Danbo lè, Rogo be Yikunuci fedun ezhi na ye gan Koowa na. Èyà ga a yi ò. A ci è wa dozhi lo efondondo.

Enunucizhi a yi ò. E gbanyadzu dan etun lati àzhi.

Eya ndoci, eledu kun kin yi à. Nyagicizhi nyì wangi à. Fini àzhi kpátá wo. Ezazhi de enyado gi à.

Rogo be yikunuci ci à kpa gan a da ezhi ndoci da lotun.

Na è lo yeko ò na, a gunbe nyizagi. "Kube yigidi," a sa ù mi.

Wunci zhe à gan be egangbin, "Babo ye lo ò?"

"Ye lo ezhi yegboro etun wazhi," yikunuci gan.

"Etun kici ye lo wo ò?" nyizagi gbingan.

Èyàzhi ci zhe ù gan, "Yi wa nyagici ya ezami wozhi be nyakungizhi wo."

Nyizagi ci gbingan, "Ki ye wa na ye de nyagicizhi na ò?"

"Wa lati, nuwon be éyéladan wangi ya yi," a zhe ù gan.

Nyizagi fe la à lo èmì ù ganni.

Yigidiká ndoci, Yikunuci gbomi be Rogo è. Rogo gan wun gán Yikunuci.

Yikunuci ma gan wun gán Rogo.

Nyizagi fe wó emigbo à daga kata ù bo.

Wun fe tinya be egangbin, "Ki la ewun ye be ò?"

Rogo ga ka egan nyi gan ò. "Mi gán Yikunuci. Mi è la zhe cingini-rogo, gari be rogo-duduci to rubwa."

"Kpace mi ga è shì ò, fini to kpara mi ga è la ya nyakungizhi gi ò. Ki yikunuci è jin ò?" Rogo gbingan.

Yikunuci fe matsan, ci pan eti ù ci gan, "Nna, wo kpe èkò yikunu na wo yebo na? eba mi ga bo wun fe be ò."

"Mi ga è la émí-dzuru na è la jin kpokpoi na ò be nukotè na è la kan yikan to nakan be nyi na. ke wo à kan ènì be romo kan babo émí na ò?"

"Be kunma, fini be banfuru ga ye la kan wuru evun yezhi ò. Ye ma è fanyagban be munge máná be futanfu mi ye ga è gòfa ebo etun efo ga na."

"Kpoki, sòkùn na ye la fin kata be èmìtacin na eba mi bo ù fe be ò," Yikunuci zogan.

"Hmmm!" nyizagi yasun. "Wun à ge èyàzhi, mi wó egan yezhi. Mi ga esungán ye nana lakeyabo."

"Zagubàbà ye de etun kama à lo ya mi. Ganni ga zagubàbà ye ge nyagici ò, cingini rogo to ènì yikunu nyi ò!" Nyizagi gan.

Nyizagi ci lu ènì yikunu be cingini-rogo è. Wunci yi èyà ùzhi gan a be à gi ù ganni. A ci womá gigi ù saranyi.

Daga efoga, èyàbo Rogo be Yikunuci è gege loyé.