Jio nôbô nabôrê-gala annittokon ninyia alama ꞌtô tô haŋ bô Ohohi, ahaŋ ênnê îbûŋatierek aduri ônnô oyyu, amanyaî nyia ômûk laduri lîawa îlôfîrîk nyio obeŋ ahaŋ jihosi.

Tô ôbô amotie, ibienie nyia laduri hulia eferiti hosi hinyia attohuni isi aferioro îfaû ênnê îlîk ꞌtô. Attatî isi înahîna nêêma îsûjarî. Owon nyia Ohihi ihiji aduri hulia. Inyi nyia ôllô ômûta ꞌtô ꞌdaŋ jihosi.

Hinyia ayê mônyê Ohohi buo fê hônyê êttê ittuna îyê, araî nyia aŋasi honyi miyet. Alô nyia Ohohi îmanya iko imanyi honyi. Obeŋ nyia imanyi omijio inyi ônnô oyyu.

Oyôlômotio nyia Ohohi aŋiria ta haŋ. Buo fê imanyi îtamesio inyi tê êgêmîta maruahi hunno oddiŋi ꞌtô arriaî.

Ellê îlahan Ohohi kuyya buo fê ifiyo ôbô arîŋ, buo imanyi fê êttê îbahio inyi.

Ellê îfî Ohohi jio awak inyi lêtên isukul, buo imanyi êttê îbak inyi buo fê êttê ijiaran, "Ibeŋ iyye ilo îttênûna ôbô narîŋ teyya nyio odiŋ ahou hôî."

Hinyia allaŋi aŋasi hunihoi hunne ittigemiere imanyi honyi inyi, êttê Ohohi ifuhorôrô ta haŋ addi. Inyi anna amanyarî inyi ihuania îlôfîrîk.

Ogôl nyia amanya lôfîrîk hosi nyia bêbê. Orrêhênyaî nyia isi oŋitek ꞌdaŋ îrûmaniere aŋiria. Amanyaî nyia buo fê isi tê êmîmôjô buo fê itinyiaŋie akarajajaa iko agiriciaŋi hunno awahî aatî sîrîka.

Tô ôbô nôlôŋ hinyia ikukuro Ohohi akarajajaa îmaji haranyanya, arûmak nyia inyi ôbô abuk ênnê imaruak buo fê ôgûgûasa. Ittuttu nyia inyi abuk nyia êttê iwurusonia itua iputti.

Tô hinyia nyia, îdûhûtta nyia Ohohi abuk anîa êttê îŋîŋîala arrijorita hutto tua honyi. Obeŋ nyia inyi ômîjak êhîana itilietita iko elietita.

Araî nyia arrijorita hûa huno ôbô eto ꞌlê, hinyia labôlô, êttê ittuna îsôhîna ahayironi ꞌtîara. Asa nyia ayirio ꞌtîara egigilo-lilaî jio Ohohi.

Igigilo nyia inyi êyaba ônô eto ayironi ꞌtîara lîa motie-motie.

Tô ôbô, owotia nyia Ohohi ikiddimi îmôjôrî aŋiria jio aatî buo fê ôlôŋ lîa îhacôrô bêbê. Attatî ôbô latulo ittuna jihonyi. "Môŋ, afure hoŋ Okôfê. Egîama nî jio ôbô amaji ênnê iremik iyye înyaûniere aŋiria," ajio Okôfê.

Ahût Okôfê ôbô laji ninyia ônyîha ꞌtô diyya. "Egigilo nî jio ittu adî iyye ôbô hôlôŋ diyya înyaûniere aŋiria?" Ifî Okôfê.

Ayito Ohohi ajio latulo alîa êttê ikikorihina jihonyi kok-kok, attatî buo fê îmî aaji nyia. "Kuyya," ajio Ohohi, êttê iyito êttê iko ꞌdaŋ lêtên.

Jio ayafajin hunyia allaŋî ꞌtô hûa, igonyutaî nyia aduri hulia Okôfê adahatio jio êkôî nyia. Omuno nyia Okôfê êyabatio iko aatî, atî agalîk aatî hulla amanyaî ꞌtô ôlôfîrîk.

Omuno nyia buo fê Okôfê êtayirio êyêbîta-îmanyîtî watî. Odîk nyia inyi êtayirio êyêbîta watî buo fê owon iko abaŋanio. Itterie nyia lômûk jio aduri hulia adahatio jio aaji anna mûnêk ninyia ôhût Okôfê iŋiyere aŋiria.

