Document

Ryɛꞌnè lǐ Tar

Abraham Bereket

Adonay Gebru

À m ba à toꞌ moꞌ, muu mbaŋruŋwɛ̀ moꞌ à ba ce a m ce too ye enɛ Àbulà.

E m ce kòŋ à rbèꞌ ŋwàꞌ kɛ̀ mʉ̀ꞌ ŋwàꞌ kaꞌ. À m ba muu ce e m bor à ryɛꞌni ŋwàꞌ. E m ce gèe ŋgèe bebep.

Àbulà à m yɛ̀ɛ mbǎa yì ma tɛ e bo yuu mbòŋmboŋ àgho. Kaꞌ à nfèꞌ ce yì ma à m kaꞌ ba sʉti mbàa ɛ̀, e ku ròo lòr.

E nyoŋ yì mbòŋmboŋ wɛɛ, du gee mcɛ̌r a bkar vi.

Mʉ nfèꞌ à kaꞌ tuuse, Àbulà à borne efa rdù skûl. E fʉʉ embe ndàp, ku gee mcɛ̌r caar nyʉ̀ coo e kaꞌ kʉti mne ndàp.

Ma zhì Àbulà à kaꞌ yɛ caa, mlùu mi koo ye.

Ma zhì Àbulà à laa enɛ̂, "Muu mbaŋrù zhisò ca ce gee ŋgěe bòŋboŋ kaꞌ. M ce kwàꞌshì mɛnɛ e ker dù skul kaꞌ. E ce yɛ̀ɛ mbàa ese mɛ̀ foŋ."

E laa nè ŋgwa zhì enɛ̂, "Wɛ̀ kaꞌ ker ce sʉ̀ti mbàa, à sʉti mbetar mfǔ ŋwàꞌ. E kaꞌ mʉ̀ꞌ ŋwàꞌ kaꞌ, banɛ mbàa yi be kù nòŋ njo."

Tʉ̀ꞌ à kaꞌ raa, Àbulà à roo mbǎa zhì mâ. E m ròo à bdìꞌ wɛɛwɛ a yɛ yuu kaꞌ.

E kwaꞌshì enɛ e be dù à ntaa yǐ à tʉtʉ tɛ e bo kone mbàa.

Tàr zhì Àbulà à m yɛ fàdìꞌ ce Àbula à m ce dù.

E m làa nè ye enɛ̂, "Muu wà, m rìŋ mbùu ce à ce dù ntaa. Kʉti sèꞌni mbe ndàp fyɛꞌ mbàa anà nje mʉ̀ mŋwàꞌ."

Bfee vi jep Àbula, geewaꞌa, e du a fyɛꞌ njep mʉ̀ mŋwàꞌ.

E m yɛ mbàa ce zhì ma à m sʉti anà.

Tʉ̀ꞌ à kaꞌ raa, e ker fyɛꞌ njep mʉ̀ mŋwàꞌ. Geewaꞌa, a m ker sʉti yuu moꞌ njo kaꞌ.

E m dù a yɛ zhì ta tɛ e bo bipshi nè ye enɛ mbàa zhi ker ba njep mʉ̀ mŋwàꞌ kaꞌ njokɛ lɛ.

Awɛ, zhì ta à mʉꞌrè a beesi nè ye enɛ̂, "Muu wà, à ce kòŋ à rtʉr mbàa bòŋboŋ se tɛ à bo yhuu mbòŋmboŋ àŋgo se a?"

Abulà à beesì enɛ̂, "Zhi yu waꞌa yà tâ."

Zhì ta à laa enɛ̂, "Yuꞌ yuu ce m be làa bòŋboŋ. Bèꞌ woo mŋwàꞌ ba mbe ryɛꞌnì à nfèꞌ wɛɛwɛ. À be koni sɛꞌ njep mŋwàꞌ. Fa sɛ̀ kaꞌ."

Àbula à beesì enɛ̂, "Geewaꞌa, yà tâ, à rbèꞌ ŋwàꞌ yu ba rfàꞌ tatap sê. Mŋwàꞌ vi jɛŋri."

Tar zhì Àbulà a lor mʉ nfèꞌ mòꞌ a cu nyaŋ. E m kwàꞌshi àmbo àdeꞌ e tapsi muu zhì.

Awɛ, e laa ne Àbulà enɛ̂, "Sò beꞌ ŋwàꞌ àbee. M be jàꞌ wɛ̀ à rkoni wo bkùꞌ nje mʉ̀ mŋwàꞌ."

You are free to download, copy, translate or adapt this story and use the illustrations as long as you attribute in the following way:

Ryɛꞌnè lǐ Tar

Author - Abraham Bereket, Hardido Temesgen, Yohannes Firew
Translation - Ngah Samson
Illustration - Adonay Gebru
Language - Limbùm
Level - First paragraphs