Wandu wadaishi kwa mizi tofauti tofauti. Wandu wamu widaishi kwa mizi riko nokoighu cha mlungunyi. Wamu widaishi kwa mizi riko andonyi.

Nyumba ndacha radakaia na mizi mingi riaghilo aighu ya rimu. Ichi chuo chawehusu kuagha muzi ghwa gorofa ya sakafu nyingi.

Mishelle na Catherine ni mndu na mruna wa waka. Mishelle oka kavui kumeria sikulu mbaha. Catherine oka kwa mwaka ghwake ghwa mwisho sikulu ihi ndini.

Awa wana wadaishi na wavi wawo na wawae, kwa nyumba ndacha noko Nairobi. Widapoilwa ni kuishi naighu ya muzi mbaha, sa nyonyi mdinyi mlacha.

Ihi familia idaishi kwa gorofa, sakafu ya 22 kwa iaghi ja mnara. Wadatumia lifti kuvika mzinyi mzawo.

Catherine udatala sakafu wikijoka na wikisea. Wakunda kukaia mndu oenjesha ndege ituku jimu. Mishelle okunda kukaia mhandisi oagha nyumba ra gorofa.

Catherine ukakotia, "Ijengo ja mzedu nijo ilacha zaidi Africa?"

Mishelle ukatumbulia, "Aa, iji ijengo ni mita 126 wulacha ghwake. Ijengo ilacha zaidi Africa jeka zaidi ya mita 393. Ijengo ilacha zaidi wurumwengunyi jekunda vika mita 830!"

"Ukaseka! Agha majengo malacha huwu ghamangishwa ni kii?" Catherine ukashinika.

"Kwa wuvui, gorofa rose ridapoiswa kwa chia imweri. Vilambo va muhimu veagha ni chuma na zege.

Nyumba ya gorofa idaaghwa sakafu kwa sakafu, ikizoya na furemu ya vuma, na kuchura zege andenyi ya furemu. Ivi vilambo vose vikaranganywa vidakaia vimange nandighi na vidakaia luma," Mishelle ukatumbulia huwo.

Kuagha gorofa, waaghi widakota kina chiko ndenyi cheagha msingi ghwa iaghi.

Seji wokoni mudi mubaha ghukaiagha na miri riko ndenyi, iaghi ja gorofa ni suti jikaie na msingi ghumange aighu ya igho. Ngelo rimu ijo igho jidakaia ndenyi shuu ndoenyi.

Kufuma aho, wabonyi kazi widapoisa furemu ra iaghi. Widaagha furemu wikitumia vuma vilacha vilacha.

Mfumo wa vuma ghudadimisha iaghi ilacha. Vuma vidaduka wulemeri mbaha.

Mfumo ghwa chuma ni wudimishi ghwa iaghi, sa mawungo gha mdamu.

Chuma chadima chikucho kwa chia zima zima. Ihi idamaanisha kukaiya iaghi jadima jiende upande na upande (ingawaje sio rahisi kuwona huwo).

Ngera mbeo yakaia nyingi, angu msughusiko ghwa isanga, vuma va nandenyi vidabonya iaghi jiende upande na upande kutinieri.

Vuma vidapoisa wudimishi ghwa ndighi yesoghoda.

Kilambo chimu cha muhimu cha maaghi ni zege. Zege ni mranganyiko ghwa vilambo sa msangagha, simiti na machi.

Wabonyi kazi wadaranganya ivi vilambo kupoisa kizozo chilemere, chidachurwa andenyi ya furemu na kando kando ya ivo vuma.

Zege ikaoma, idakua, sa igho. Ihi idabonya andonyi na nganda ra iaghi.

Wabonyi kazi widaagha nyumba ya gorofa nokoighu, sakafu kwa sakafu. Sakafu ra nandonyi ni suti riduke wulemeri mbaha. Zege yadima kusimamisha shinikizo, eri kubonya iaghi jikaiye jimange na jesimama.

Zege ni safu izungukagha mfumo ghwa chuma, kulindia chuma na machi na mbeo. (Machi na mbeo ghidabonya chuma chiwadwo ni kutu.)

Mitaro ra lifti naro ridaaghwa andenyi ya ichi kimu. Wikameria kuagha kwa kutumia chuma na zege, wabonyi kazi widangira madirisha. Widachuria dari na nganda na kumeria sakafu.

Iji iaghi jidakunda jiingiro waya ra modo na wokoni mifereji ra machi na reenja machi ghiluie na gha choro.

Kwa kumeria, wabonyi kazi wadangira taa, minyango, kabati, na vilambo vizima vizima veishi na kubonya kazi gorofenyi.

Mishelle ukaghora, "Mizi mbaha nyingi rawesirilwa ni nafasi. Maaghi malacha ghadatesia ndoe kutumika nicha. Nikakaia mhandisi, nidatesia kuagha gorofa ndacha zaidi wurumwengunyi!"