Pensa bụ dinta kacha mma na ọzara Kalahari niile. Ọ wetara anụmanụ ndị mara abụba ma nye ezinụlọ ya nri nke ọma.

Enwere nnụnụ a, nnụnụ a na-akpọ Pam-Pam, nke Pensa chọrọ ijide. Nku ọdụ nnụnụ ahụ zuru oke maka akụ ya oji agba ụta. Nsogbu ya bụ na ọ dịghị mgbe ọ pụrụ ijide ma ọ bụ gbagbuo Pam-Pam.

Akụ Pensa gaara-efefe n'ikuku dị ka nnụnụ - ma ọ bụrụ na ọ nwere ike ijide Pam-Pam ma wepụ nku ọdụ ya!

Pensa gakwuru nwoke nwere amamihe, onye na-agwọ ha n'obodo ha. Ọ rịọrọ ya maka enyemaka. "Biko duzierem ka m ga-esi jide nnụnụ Pam-Pam. Achọrọ m nku ya maka ụta na akụ m. Gịnị ka m ga-eme iji jide ya?"

Onye ahụ na-agwọ ọrịa zara, sị, "Gaa mee ọkụ. Mgbe ụmụ ahụhụ nile si n'ọkụ gị gbapụ,ị ga-ejidekwa nke kasị nta n'ime ha. Mee ọnyà ma tinye obere ahụhụ a n'ime ọnyà gị. Ọ ga-adọta nnụnụ Pam-Pam."

Pensa amaghị na onye ọgwọ ọrịa obodo ha ahụ na nnụnụ Pam-Pam bụ enyi. Pam-Pam na-agakarị na nke onye ọgwọ ọrịa ahụ. Ha abụọ na akọọrọ ibe ha akụkọ.

"Ana m adọ gị aka ná ntị," ka onye ọgwọ ọrịa ahụ kwuru mgbe nnụnụ Pam-Pam letara ya. "Agwara m onye dinta otú ọ ga-esi jide gị. Mgbe ị hụ ọkụ n'ọhịa, ị ga-efega n'ebe dị anya. Achọrọ m ịhụ onye n'ime unu ga-emeri."

Ka ọ dị ugbu a, Pensa malitere ichu nta ya maka nnụnụ Pam-Pam. Ọ nọdụrụ ala n'ọhịa ma na-ete osisi ya ọkụ.

Mgbe anwụrụ ọkụ pụtara, ọ fụchara ezigbo ahịhịa ndị dị gburugburu nkụ ya, ruo mgbe obere ire ọkụ pụtara wee ghọọ ọkụ.

Ụmụ ahụhụ ndị nọ gburugburu ahịhịa ahụ na-ere ọkụ fepụrụ, ma Pensa jisiri ike jide otu nwa ukpana. O tinyere ya n'ọnyà ya.

Nnụnụ Pam-Pam ahụ enweghị ike iguzogide nwa ukpana ahụ na-atọ ụtọ nke nọ n'ọnyà Pensa. O kpebiri iji ọnụ ya dị nkọ rịdata ma were ya ngwa ngwa. Pensa nụrụ ka nnụnụ Pam-Pam na-eti mkpu, "Pam-pam, pam-pam, pam-pam."

Pensa gbagara n'ọnyà ya. Nnụnụ ahụ tọrọ atọ n'ọnyà ya!

Nnụnụ Pam-Pam rịọrọ Pensa ka ọ tọhapụ ya.

"Ehee ee e," Pensa kwuru, "Achọrọ m ijide gị ogologo oge. Taa ị bụ nke m! Nku gị ga-eme ka akụ m fegharịa n'ikuku, dịka gị."

Nnụnụ Pam-Pam tiri mkpu, sị, "Ọ bụrụ na i gbuo m, ị gaghịzi enwe nku ọzọ maka akụ́ gị mgbe nku ndị a kaa nká, n'ihi na m ga-anwụ.

Hapụ m ka m nwere onwe m, m na-ekwe gị nkwa inye gị nku ọhụrụ n'ọnwa ọ bụla ọnwa gbazuru."

Pensa hapụrụ Pam-Pam ka ọ laa.

MGBE Pam-Pam na-apụ, o chere, sị, "Àbụ m onye nweere onwe m n'ezie?"

Pensa lara n'ụlọ ya wee mepụta akụ́ ọhụrụ.

Mgbe ndị mmadụ hụrụ akụ́ ọhụrụ ya, ha tiri mkpu, sị, "O-o Lee onye dinta a! Ọ na-ebu nku nnụnụ Pam-Pam na akụ ya. Ugbu a, ọ ga-achụ nta nke ọma ma wetara anyị ezigbo nri. Anyị ga-enwe oriri!"

N'abalị ahụ, onye ọgwọ ọrịa ahụ duru ndị mmadụ na-agba egwu ọkụ iji mee emume maka ọganihu dinta ahụ na nwere onwe nnụnụ Pam-Pam nwere .

Site n' ụbọchị ahụ gaba n'ihu, ezigbo ndị dinta niile na-echeta ikọọrọ ụmụ ha akụkọ gbasara nnụnụ Pam-Pam, dị ka ihe ncheta nke ụbọchị ndị gara aga.

Ihe ndị e dere n'akụkọ a bụ n'afọ 1998! Onye na-akọ akụkọ Xun Pensa Limungu (1949 ⁇ 2007) gụrụ akụkọ a n'egwu, nke Khonga ọdịnala na-eso, nye Marlene Winberg onye sụgharịrị ya site n'enyemaka nke Kapilolo Mahongo. Ọ na-ekwu banyere mmekọrịta dị n'etiti okike na ndị mmadụ, onye dinta na onye a na-achụ nta. Ọ na-akụziri ndị na-ege ntị otú onye dinta si adabere n'ihe ndị sitere n'okike ma ghara imefusị ha. Ihe osise dị n'akụkọ a sitere na akụkọ bod site n'aka Marlene Winberg, Satsiri Winberg sụgharịrị ya site na nhazi nke Manyeka Art Collection nke ihe ndi eserese ndi osise San mere.