Tô ninyia berien, owon nyia ôbô oobu alla anya Lomiling. Amanya nyia inyi ihabuore honyi iko ŋoruoi buo ŋarri-hobu, Itteŋ.

Osô nyia Itteŋ êlaman huduo ꞌdaŋ buo fê alîawa ꞌdaŋ êttê îwahan îyama inyi. Atî, awak nyia Hobu Lomiliŋ êyêmîtî arraî jio ŋarri honyi anîa.

Amanya nyia ôbô lobu-0gala alla anya "Mattat alla-agalîk-ꞌtô" îgêr haboure diyya. Anya inyi "alla-agalik-ꞌtô" nyio îfahaî nyia aatî ônyîharî honyi ꞌdaŋ jihonyi, buo fê îtamesio hullo obeŋi ꞌtô awahî êfaha honyi!

Hêtêk nyio ŋoruo Mattat îyê iko malaria, awak nyia inyi îyêmûna ôbô aŋôttê.

Attatî lobu-gala ôllô ofir ꞌtô alîa buo fê îmaruak îlêtên jio Hobu Lomiliŋ, irriboro iko anyanya huno awak inyi îyamarî Itteŋ.

Hinya hêtagôlôî isi iko Lomiliŋ êyêmîtî hûa, êttê Hûmûara, êbûŋanî ŋarriok Hobu, îtayîrûna êtagôlô hosi nyia. Omuno nyia Hûmûara Itteŋ bêbê.

Iruk Mattat jio alô inyi ibuanyana Hobu Lomiliŋ êbarîtî honyi ꞌdaŋ te hiji, iko êrîfît boŋojin ninyia îhîananî îlôhîyêm.

Atûbanî nyia isi îhûhûmana ꞌdaŋ nêrrê iko ôlôŋ ônô ôlôhômô Mattat iko Itteŋ tê êtîdîma. Omîjak nyia Hobu Lomiliŋ jio obeŋ ŋarri honyi ôlô imuno êram Mattat ênnê iruk inyi anîa.

Hinyia arasai oŋitek hattarîk huno ôlôhômô, alô Hûmûara jio Itteŋ. "Ottô-onoŋ, ŋarri Hobu, anyimuni mônyôhôî iko hobu-gala Mattat ôlôŋ ônô ôlôhômô hôî, ôlô wanan îhalû îsabît abotie."

Attaragaŋa Itteŋ buo fê obeŋ ômîjak êhan ꞌtadî inyi aŋaî.

Attatî inyi igigilo, "Abeŋ inyi lûŋa edehi hobu-gala Mattat, amaruani ôllô Ofir ꞌtô lîa ôyêmû inyi. ꞌTulaŋ! Ewiwar nî lûŋa jio Mosiŋo ôŋîda nanî alô îtayîrûna ôlô inyi îhan anyio hobeŋ ôlôŋ ônô ôlôhômô."

Ara nyia Mosiŋo êsaŋanî Itteŋ.

Jio attarî nyia îlûny nyia Itetŋ tô habuore. Alla amîjak mônyê amaji ênnê îlûnyarî inyi ottu baka îjôrîa bêbê.

Aŋêr Itteŋ tôttô tua ꞌtimore ênnê iriok ꞌtir-tir, allaŋîta amoruoi iko agarrum. Hinyia afany inyi îhaŋ Mosiŋo, aniemuno nyia inyi buo fê ibuoto.

"Hoduoti hoŋ, nyio iŋeru iyye dini hama many ꞌdaŋ tô habuore buo fê attarî imaruak?" Ifî Mosiŋo.

Awôk Mosiŋo aarî jihonyi attatî idehina inyi ôyîrî. Ihîhîra nyia Mosiŋo buo îtîla jio ijiara bu Itteŋ îkîana nêrrê hunne îratûniere inyi.

"Ottô-onoŋ, ŋarri Hobu, nanyio ônnô ôrrôhô ꞌtô?" Ifî Mosiŋo.

