Shagbaor ugenegh lu, shi ngbogh a kwaghfan kpishi. Iti na lu Agure.

Lu a bua u ishimashima, lu bua u il u gema ta acan a pupuu iyol yô. Iti i bua la lu Agundu.

Shagbaor ne lu a tsombor ngee, ibyua kpa lu kpishi.

Iyange sev hungwa av yô, tsombor u mbakuv ugenegh za va sha tar Tiv u va keren kwaghyan.

Kwase mbakuv la lu nan mbayev ahina atumba.

Iyange ijen kôr mbakuv mbala kpishi, sha ciu ve lu a kwaghyan cuku kpaa ga.

Agure iyange sagh ibyua na i lu zenden yan toho ken akôngo.

Mbakuv mbala nengen a ibyua la yô, ve zenda i zan zan ve za kôr Agure zege bua u lu il man pupuu la.

Imiemegh ki iyange i zer bua la sha akor la tsongor yem ica. Mbakuv mbala wua bua la man gba a mi yan je.

Agumaior za ongo imiemegh ki la yô, ve due ayem ayem u za kohol ibyua ii iyange i sambe la.

Tsô ve za tagher a mbakuv er ve lu yan bua la yô. Ve gba keren awange er ve a wua mbakuv mbala.

Agure Zembe kpa va nyôr heregh; kôr perutya ken imiese, gema kôr ikyav mbi tswamegh ken yan.

Agure Zembe ze ikyua yô, gure inya nenge er kwase mbakuv la iyange lu nan mbayev ahina atumba yô.

A yange agumaior la u wuan mbakuv mbala.

A kaa a agumaior la er, "De nen ve, ve ya'm bua. Ka ijen i ngô u nan wan atumba! Uma u hemban doon ngu se ken hemen."

Agumaior la ungwa kwaghwan u Agure Zembe. Shi a kaa a ve er, "Ngohol nen imiemegh ki bua la kua shi ica i eren hwe la cii, yem za haa nen ken ityôrbua; de nen mbakuv mbala ve ya inyambua la."

Mbakuv mbala iyange ve ngbogh a iember sha kwagh u Agure lu er a ve la.

Kwagh la er anyom kar, iyange igenegh yô, Agure mogh zende a iorov utaan, ve yem ica u za yaren ikyôr i ukagher.

Mba ze nyer ken tarkyôngo yô, zege wura gba nôôn. Tsô ve yevese ve za yer ken ityôrbua, man shi ve tsa keregh je.

Ityôrbua la gema lu i ormbakuv ugenegh!

Tugh mbula je, ormbakuv la due za ôr mbakuv mbagenev; a kaa a ve er, "Uumace ateratar mba ken ityôrbua yam, mba Aôndo A ve se a mi yô. Va sunda'm nen iyiav, se been kera yô, se ya ior mbala imiôngo."

Kpernan sev mbu aven yô, mbakuv mbala zua tugh tugh je. Ve iv mtem ma vesen a mngerem, ve jiidi sha atse, lu u wan ago iyol a yan uumace mbala je la.

Ken atô u mbakuv mba iyange ve va la, u môm keregh lu u iyange ya Agure Zembe bua la. Gema lu Agure iyange war un man tsombor hen ishiva la ye.

Zum u ormbakuv u iyange i yima un la nyôr ken ityôrbua i or u ormbakuv u iyange lôhô ve tom la yô; a kav Agure Zembe, tsô a pine sha ikyenge nahan er, "Ka we u lu Agure Zembe yee?"

"Een ka mo!" Agure rumun.

"Ka we i gbe u se va ya zum u se sunda iyiav mbin se bee ye zee?" Ormbakuv la kende ahan cuku.

Ormbakuv la gema pine mbakuv mbagenegh mbala er, "Ka ana nan fe ahina am heen ga?"

"Ei, mô ze," ormbakuv u lu lôhô sunda la na ikyar nahan.

Tsô ormbakuv u lu pine kwagh la gba pasen ve nahan er, "Anyom kar ken ijime kpishi, mo man kwase wam se ya or ne bua u ishimashima. Er iyange agumaior a hen tar la va u wuan se yô, lu or ne war se ye.

Aluer ka or ne ga yô, ahina am, kwase wam, man mo cii ma se kera lu ityogh ndor ga."

Mbakuv mbala hingir u pasen Agure man iorov mba utaan mbala cii. Tsô ormbakuv u iyange i yima un la yem a ve hen ya na.

I za yôr ve shin agbande a he kua shi ibyu i iyange or lu a vande yan kwagh a mi ga yô.

Iyange uumace man shi mbakuv mbala tsa lamen tugh mbula kaka sev puaa. Mbakuv mbala pine ve er, "Ka nyi i ve a ven shin Mbakuru?"

Tsô ve na ikyar nahan er, "Se va u keren kagher, ser ma se zoo a tsa na. Ka se er gbayol a mi, se kor mbaanar mba sha mon man shi mba ken ave kpaa."

Sev mbu kpernan la, tughtugh nahan je ormbakuv la vea mbayev nav ve due ikyôryaren u keren ukagher. Ka ze deôô yô, ve hide a ica i ukagher kpishi ve va na Agure Zembe man ahuraior na.

Agure moghon u yemen yô, ormbakuv la vea mbayev nav ve ver ve gbenda zanzan ve nyôr sha uumace.

Ve pase ior nahan er, ka mbakuv mba iyange Agure Zembe war ve hen tar ve ishiva i ken ijime la, ka wen a yem un man ahuraior na nyian ye.

A mase kuren kwaghôron nahan er, hanmashie yô, umbur nen, uma u hemban doon ngu se ken hemen. Ka u tesen nahan er, "Ka we a haa mtuhwem ma hide sha we."