Document

Sɛꞌ efa ntèetu

Addison Gifty Naana

Andrews Opoku Antwi

Kwɛsi Gasi à m ce cu a yi ma ba yì ta moꞌ ce a m ce too enɛ Àsɛmpayɛ̀. E m tʉr ŋkar yì mòꞌ ce a m ce too ye enɛ Kwɛkù Twûm. Wowèe a m ce cu à toꞌ moꞌsir, a ce dù ŋwàꞌ moꞌsir à toꞌ anà.

Tàr ba ma zhì Kwɛsì Gasi à m ba Pàpa ba Màami. Yì ma à m ce cep muu yì ce a m ba mbaŋruŋwɛ̀ enɛ̂, "Fa kè teki njep rdip rgòr kɛ̀ màꞌ lǐ rgòr kaꞌ njobèꞌ àdeꞌ ŋgɛꞌ moꞌ ku koni wɛ̀."

Nfèꞌ ce skul yi ke dù rlʉ̀shì à kaꞌ ghɛɛ, Kwɛkù Twum à du à rlaꞌ Simpà (Winnɛbà). E m dù a lor nfèꞌ ca a cu a yì ta moꞌ ce a m too enɛ Kòbinà Amfò ce e m ba ŋwɛ̀ ce e m rìŋ à rkoo nca bòŋboŋ sê.

Kobinà Amfò a m tʉr bkeŋ àŋgo sê à rlaꞌ Simpà.

Kwɛkù Twum à kaꞌ kʉti efa rlaꞌ Simpà, a caꞌni ŋkar yì ce Kwɛsì Gasì. E m suŋ Kwɛsì buu ce e m yɛ ker ba rbòŋ ce e m yuꞌu, laŋlaŋ rtekì ce e m teki njep ma rdip rgòr!

Kwɛsì à m lɛ̀ ntee à ryuꞌ buu ce e m suŋ ye a warŋger enɛ ye ye à m keꞌ bà kù jɛ̀r a Kwɛkù dù bàꞌ à ma rdip rgòr anà lɛ.

À kaꞌ ba nè mootì moꞌ, bkar a baa ca a kwaꞌshì enɛ wowèe a be teki rdip njep rdip ce à yap toꞌ. Wowèe a m du à nfèꞌ ce ŋwɛ̀ ce yɛ wowèe kaꞌ.

Wowèe a kaꞌ dù bàꞌ à rdip anà, Kwɛkù Twum à nyɛ a gwe njo, rdip li baŋti. E kɛꞌ Kwɛsì Gasì enɛ e nyɛ koni njo foŋ. Geewaꞌa e nyɛɛ kaꞌ. E m kushi ncep zhì mâ.

Geewaꞌa Kwɛkù Twum à lo a kupse ŋkar zhì, e tekì. Wowèe a m yuꞌ rbòŋ njep rdip anà sê.

Nfèꞌ à m ce caa, nyʉ̀ à kɛꞌ a ce co. Kwɛkù à laa nè Kwɛsì enɛ tɛ a ye a kʉti à làꞌ. E m fʉu enjep rò a sor nyor a yar cɛ̀ꞌ. Kwɛsì à bi njep rò.

À kaꞌ ba à lʉ̀simbùu, Kwɛsì à kwàꞌshì à rfʉʉ enjep rò. Geewaꞌa e lo a yuꞌ àmbò yu moꞌ zhi sʉŋ ye kù, a yuꞌ ryaŋ gòr sê. E war enɛ̂, "À koni kɛ?"

E kase nyor a keꞌ njep rò a waa. E m yɛ nyàrò Nyʉ̀ enjep rdip anà. E kɛꞌ a ce war enɛ ŋwɛ̀ jaꞌ ye.

Kwɛkù Twum a yuꞌ àmbò ŋkar yì ce waa enɛ ŋwɛ̀ jaꞌ ye. E du à rjàꞌ Kwɛsì.

Kwɛkù à sʉŋ ŋkar yì, a koꞌ àgho mbe ŋkʉ̀ʉ a caŋ a du a mʉ̀ rlaꞌ à rkoni rjàꞌ.

Běe à toꞌ anà a m yuꞌ àmbò Kwɛkù ce waa mbekì a caŋ a ce dù fà rdip anà. Wowèe a m yɛ Kwɛsì Gasì àmbò e nòŋ a riŋ dìꞌ ce e yu kaꞌ, blɛɛ vi suu à nshè. Wowèe a lor muu anà a du àgho mbe ndap mcɛ̀p.

Tʉ̀ꞌ à kaꞌ raa, Kwɛsì à natì embe bkuu embe ndap mcɛ̀p a yì ta ba yì ma ba Kwɛkù Twum a yɛ àmbò a tɛɛ a yě geŋ. E m ce yuꞌ ryaŋ se à zhi kǔu ŋkòp.

A m suŋ ye enɛ a tee yi kǔu ŋkòp. Kwɛsì à kɛꞌ a ce war a ce war nè yì ma enɛ e foosi ye. E bèesi nè cumunyaŋ – ŋwɛ̀ enɛ̂, "Àmbò a ke làa nà, 'mɛ̀ ba riŋ ke kù vʉ̀ ba à lʉ̀simbùu.' Wɛ̀ m kaꞌ ba yuꞌ yà ncep."

You are free to download, copy, translate or adapt this story and use the illustrations as long as you attribute in the following way:

Sɛꞌ efa ntèetu

Author - Addison Gifty Naana, Aihoon Fatima, Biney Kwesi, Oduro Gifty, Sam Gabriel Ampa
Translation - Ngah Samson
Illustration - Andrews Opoku Antwi, Michelangelo Quaye Anang
Language - Limbùm
Level - Read aloud