Itoŋo nyia Ohohi îdafata buo îŋîŋîala arrijorita hutto tua buk honyi ninyia attahû inyi, attatî Okôfê ittuna itoŋo îgêr honyi.

"Nanyio îyaba ôttô tua abuk anîa?" Ifî Okôfê. "Eyaba ana ônnô ôbô leto linya ottu ꞌtô îsôhîna ahêtaddaranî ꞌtîara." Itarraŋak Ohohi.

"Anya afure eto lîa ŋaî?" Ifî Okôfê. "Abeŋ nî amîjak, atimo nî êhîana buk." Ajio Ohohi.

Hinya aruaŋanie isi tô ôbô, itterio nyia Ohohi êyabana êrrê manya honyi jio Okôfê. Etamesio imanyi honyi inyi iko êrrê hunne idehini ꞌtô inyi eruat tô haŋ imanyi honyi.

Obeŋ nyia Okôfê îkîana arriaî, buo fê obeŋ îramak nanyio ana awak inyi ijiara Ohohi îhan, atî îhûm nyia inyi îtayirio nêrrê Ohohi ihuo ottoloŋi.

Ninyia asôhînî aŋasi Ohohi ꞌtômôn, isiarak Okôfê jihonyi abuk aŋejuk ônô nêyêbîta. Nêyêbîta ôbô leto miji, atî hinyia abôlô leto lîa, êttê ittuna îsôhîna ahabalanî kura.

Ihîanak nyia Okôfê êyaba nyia jio Ohohi enyiahita arriaî, attatî tô ôbô nôlôŋ ajio Okôfê, "Egigilo nî ijiara iyye ijiŋak isukul ôŋîda îmîjak êhîana. Igigilo iyye aŋaî?"

Ikukubok Okofê jihonyi jio amîjak inyi amaji ênnê itoŋorik aduri, buo fê adahaî isukul.

Igigilo Ohohi êram ônô alêtên jio amaji aŋejuk nyia, iko alêtên ijiŋana isukul.

Buo alla abîs duo imanyi honyi ta ajiaran honyi jihoŋ jio oddiŋ ahou hoŋ ittiyanarî êrrê? Buo alla afuoi îbahio nanî jio amaji aŋejuk nyia?

Abaŋ nyia inyi. "Ara hoyijok jihonyi îmanyarî îlôfîrîhî dini," igigilo inyi.

Iyabak Ohohi êrrê hunna abaŋ inyi hûa jio Okôfê. Attatî Okôfê ittittoyo inyi motie-motie jio ôlô amanya honyi iyiji jio amaji aŋejuk nyia.

Anîa, iwot Ohohi jio ahaŋ aŋejuk nyia êttê isi iferetio iko ômûk aduri lîawa arrîhaî îhaji-jotit abotie. Araî nyia aduri hunna amanyaî ꞌtô jio ahaŋ nyia ꞌtômôn.

Amanyaî nyia buo fê Ihîdak iko habî jio ahaŋ nyia, buo aŋôhê hunihoi, agurre abotie iko ôbô eenie ênnê îmaruak. Iloŋoi nyia aduri hûnîa Ihîdak iyanyi hosi.

Iterio nyia Ohohi adaha sukul, atî ôgôl nyia ettiyana jihonyi. Olûajî nyia nêrrê sukul arriaî hunno hobeŋ inyi ômîjak. Tô ôbô, awak nyia inyi idehina adaha sukul.

Attatî inyi iyiuna leto linyia ottu ꞌtô îsôhîna ahêtîddaranî ꞌtîara iko leto linyia ottu ꞌtô îsôhîna ahabalanî kura jio abuhi îyêbîta honyi hunyia hûa. Ihuo aduri hutto buhi hûa, arrîŋak nyia Ohohi êhîana honyi.

Itoŋo nyia Ohohi ihiloŋoni hosi diyya, buo îhîana ôbô nabuk-îyêbîta ninyia iyaŋuno inyi tô sukul.

Attu nyia buo fê Okôfê êttê itoŋo îgêr honyi. "Anyio îyaba ênnê îhîana iyye?" Ifî Okôfê. "Eyaba ana ônnô ôbô leto linyia ottu ꞌtô îsôhîna ahettiyananî," Itarraŋak Ohohi.

"Anya afure eto lîa ŋaî?" Ifî Okôfê. "Anya afure honyi Ohohi," îtarraŋak Ohohi buo osuhotio ŋûyûû.