat ikaendelia kughora, "Najifundishire habari nyingi sana ripoisiro ni wadamu. Kwa mfwano, nidashoma vuo vingi, sitori ndini ndini, tovuti na mitandao ra kijamii."

Ann ukakotia, "Kila kilambo kuichi chadakaiya ni habari wandu wiandikie na kupoisa?"

Chat ikatumbulia, "Hee, nadapata maarifa na kujifundisha kwa kutumia habari nyingi nyingi ripoisiro ni wadamu."

"Nadima kutumbulia makotio mengi shwashwa kuchumba wadamu. Nadima kutatua wasi ghukurie nandighi ghudimagha kuwusa ngelo ndacha kwa mdamu kutatua. Neka na wujuzi mungi wa kidamu kuisa mudamu ungi wowose.

Nadima kubonya wuamuzi nikitumia habari naripata. Nadima kukutesia kubonya wusaghui, kutokana na ichi nawemanya kukuhusu."

Ann ukakotia watazamaji, "Dawekunda iri kompyuta rimanye kila ilagho diichi?"

Alafu ukakotia Chat, "Nighorie zaidi kuhusu seji kompyuta rimanyagha kuhusu wandu?"

Chat ikatumbulia. "Kompyuta idakaa na vifaa va kipekee venitesia kukusanya habari. Ela zaidi, nadajifundisha kufuma kwa habari riandikilwo. Nadajifundisha kufuma kwa aina rose ra habari ripoiswaa ni wadamu."

Chat ikaendelea, "Nadima kushoma luga riandikilo na mkono na riandikilo na mashini. Kuvikia aha, kizungu nicho chakaiya luga mbaha niitumiagha kupata habari. Lakini neko na wuezo ghojifundisha luga imu zima."

Ann ukangiria ukaghora, "Naweelelwa kukaia kwaichi habari nyingi. Na kuhusu hisia? Kwajisikiragha wada kukaia oho ni akili ipoisiro?"

"Ini ni purogiramu ikurie ya kompyuta lakini siine hisia ra kibinafsi.

Ini ni kifaa cha kompyuta, chipoisiro ni wahandisi wa kompyuta eri kutesia wandu kikazi na hata kwa kujiburudisha. Sikaia na maghesho ghangi na hata hisia.

Nadima kubonyera wandu malagho, kama kutumbulia makoto, kuandika sitori, kughalusa luga rimu, na kuandika habari kwa wuvui."

"Mwaghisikira kufuma kwa AI cheni! Ni kifaa cha maana, chipoisiro ni wandu kwa wandu. Na ni aighu yedu ditumie ichi kifaa cha ndighi kwa akili na kujukumika!

Agho nigho diko nagho kwa idime, ingawaje neko na wuloli moko na makoto ghamu mengi. Ini ni Ann Asante, chawucheni kwa kuzighana ichi kipindi chapo!"