Attatî Itteŋ îkaf atua êttê ijiaran, "Awak monyoŋ îtayamana nanî jio hobu-gala Mattat alla agalîk ꞌtô ꞌdaŋ. Abeŋ lûŋa nî awak îyêmûna atulo ôllô ônôk tua lîa. Mosiŋo, awak nî ôŋîda iyye îyêmû nanî elociaŋ duo bu iyye. Efuo adî îhûrîa ꞌdaŋ. Amuno nî iyye."

"Atî ŋarri-Hobu, obeŋi anyanya jihoŋ êyêmûniere iyye, îmîjak bu iyye jio elociaŋ nî." aluaha Mosiŋo.

Itarraŋak Itteŋ, "Amîjak nî hûnîa, atî iyye hama alla awak nî." Attatî Itteŋ igigilo gaa êttê ijiaran, "Efuo jio Lôjû eguroni-tôgôl ôŋîda ôlô îtallaŋara hôhôî ilotifor harî tôlê. Eremik ifuhorôrô jio êkôî anîa ôŋîda monyoŋ obeŋ ômîjak êkôî ênnê efuhorôrî ꞌtulaŋ."

Ihabuore diyya, amîjak nyia Hobu Lomiliŋ jio îlûny Itteŋ tô haboure. Iramak enyiamak honyi ꞌdaŋ jio ijiara ottittifiaî Itteŋ îmasîk ꞌdaŋ.

Attittifiaraî enyiamak Hobu, monyomiji, iko miji ediofo ꞌdaŋ, atî obeŋi nyia isi ôrûmanî Itteŋ.

Acaharaî jio Hobu Lomiliŋ êttê îramana inyi jio obeŋ isi êrûmak Itteŋ. "Atî acahattî, inyiahata fê ittittifiarû," Ifak Hubo Lomiliŋ isi. Ijôrîa nyia inyi bêbê.

Hinyia iwiwari Itteŋ iko Mosiŋo ilotifor ôwôrê, itterie nyia edohuo hîdê eriok.

Alô enino îsayô.

Hinyia afanyî bô Itteŋ iko Mosiŋo, atorio nyia Lôjû atôgôl honyi ilotifor ôwôrê. Ifî Mosiŋo Lôjû jio ijiara îtallaŋa isi êêtûk ôwôrê tôlê.

Iha Lôjû, êttê ijiaran jio enino ônnô orruhuno, ôlô îyêyêrî bêbê.

Itagolio Mosiŋo êram anîa êttê ikukubonia jio Lôjû ahôdê-hôdê hîram anna îllaŋarî. Attati inyi ilutonia aanî honyi itua kullo bôŋô honyi, êttê ilutuna asîhîrati attatî isiarana jio Lôjû.

Hinyia îtayîrû Lôjû êram hosi nyia buo fê igonyu asîhîrati ênnê îlaman ꞌtô anîa, abôlô amehino honyi jio êdîrat hûnîa. Anîa, êttê iruk êtallaŋara isi iko enino nyia ihuo nyia.

Hinyia afanyi Hobu Lomiliŋ iko hobu-gala Mattat ilotifor ôwôrê diyya, igonyuni isi aatî hunihoi itua tôgôl. Amîjanî nyia isi jio Mosiŋo iko Itteŋ hunne îdîrî ꞌtô hûa.

Anîa, îpôs enini atôgôl, abeŋ Lôjû oremik îtawôj êpûasa tôgôl anîa. Iwiwoŋita Hobu, "Itteŋ, abana nî jihoye ocuhunie! Abûsak nî êrrê hûa. Abeŋ nî enyiak îtamês iyye iko Mosiŋo."

Atî, abîaŋarak nyia amaji jihosi. Attatî atôgôl iyyito ônnô oruboho êttê aarî îwôrôrô isi ꞌdaŋ hunihoi.

Ihalû ôlôŋ lîa, ayamaî nyia aatî hunyia amanyaî ꞌtô imisihi Hobu Lomiliŋ êsaŋak hosi hunne iruhi isi, abaranî kuyya buo fê olociaŋ.