Muusa, nda Alber nda Agayša cindi lokkol fondaa ra.

I dii kartoŋ foo kaŋ i na haw ka boori, i na dam tuuri husuba foo ra. A ga hima nda hoorayhaya.

Muusa nee : «Macin n'ay ga dii a ne ra? Hoorayhaya no! Iri ma koy na zaa.»

Agayša nee : «Wa hawgay ! Wa hongu haya kaŋ alfagaa na har iri se.»

Agayša hanbur.

Muusa nda Alber sii nda suburi, i ga sootiya.

I mana baa kala ngi ma kartoŋoo zaa taka kul kaŋ boŋ ga, ka dii hayaa kaŋ g'a ra.

Agayša šendandi.

«Alfagaa n'iri waazu nda kaŋ iri ma gagay jinawey kaŋ iri s'i bay nda wey kaŋ iri s'i may ga. Iri ma koy na har a se.»

Alfagaa duu alhabar.

Waati din da, a na hayaa din koli nda tuuri kanba kogo. Woo maanaa ti kaŋ, a ga hin ka ti haya kaŋ goo nd'albasi.

Alfagaa na dikteroo noo alhabar.

Nga mo ciya borey hallasiyanoo batukey goydogey se ka hayaa alhaaloo bay.

Korosiyanoo banda ga, hallasiyan batukey goydogey bayrandi kaŋ baguhaya no.

Dogoo din ra i na say.

Alfagaa ɲaali nda nga taalibey.

A nee: «Zankey, war tee boro lakkalkoyniyaŋ nda boroyaŋ kaŋ ga lakkal dam. Ma lakkaldam ni boŋ se man'ti kala naanay fondo.»

Alfagaa nda hallasiyanoo goydogey na zankey foo nda goy.

Lokkol kul ka marga cere k'i kubay sanda wangaari.

Woo din subaa ra, lokkol goykey kul na cere kubay ka margaw tee.

I šelen hallasi mise booboyaŋ ga kaŋ ga tuuji ngi lokkoloo nda ngi kabiilaa ga.