Olôŋ ôlô ônnô ôbôlô ꞌtô! Jio ayafagin hôttôŋûan hunna allaŋî ꞌtô, ahûanya hônyê Akêddêr êttê lêttên îttalîa isiori diyya. Olô inyi icohuno îhalû oŋitek hunihoi.

Iremik iyye îhên oŋitek hôlôŋ iko oŋitek îsabît hutto gagar yafajin anîa?

Ananî hôlôŋ iko ôlôŋ îsabît ônnô ôlô hônyê Akêddêr icohuno îhaŋ?

"Alô nî ŋarri hoŋ, obi tua!" Ajio hônyê Akêddêr. "Oluahie mônyôhôî, yô. Alô nî icohuno kûak iko ôbô arîŋ ônnô ottu ꞌtô iyyif hôhôî ꞌdaŋ.

Igar nyia hônyê Akêddêr bêbê. Abeŋ Akêddêr oremik îttûbûna ôhê honyi ta ahas arrîhaî ihuo ottoloŋi.

Ahût attahisi amohuo honyi. Iramak anîa jio alô hônyê lêtên îttalîa. Itterio Akêddêr ayyo. Ettê mônyê îkafana inyi îlôhôhô honyi.

Omuno Akêddêr alla akafanî inyi îlôhôhô. Inyiak Akêddêr ihodori agalîk mônyê!

Alla ahôdô mônyê Akêddêr amîtîrî 1.6 (asênîtî-mîtîrî 160). Alama Akêddêr tô faû amîtîrî baya?

Gaa diyya, inyiak fê Akêddêr îjîrîŋa êttê itterio ayyo. Many fê hesiuni Akêddêr, hobeŋ nyia hônyê ôlô iferioro jio ôbô amaji ta attarî.

Akafak mônyonyi inyi îsêgêr ôttô hosiere honyi. Attatî ifeuna eyyo Akêddêr êttê îkîana jihonyi dêê buo fê ittittoyo.

Inyiak Akêddêr îtagôl ahûan, êttê iwotia ônnô ôbîs. "Asôhînî aŋasi hoŋ 6! abôlô nî!" Iramak mônyê.

Alla awotia inyi ihuania îhîdê sêgêr, êttê ahodori honyi ijiaran erriama iko ônô mônyê. Iremik iyye iyiuna êhînîta hodori mônyê Akêddêr?

Igigilo iyye ôsôhînî amîtîrî hodori Akêddêr ômûkajia alla awotia îsêgêr?

Igigilo iyye ôsôhînî amîtîrî hodori Akêddêr ômûkajia alla awotia îfaû?

Ollô Akêddêr îtîla oŋitek 3 many ocohuno hônyê, tô Itahunihi many Itîllêjî, atî jio Akêddêr ôsôhînî hûnîa ihuo aŋasi arriaî. Ihenio Akêddêr asahien hunno ôlô inyi îtîlarî attuna hônyê. Omîjak inyi jio ôsôhînî asahien 24 îhôlôŋ abotie, attatî inyi îttûbana isi, "24+24+24 ôsôhînî êhênîta hûnîa baya _____." Iremik iyye îtarraŋana êfî anîa?

"Monyoŋ," Ajio Akêddêr. "Egigilo nyia nî jio nanî êdôlê hôî! Iloŋotio iyye nanî ihuo nyia motie-motie. Ittu iyye iloŋo nanî aŋaî alla attu îyaŋ? Abeŋ nî alô îsôhîna êdôlê hôî"?

"Ilo iyye iduloro êŋêû-hito hôhôî ênnê emuno hôhôî bêbê, Akêddêr," Iramak inyi mônyê.

Itarraŋak mônyê êfîîta ꞌdaŋ hunno êdôlê ônnô ôlô hônyê îyaŋuno. Attatî mônyê ijiaran jio owoni ômûk ôfîôrô jihonyi. "Ibeŋ iyye îwak igioronia ôbô agagar jio hônyôhôî? Igiorok jihonyi jio oŋiyei amolie honyi iyye buo fê îfî inyi êfîîta arriaî huno êdôlê honyi."

"Awak nî lûŋa igioronia îyaŋ agagar. Ilô iyye iluak nanî egerio?"

Hinyia attohuni isi aŋiyo aŋiria-fannî, aluak monyonyi inyi egerio gagar ônnô ofuoi isi îsûlana jio honyonyi. Ihîana agagar Akêddêr ana:

Môŋ Iyaŋ,
Amuno nî iyye buo fê amolie hôî oŋiyei nanî bêbê! Ojio monyoŋ ilo iyye ittuna îhaŋ tê Itîllêjî. Attu nî imuno bêbê êllê egonyu nî iyye iko êdôlê. Owoni êfîîta jihoŋ arriaî hunno attu nî ifiyo iyye. Osô êdôlê ahito ꞌlê kuyya ahito ŋôttê? Ottu inyi iyyaluna nanî? Ottu inyi itterio adaha iko êkîana baya?

Amuno hoŋ jihoye,
Akêddêr, êdôlê hôî annittokon.

Hinyia attohu inyi egerio agagar honyi nyia, afuonni egigilita-lilaî jio Akêddêr.

"Ara hôsôhînî êdôlîô hûa atturot." Igigilo Akêddêr. "Ihuo ôrrîahat hoŋ hunno ômûk." Igigilo Akêddêr bô ꞌTurui iko Isura. Araî ꞌTuroti iko Isura atturot buo fê iyyalararaî."

"Ofuoi atturot hôhôî îsôhîna aŋaî?" Iratarî alilaî honyi.

Olôŋ Itîllêjî, amuno Akêddêr bêbê bêbê. Itîla nyia inyi many oŋitek 3 (ôsô buo fê anîa asahien 72), atî ôsô nyia jihonyi ihuo êllê îtîla nyia inyi honyonyi ayafajin arriaî.

Itîlaî nyia isi êbûŋatio hônyê many ayafajin 9. Ihenio Akêddêr ayafajin 9 hûnîa êhalû. Tô Iromu many Anyim ayafa anîa abotie, many Hiromu ayafajin hûnîa arrîhaî........"

Anîa, îhîhîanarû buo fê êhalû many jio ayafa linyia itteriere hônyê Akêddêr êbûŋatio.

Itayîrû Akêddêr hônyê iko monyonyi îkîkîanaî îkat-haŋ. Adûahino Akêddêr ꞌliŋ. Awak nyia inyi îtûbûr isi.

Atî, ara honyonyi inyiak îtûbûr Akêddêr tô ômûk asayyo hunno oyiji ꞌtô bêbê. Isiu honyonyi atturot! Anîa, awon Akêddêr iko haniye buo fê owon iko illa!