Document

Muuŋkʉ ce e m tʉr rli kaꞌ

Kaka Gana Abba

Awwalu Sakiwa

A m ba à nfèꞌ mòꞌ, muuŋkʉʉ mòꞌ a ba ce e m tʉr rlii kaꞌ, kɛ̌ꞌ à nfèꞌ ce a m bi ye. À m ku ba muu ce ŋkʉʉ Dunomà à m tʉr càꞌcàꞌ, e m ce ròo ŋwɛ̀ ce e ye yi kʉʉ. E m cu tètè sê, a kaꞌ bi muu anà.

A kaꞌ bi muu anà, ŋkʉʉ à luꞌshì sê, a kwaꞌshi enɛ e be fa rli muu yì anà kaꞌ caar tɛ e ke kùꞌ ba ŋwɛ̀. Tɛ muu ŋgòŋgò ce e kaꞌ riŋ rlii anà bo ba ŋgwa muuŋkʉʉ anà.

Muuŋkʉʉ à kaꞌ ghɛɛ à ŋwɛ̀ lòr ŋgwa, ŋkʉʉ à laa nè ŋwɛ̀ nsuŋ buu enɛ e suŋ bèe enɛ̂.

"Ca à m be yuu nè boo bbyèŋge wɛɛwɛ ce à toꞌ ŋkʉʉ anà!
Toꞌ rlii muuŋkʉʉ anà tɛ a bo ba ŋgwa yì!" Ŋwɛ̀ nsuŋ buu nè bèe à m suŋ bèe waꞌa.

Boo bbyèŋge a m lòr mnòŋ ce vi m bɛti nà a ce tami yàp nyor. A m baꞌ wap btu, a shɛni map mkup. Wowèe a m chòoshi map mbo ba map mkup nè hɛnnà, a du a yɛ tɛlò tɛ e bo gwàr wowèe bcɛ̀ꞌ bfi.

Bèe mòꞌ efa wowèe a du yap a yɛ ŋwɛ̀ nsuŋ buu moꞌ enɛ e loo nè wowèe tɛ wowèe a bo koni mbǒŋtu. Bèe moꞌ efa wowèe ce mlùu mi m ce koo wowèe a yɛ ŋgǎa bsɛŋ enɛ a suŋ wowèe yuu ce yi be koni.

Nòŋ yi kaꞌ ghɛɛ, bèe wɛɛwɛ a ku ce dù ba fàdìꞌ ce ntoꞌ à m ba. Muuŋkʉʉ ba yì tâ, ker ba bèe ce a m ce kèꞌni ntoꞌ a baꞌ mbedìꞌ rcuutè anà etòmbì.

Boo bbyèŋge ce a m sùꞌsi nyor bòŋboŋ sê, a jɛr nè rgʉꞌshi – ŋwɛ̀, a ce du mbe ntoꞌ.

A m tami nyor nè buu wɛɛwɛ. Ŋwɛ̀ nsuŋ buu ce à rlaꞌ anà à caasì nsuŋ enɛ a kɛ̀ꞌ rcuutè anà. Muunje e fʉʉ tɛɛ kɛꞌ mlii bèe a taar.

E m kaꞌ ba ŋwɛ̀ mbǒŋtu banɛ rcuutè anà li be mì. Muunje e fʉʉ tɛɛ, kɛꞌ mlii mtaar. E m kaꞌ tɛɛ gèe waꞌ kaꞌ muunje mòꞌ fʉʉ tɛɛ.

Muunje etòmbì à fʉʉ a tɛ a la enɛ̂, "A Modù a? A Mòmmodù a? A Màttaa a?"

Muuŋkʉʉ à laa enɛ̂, "Wɛ̀ toꞌ kaꞌ njar. Wɛ̀ toꞌ yɛɛnè kaꞌ."

Muunje embenjì à fʉʉ a tɛɛ a laa enɛ̂, "A Bukàr a? A Umàr a? A Ùsman a?"

