Madina ti Karanbe hugoo izey kul ibeeroo.

Hugoo borey si goro kala Banjagara.

Almaari foo, Madina koy windoo miɲoo daabu.

A dii zankawoy foo nda zankaaru foo.

Madina boŋoo haw nda zanka hinka waaney wey gunayanoo.

A na baaboo cee kate: «Baaba! Baaba! Zanka hinka ne windoo miɲoo ga.»

Baaboo gaarandi ka kaa windoo miɲoo here.

A hãa: «May ti war? Man no war hun ?»

Zankaaroo nee: «Ay ti Asama, ay kayne woyoo maayoo ti Yakoromo.»

Alhaali ra, Asama nda Yakoromo hanse ka fara, i ga bara nda hanburay, koyne mo biney si kan.

Asama goo ma fahamandi: «Iri koyraa man'ti kala Songo, a goo Dukunbo kominoo ra.»

Baaboo binoo hanse ka maray, a mana hin ka haya kul har, miɲoo diyandi.

Madina nee: «Baaba, i naŋ i ma huru. I fara, i ga ye ka heray. I ga baa iri ga faaba.»

Yakoromo da mo nee: «Muzulteekey ka huru iri koyraa ra. Iri borey kul buu. Haya kul ma cind'iri se.»

A hanga ka šelen nda jinde yalaafante.

«Iri goo nda jirbiyyaŋ kaŋ iri mma dira de. Iri si nongu kul bay kaŋ r'iri ma koy wala haya kul kaŋ iri m'a tee.»

Woo din banda ga, baaboo na ganda feeri i se k'i hurandi.

«Wa huru, zankey, war hugoo no. Iri ra ti yeekate sennoo ga, wa koy hunanzam,» a n' i se.

Zankey hawru hugoo borey bande, ngi ŋaayan konno jinaa ti woo kaŋ i na ŋaa, a ga too jirbiyyaŋ sohõ.

Woo din banda ga, Madina na Asama nda Yakoromo ka koy ngi kanihugoo.

Za hanoo din, Asama nda Yakoromo nka ti sanda KARANBE hugoo izeyaŋ.

I ga hooray zankey bande, ngi nd'ey ga hugoo goy tanawey kul tee nda cere.