Shibole, Dangizhi be ètsúgizhi eyazhi a yi ò. E lotun lo to edzodzo ganin.

Dangizhi pa ètsúgizhi yawo, ètsúgizhi ma è jin dangizhi yawo be edunfe emawo be dozhi.

Be eka na lokpa na, ètsúgizhi à fushigban. "Yegi ndocizhi à ya," a gan. "Babo à dan ò?" "Mi le ndagi mi ye na à jinfo," ètsúgi ndoci gan.

"Mi le nnagi mi yé à," ètsúgi ndoci ke gan. "Mi è le nugunci yé be à," ètsúgi etaci gan. "Babo gwazunma mi dan ò?" ètsúgi enici gan.

Ètsúgi gbako ndoci fe pan eti ù. Wun à jin sànnyi.

"Mi de esan sakpa ya ye," wun gan.

"Dangizhi è la yi tungi zo. Yi jin karanyi. Wun à yi be efojin nyi à a ga yi wongi zo."

Dansun à won ètsúgizhi.

Nnazhi ci gan egi àzhi, "E ga lo den ma re. E jin karanyi, dangizhi ga è won."

Gbani ètsúgizhi kpátá a mini à wondan.

A tinya gushe àzhi bo à. A wa gan a keden nyi à.

Gbani, esungan lo dangizhi ma. "Babo ètsúgizhi lo dan kpata ò?" a gan. "Madan è gun yi. Yi de enyadoro gi à."

"Ela so ka yi," dangi wonciko gan. "Ke yi à de à dewon na ò?"

"Mi de kemina yi à jinjin na," dangi ndoci gan. "Yi ku emisa yawo lo eba ètsúgizhi. Yi à wa gan a la mini egi nyizagi nini payawo ya nimi egibagi yizhi.

A dzodzo yawo, a ci à gunyekan kpátá dana-nìní ò. Yi ci à de à won kpátá bayini ò. Wun ga fe shani wonciko ya yi!"

"Èza wangi dan ò na ò," dangi nakenazhi gan.

Ebo acin ò, dangizhi ci tun nusazhi lo eba ètsúgizhi.

"Yi è wa egi-nyizagi nìní ba mini egi-nyizagi yezhi ò. Yi è wa nyimi ba ya mini egi-bagi yizhi," a gan

Ètsúgizhi kpayetu bibe a nyi à. "Yi fanyagban be ye nyi à. Etigbin ga ye wa be yi nyi ò," a gan.

"Ã'à! Ã'à!" dangizhi zhegan. "Gboro ga yi la wu ye nyi ò be eyabo ga yi wa be ye nyi ò. Acinga wun yi le ò, sashi mini yi bo won sashi yezhi gi. Ama, egan wuncin batan, yi à won ye gi be à."

Ètsúgizhi fe cin dangizhi le. Dangizhi ma fe yima.

"Acinga," Ètsúgizhi gan. "Wun ye yi. Yi ga nìní nimi egi-nyizagi yizhi la ya nìní mini egi-bagi yezhi."

Dangizhi ci da èmì be nyagbanfa è.

"Efo yawo nana ga ge," a gan be emikpere nimun nyi.

Efo yawo da be. Nyagban ètsúgizhi ma fa à. "E gi yegboro gushe yezhi ò," a gan egi àzhi.

"E cinle, dangizhi è be. Ye ga jin yi ge, yi à jin à bolo-bolo. Ama a ga wa yi nyi à gi, yi ga tsò ka."

Dangizhi da be yeko.

A ci fe kóní yawo.

"Ye wo enya è kó na?" ètsúgi gbako gbin gbarufu gan.

Gbarufu ètsúgi ci gan, "E. E kóní, 'E won à yi gi à, e won à yi gi à!'"

"Yitso gonyi yi kó à ni ma," ètsúgi gbako gan.

Wun ci ca ení nyi kó, "Bici, ètsúgizhi, bici! Bici,
Ètsúgizhi, bici!"

Ètsúgizhi fe fugun guzhe àzhi ò be biboya è.

Dangizhi tun baga na, a fe gbin dozhi gan, "Babo yawo egi yi dan ò?"

Ètsúgi gbako fe la eti ù tinya gushe ù bo ò. "Yi à mi tu gangba enyanazhi jinle na. Ewunsunci wo ga è tati ù ce wúgwa eyabo be eba we, a kuta ecibi," wun gan.