Document

Aku ba yì ays krìm

Agnes Gyening-Asiedu

Offei Tettey Eugene

A m ba nyʉ̀ moꞌ, ma boo à ce laa byee. E m kɛꞌ enɛ̂, "Àbɛnà, Ajùa, Àkwasi, Aku, mɛ̀ laa byee a missî. Vʉ̀ nè nè bplɛ̌r!"

Ma à m fa wowèe wɛɛwɛ byee. E kaꞌ fa wowèe ndipnjap wɛɛ, a fa wowèe nyàa. A laa nè wowèe enɛ̂, "Dù nè cu à nshè ye."

Aku à m fyɛꞌ yi baa. A fyɛꞌ mi mdipnjàp. A ker fyɛꞌ yi nyàa foŋ. E m tɛr yi plɛr ànshè nè rshentee – ŋwɛ̀ a war. Yì ma à bipshì enɛ̂, "Aku, yuu ce yi koni wɛ̀ yu kɛ?"

"Yà nyàa yu ŋkɛꞌ sê." A war. Yì ma a laa nè ye enɛ̂, "A yu yoo muu ŋkɛ̀ꞌ."

Aku à misì a war a gwe à nshè. Ma a m kòŋ enɛ Aku war kaꞌ. E waa enɛ̂, "Abenà, Ajua, Àkwasì, vʉ̀ nè nè byee cɛrcɛr!"

Boo a vʉ nè byee. Ma à laa enɛ̂ Aku fʉr nyàa ce a ce kòŋ sèꞌni.

Aku à wase a luꞌshi. E m ta rlir nje nyàa Àkwasi a kwaꞌshi enɛ̂, "Nyàa yi kwasi à kùꞌ a caa yà."

E m ta rlir nje nyàa yi Ajua a kwaꞌshi enɛ̂, "Nyàa zhì Ajua à kùꞌ."

E m ta rlir nje nyàa yì Àbɛnà. Nyàa yi Àbɛnà à m kùꞌ a caa tetee nyàa wɛɛwɛ. E laa nè ma enɛ̂, "M kòŋ ba nyàa yì Àbɛnà."

Ma à laa enɛ̂, "Àbɛnà, fa nyǎa yò nè Aku koo zhì." Àbɛnà à m yuꞌ rbòŋ kaꞌ. E m kòŋ à rtèe tu nè zhì ma kaꞌ. Awɛ, e fa nyàa zhì ne Aku.

Aku à laa enɛ̂, "Mmmm, nyàa ca be bòŋ sê." E cu mbe ntaꞌ a ye byee nè rluꞌshi – ŋwɛ̀.

Pii! Pii! Mbaŋruŋwɛ̀ ays krìm a ba njepmbè. E m chaŋ mbe basikùr zhìi ŋgòr, rsòŋ njo à ba lǐi rkɛꞌ.

Aku à m kòŋ ays krìm. Ma à laa nè ye enɛ̂, "Lòr ya bàa. M ce kòŋ à ryuu ays krim nè wèe wɛɛwɛ." Àbɛnà a vʉ nè bǎa yap mâ.

Yà ma a laa nè ŋwɛ̀ Ays krim enɛ̂, "Kyer wɛ̀, fa mɛ̀ ays krim kyèe." E m làa a fa wowèe ays krim mòꞌsir mòꞌsir.

Aku à beꞌ enɛ̂, "Moꞌ, baa, taar, kyèe." E m fyɛꞌ zhì ays krim e ba mʉcàr. E ta rlir nje ays krim yì Akwasì. E ŋwɛɛsì a caa zhì

E m ta rlir nje ays krim yi Ajua, e ŋwɛɛsi a caa ays krim wɛɛwɛ. E m luꞌshi. E kwaꞌshi enɛ zhì ays krim à kùꞌ a caa ays krim wɛɛwɛ.

E m kwàꞌshi waꞌa a laa enɛ̂, "Tɛɛ nè lô. M be kù yɛ ays krim yì Àbɛnà foŋ." E koꞌshì àgee Àbɛnà. E kaꞌ koꞌshi waꞌa a ŋaa cùu gòr a war.

Yàp ma à bepshì enɛ̂, "À koni kɛ?"

E warŋgèr enɛ̂, "Ays krim yì Àbɛnà à kùꞌ a caa yà." Ma a laa enɛ̂, "Aku à yu yo ŋwer."

Aku a war gòr, a gwè à nshè. E m kòŋ enɛ Aku war kaꞌ.

Ma à laa nè Abɛnà enɛ̂, "Kyer wɛ̀, fa yò ays krim nè Aku koo zhì."

Abɛnà à m luꞌshi kaꞌ, geewaꞌa, e m kòŋ à rtee tu nè yì ma kaꞌ. E fa ays krim yì anà nè Aku. Mmir Aku mi baꞌŋgèr nè rluꞌshi – ŋwɛ̀. E keꞌ ays krim yì gòr cà a mʉꞌrî.

Aku a laa enɛ̂, "Mmmm ays krim ca ce kèꞌ bòŋboŋ." E mʉꞌ cùu gòr a luu ma mbɛꞌ ays krim.

E lɛꞌsì a waa enɛ̂, "Ajìish!" a ce ays krim cà ekù cùu.

Ma à bipshì enɛ̂, "À koni ba kɛ sèꞌni à?" Aku à war a laa enɛ̂, "Ays krim ca ce ceꞌe."

Ma à lor ays krim Aku a fa msòŋ njo. E kar bsii. A laa enɛ̂, "Yuu moꞌ yi yu bebep nè ca. E bep."

Ma à kyesè enɛ̂, "Mɛ̀ koosimnse Aku, à deꞌ à ker koni moꞌ kaꞌ. Àmbò wɛ̀ yɛ sèꞌni enɛ yi yu bebep à rba ŋwer a?"

You are free to download, copy, translate or adapt this story and use the illustrations as long as you attribute in the following way:

Aku ba yì ays krìm

Author - Agnes Gyening-Asiedu
Translation - Ngah Samson
Illustration - Offei Tettey Eugene
Language - Limbùm
Level - Longer paragraphs