Yegi gutá, Udoo, Erdoo be Eryum fe shitukpa éní ele na è dù na. A fe wa gan a nyányà à dan bo. A fe wa gan a la egwato duwa na tinya fiti ò na. Nna à ma à gan, "A'a."

A fe tí to ègí ebo wun la nyagban ù zheban. Wun ma fan à. Eryum tso wa gan wun yisoya lo eba duwa.

Nna ù kan da kamina wun à tinya lo baga na. Wun kpógun kpó ebo Eryum be gwazuma ù nyizagizhi à wó. "Ye à wonfe wo ò," wun à gan.

"Ye yebo ènì-yakagi à, tosun ye ma ga emi to degi, efe ga è won na," wun à gan bebo be yima è.

Wun fe kpayètu gan a gbingan ècingi, wun à gan, "Edu duwa yeka wun yi ò na yi be cigbe na. Ama, wun tsòba kin ye ci tun eba ù wo à. Ye ma ga wonfe, duwa à jin enyado wo à."

Egizhi fe duwan egan nana.

"Nna, yi è tan wo gwa wo cicìn duwa nana ò ya yi, " Erdoo gan. "E, ye tan we gwa nna, mi è wa gan mi wó ma," Udoo cinmi ù ma. "Mi gutá," Eryum tangwa ma, be egwa ginginigi gutá ku lo fin nyi.

"Toh, mi è leyé ke, mmmm," wun à gan be edzonyi. "Oya cincinzhi, e tàba, nna, ècingitaci dan na!"

Erdoo fe bici da la naha, be tsukun na è wugwa dandan à na. Wun lagun nna ù. Eryum ma rufuta ù la be ya nna ù pa ò.

A fe be fedun a shitukpa ècingi na a daye wó na be nakansan è. Udoo ci beyikò, ci gan nna ù gan wun ca. Ècingi ci ca.

"Ecaba ò, edu duwa yeka ga ù yi ò. Wun ci à so gun cigban dòfazhi Mbadede. Ebo kagbo cigbe ùzhi ò, wun à de wuwandan.

Ka we woma à, wo fin nuwon ù. Duwa è fanyagban be eryatwa ù kándoro. Ama wun yebo eza ebodèdèzhi à."

"Ebo kagbo cigbe edu nana ò, wunga la nwanwa tsutsunci dan kpata bo ò! Ezandoro na ga be nuwon finzhi na ci è de nwanwa tsutsunci mum, kpàtàkì dzakangizhi.

Nwanwa tsutsunci nya edu nana de dzuru, wonjin, doyá, aliga/korina, dòfa, zamiza be cancarya. "

"Efondoci, nyizagi gbako tsaka na è ye Mbom na fe be daga kin harilo. Wun tun na, wun à tsun ebapaci. Ebapaci ma kpe ù yé à ci wó enyadoci nakan ù bo ò. Ama, wun shitukpa enya na wun è wó na à.

Wun fe tagwatun yeko cigbanzhi ci à gan ù gan wun won edu nana cin. Egan nana à ye Mbom ci kpékpé lo dan nuwon ò,"

"Wun fe to nuwon fin ci à woma. Wun fe cin eba le goba ebo a ga de eza na ga le ù yé na.

Mbom fe la takun ci ce gun ninbo. Wun fe cin kemina wun dzu lofin ci la para è na le. Wun máfi na, wun fe la tsukùn. Wunci ce ù gun ninbo. Wun ke à acin yejin be."

"Mbom fe ja gun nuwon ga ò! Wun kpa gan de yizhele harilo. Wun de ja gunbo, edu fe nadanfin ò. Wunci fu lo fiti, wun kezhin Mbadede be à. Ama kandoci, duwa ù lamitu ele, wun jinbo edu be.

To baga ga ècingi mi zo ò," Nna gan.

"To cincin mizhi e be ta ya mi, kila ye ci yebo ècingi nana saranyi ò?" Nna gbingan. "Kandoro tsa ye wa gan mi cìn wun ò."

"Mi yebo na ebona, wun è pa mi enya na wó na," Udoo yima. "Wun è pa mi kwege nazhi duwa de na," Erdoo gan be ù.

Eryum à gbasangwa na ù gangan, "Wun è ba mi ba ebona wun è pa eti nwanwa tsutsunci! Mi de sashi wo gbani be egwatan è?"

"Mmmm. Eba fuyèkò gbani, yi la mumun nwanwa tsutsunci ka èsun. Kashin? Nna gan. Wunci ke gan be, "Eka yegboro ò, mi à cicìn kemina etan duwa zozo na ya ye."