Document

Dumà ce làa enɛ a suꞌsi mbo!

Nathi Ngubane

Ŋwàꞌ ca yi yu nè bǒo à btoꞌ wɛɛwɛ ce à ŋgǒŋ běebsii.

La rli a Dumà. Mɛ̀ ba bfèꞌ rrʉʉ.

M ce cu wer njar yà ce Sinlɛ ce e yu bfèꞌ ncòp – taar – à – rrʉ̂ʉ.

Wèr ce cu wèr yèr mâ ba yer̀ tâ ba nfʉr yèr ce ŋkɛꞌ ce a too enɛ Wàndâl ba yèr ŋgwe ce a too enɛ Bubɛsi.

Kɛꞌ à nfèꞌ ce kòrona vayròs ca à m vʉ̀, ler rcu li yu jɛɛ.

Yu mʉ tǎa moꞌ ce yi ŋwɛɛsi sê, geewaꞌa a deꞌ yi gee sèe yaŋ sê. Àdeꞌ kaꞌ nda ɛ, e ku yaŋ sê njoꞌ kòrona vayiròs ca.

Nyor ce bep mɛ̀ njobèꞌ adeꞌ m ker gee mcɛ̌r wèr bkar wa kaꞌ.

Nyor ce bep Wandàl njobèꞌ àdeꞌ e ker baa bkar vi nje nyòr kaꞌ.

Nyor ce bep Sinlɛ̀ foŋ njobèꞌ àdeꞌ e ker yoꞌ mŋgǔp cùu a bkar vi wèe kaꞌ.

Yà ma e ke sòr tìtǐ ndap mcɛ̀p ce à rlaꞌ rgòr àfa na. Bàba e ke fyènè mbǎŋce ba mnjàp ce a kap efa mŋkʉ̌ʉ à rlaꞌ ce a fàꞌ na.

E ke ba à ŋgaptʉꞌ wɛɛwɛ wowèe a dù rfàꞌ, Sinlɛ̀ ce kèꞌni wèr.

Gogo ce e cu wèr wowèe àfa, à rʉʉ sê, a tʉr yaŋ ntee.

A màꞌshi enɛ ŋwɛ̀ mòꞌ cu a yě geŋ à mnòŋ ca kaꞌ. Kòrona vayiròs yu yaŋ bebep se nè bèe ce a rʉ̀ʉ.

Wèr ce kòŋ enɛ wèr gee tɛ e yaŋ kaꞌ.

Yèr ma e ke fàꞌ rfàꞌ mìsi ku du fyɛꞌ Gogo vʉ ye nè mbǎŋce ce a kʉ̀ yi ku bii yɛɛneì.

E vʉ̀ lɛ mbǎŋ ce anà kù ncʉ̌ndʉ̀ꞌ njobèꞌ àdeꞌ e niŋ mbe ndàp kaꞌ.

E ba à ŋgàptʉꞌ wɛɛwɛ Siŋlɛ du tuꞌ mdip pom efa bdìꞌ ce mi yu.

Bèe moꞌ a kur cùu nè ŋkurcùu, bèe moꞌ a kur kaꞌ. Sinlɛ à m gèe yì ncetecùu nè yi cɛ̀ꞌ embe tù.

E ke sùꞌsi mi mbo à làꞌ. Yi ma lɛ mcɛ̀p ce a ke yoꞌ mbo àgho nà mbe wěr mbò.

E ke ba nè tʉꞌ wɛɛwɛ yèr ma kuushì wèr enɛ̂:

"Yar nè cɛ̀ꞌ ncetecùu cà ce yu yi fi à mnòŋ wɛɛwɛ. Sùꞌsi nè me mbo nè shup à bsɛkòn mmbaa fàdìꞌ wɛɛwɛ ce wèe kaꞌ ce dû. Cete yo cùu ba nfyenyʉ ce wɛ̀ kaꞌ ce kosi kɛ̀ cese ɛ̀."

Wèr à laa enɛ̂, "Ɛ̀no, yèr mâ."

Mnjì vi yu ntuunfu a rsùꞌsi mmir:
1. Sùꞌsi mo mbo nè mdip.
2. Sùꞌsi mo mbo nè shûp.
3. Sùꞌsi à bsɛkòn mʉmbaa. Buwaꞌ làr à lorni lorne bèꞌ
embe sɛkon mòꞌsir du ba mʉmbaa.
4. Raasi mo mbo nè mdip.
5. Sòr mo mbo nè tawɛ̌l nrara.
6. Mo mbo mi raa sèꞌne.

You are free to download, copy, translate or adapt this story and use the illustrations as long as you attribute in the following way:

Dumà ce làa enɛ a suꞌsi mbo!

Author - Nathi Ngubane
Translation - Ngah Samson
Illustration - Nathi Ngubane
Language - Limbùm
Level - Longer paragraphs

© Nathi Ngubane, Azad Essa, Social Bandit Media, African Storybook Initiative 2020
Creative Commons: Attribution 4.0
Source www.africanstorybook.org
Original source https://sacoronavirus.co.za