Laatake nyalaande aranndeere Abebe fuɗɗi yahugo janngirde.

Baaba maako no demoowo. Nyalnde wonnde baaba Abebe aawi maaroori nder ngesa maako.

Kala koondeye to Abebe ummitake gila janngirde, o yaha o wallita baaba maako to ngesa.

Sera ngesa kan woodi duɗal pijirle bol-koyɗe. Nyalnde wonnde Abebe e fija e colli, nden ɓikkoy Nasaara'en nayoy ngari ngam pija bol-koyɗe.

Ɓikkoy koy puɗɗi fijugo. Bol fitti hoɗi nder ngesa maaroori.

Bol ɗum wonni aawre wonnde nder ngesa kan. Gooto nder sukaaɓe ɓen nasti nder ngesa kan ngam hoosa bol ɗum, nden o wonni wonndi maaroori fahin.

Ɓe njokki fijirde. Bol ɗum fuɗɗiti fitti hoɗi dow aawre nden nde ɗuuɗɗum.

Sukaaɓe ɓen tokki nastugo nder ngesa kan ngam ɓe koosita bol maɓɓe. Kala nde ɓe nasti fuu ɓe njaaɓa ɓe mbonna maaroori ndin.

Abebe e baaba maako sunii masin sabu wannaago aawre maɓɓe.

Kanko Abebe e Baaba maako fuu walaa nanoowo Inngiliisi. Ɓe anndaa ko ɓe mbi'ata sukaaɓe ɓen, "Taa puɗɗitee ngaree to duɗal fijirde nga'al. Accee wannango-min aawre amin.

Sukaaɓe Nasaara'en ɓen anndaa wonnde wolde sonaa Inngiliisi.

Baaba Abebe wi'i, "Ɓiɗɗo am, naftora ko njannguɗaa to janngirde. Wi'uɓe acca fijigo bol ɗum nder ngesa men!"

Wakkatiire nden, Abebe waawataa kooɗume sonaa alkule A, B, C, D, E, F.

Abebe yiɗnoo hoolana sukaaɓe. Ammaa o walaa kalimaaji ɗi Inngiliisi.

Bolɗum fuɗɗiti hoɗi nder mgesa maaroori maɓɓe fahin. Suka gooto tokki bol ɗum, wari ngam o hoosa ɗum nder ngesa kan.

Abebe doggi fa'i to suka on nastiri, o ɓantani-mo juuɗe. O fuɗɗi hoolugo. O hooli e semmbe maako fuu e mo wi'a, "A, B, C, D, E, F!"

O fuɗɗiti hoolugo haa nde tati e o wi'a-ɓe, "A, B, C, D, E, F!"

Suka Nasaaraajo on ndarii nastaayi nder ngesa maaroori kan. Sukaaɓe wonɓe nder duɗal pijirle ɓen fuu ndarii e ndaara Abebe.

Ɓe mboldi hakkunde maɓɓe e Inngiliisi nden ɓe puɗɗi moodugo. Ɓe paamii ko Abebe yiɗi faamtingo-ɓe.

Suka jogiiɗo bol on nasti e hakkiilo nder ngesa maaroori kan.

Nden sukaaɓe Nasaara'en ɓen nayo ndilli daayɗum e ngesa Abebe ɓe njokki fijirde maɓɓe.

Baaba Abebe haayɗini. O tammii dow ɓiɗɗo maako wolwii e wolde Inngiliisi.

Nden o wi'i, "Lalley ɓiɗɗo am, a peerɗo nden boo kirlitiiɗo!" O wi'i, "Lalley ɓiɗɗo am a woodi tiiɗal e faamu!" Nden o seyorii e ɓiɗɗo maako.

Abebe e hoore mum haayɗinii nden o nani belɗum. O relli ko o wi'ata.

Baaba maako tiiɗɗini-mo ngam o ɓeyda tiiɗnaare nder janngirde maako, nden o jokka jannde maako to janngirde.

Abebe janngi bolwe tati nden o faami-ɗe no haani. O warti piroowo bolwe e winndiyanke naniiɗo.