Kakuna Akai yi dzakangi na, nna ù fe la ù leta zògùn bologi ndoci ò.

Nnagi Akai ga è tin zògùn wangi na be fini yikunuci ò.

Zògùn nana de kwege dòfa be aliga è.

Zògùn nana à kperi be ndoci nazhi nna Akai de dan kata ù bo na.

Kin na ma èmì Akai goba na à wó kpokan è, ci yipa, ganni be takunzhi. Wun ke yi be kinkerezhi, èdzuzhi to ewazhi.

Ama, enyasosongi dèdè nanazhi ma jin Akai enyado le à.

Nna ù ci gan, "Zògùn ù nana tsa è kan ù be egun nyi ò."

Akai ma wonyé.

Wunci à eba na gòga kodogi ndoci dan na dzatin.

Akai ke kpe eba na manyatta nnako ù dan na.

Wun ke ceka lo nwanwa rakun finzhi be nnako ù nyi.

Efo ci be danbo, Akai ci à gbasangwa. Wun da manyatta nnako ù, wunci da à gbinka dan patizhi ò.

Edan ci fe sun Akai.

Wunci à feshi tako cigban edome ci è ka wuce.

Da ekafyagi ele ù la, wunci nánà.

Ená na ù ná na dana:

Wun à le ta zògùn ù bo. Nyizagi ndoci na bè nnako ù na fe la éyédan ù. Nyizagi gbako nana fe yima ci tagwa la evo nwanwa rakun ya ù. Na Akai è tagwa gan wun à go nwanwa na ga wun sanle ò.

Akai fe kpé éyé ù figi.

Wun cin fiti le na, wun à le elu dòfa yisugi yé ta gwala-cigban tita ù bo.

Akai nakin na, elu dòfa yisugi fe la ce wú Akai yeko.

Wun à emi ma tu elugi nana.

Akai ci tun eba na yeko à sakpa gubà na.

Elu dòfa nana fe ce zògùn na bè nya Akai na cici.

Be kuku zògùn nana, Akai fe le bicikinkpe nna ù yé.

Da ekafyagi wun fe le gòga eba na è shé nuwon na yé.

Ezami Akai ci ya éní nyi kó be enyànya è nya zhizhin ù èmì.

A wurya ma zun, a nakan ga ma pò ebo zhizhin ù bo.

Akai ci à feta zògùn cinnyi nana ci è woma gigi nakan pipòci.