Muuŋkʉʉ à laa enɛ̂, "Wɛ̀ toꞌ kaꞌ njar. Wɛ̀ toꞌ yɛɛnè kaꞌ."

Muunje embe njì bèe a m mbaa a fʉʉ a tɛɛ a laa enɛ̂, "A Àle a? A Subèe a? A Abba?"

Muuŋkʉʉ à laa enɛ̂, "Wɛ̀ toꞌ kaꞌ njar yà. Wɛ̀ toꞌ yɛɛnè kaꞌ."

A m ye ŋkaꞌ anà mnòŋ àŋgoo, ŋwɛ̀ moꞌ à so kaꞌ. Ŋwɛ̀ nsuŋ buu a laa enɛ a be sàpsi mnǒŋ ŋkàꞌ anà.

Muunje moꞌ à m ba ce yì ma à m fa ye ŋger enɛ e du rcuutè anà foŋ. E kaꞌ ce dù, yì ma à laa nè ye enɛ e du koni mbǒŋtu.

E kaꞌ ce dù, a yɛ maama mòꞌ àmbò e cu mimŋgiꞌ. E caꞌnì ye a bipshi nè ye enɛ yu moꞌ zhi koni ye lɛ.

E beesì enɛ̂, "M cu mbena a ce kèꞌ ŋwɛ̀ moꞌ tɛ e baꞌ mɛ̀ tu. Boo byeŋge wɛɛwɛ a kanì à rtɛɛ mbena. Wowèe a tʉr nfèꞌ nè mɛ̀ kaꞌ."

Muunje anà à m tapsi maama a baꞌ yi tu. Maama à bipshì enɛ̂, "Muu wà, à ce du ba fɛ ?"

E beesì enɛ̂, "Ŋwɛ̀ mòꞌ à rìŋ rli muuŋkʉʉ kaꞌ cǎ fa yì ta kaꞌ. Nwɛ̀ ce e kaꞌ riŋ lir li banɛ ŋgàŋ be na ŋwa yì."

Maama anà à laa enɛ̂, "Rli muuŋkʉ a Tàtaskò."

Muunje anà à yòŋshi maamâ a du fàdìꞌ e m ce dù. E kaꞌ bàꞌ, a bɛɛŋger à ryɛ kuꞌ bèe àfo. Ritu yi m koo ye, e fʉʉ a tɛɛ à bsii bèe kaꞌ.

E kwaꞌshì enɛ̂, "Fɛŋ ce mɛ̀ tʉr ku ba ca." A fʉʉ a tɛɛ.

Boo bbyeŋge moꞌ a lapnì ye. Geewaꞌa, muuŋkʉʉ à kanî, a maꞌshi enɛ ye ye fʉʉ tɛɛ foŋ.

Muunje à kɛꞌ enɛ̂, "A Ìbrahìm a? A Kàsim a? A Kagù a?" Muuŋkʉʉ à laa enɛ̂, "Wɛ̀ toꞌ kaꞌ njar yà." E laa enɛ̂, "Mɛ̀ rìŋ rlii anà a ce wɛp."

Muuŋkʉʉ à laa nè ye enɛ e lâa. E laa enɛ̂, "A Tàtaskò a?" Muuŋkʉʉ à waa a laa enɛ̂, "Wɛ̀ toꞌ yɛɛnì!"

Běe à njìsàp ba běe à tʉtʉ a vʉ̀ ŋkàꞌ anà a vʉ a yuꞌ rbòŋ à ŋkàꞌ anà sê.

You are free to download, copy, translate or adapt this story and use the illustrations as long as you attribute in the following way:

Muuŋkʉ ce e m tʉr rli kaꞌ

Author - Kaka Gana Abba
Translation - Ngah Samson
Illustration - Awwalu Sakiwa
Language - Limbùm
Level - Read aloud