Tô ninyia berien, hôsô abelelio Hitiho abaŋ, Awon nyia nôbô ôtôrôgôl ônnô ôrrôhô tô bêbê. Obeŋ nyia ahîdê asayô ayafajin arriaî.

Ayôhô nyia amîyaŋ, aroruonie nyia abênê ꞌyani buo fê atuo ôwôrîô êttê iyohoji ababô. Ofuattaî nyia Belliaŋ, Fotir iko Hitiho oŋitek ꞌdaŋ alamaraî ittifiarî aarî.

Tô ôbô amotie, hinyia afany Belliaŋ jio ôbô ahîrrî abotie ninyia îgal ꞌtô, îtayîrûna ôbô narîŋ îkîana ta ajôrê jio, "Hôrrê! ilo addi kûak! ŋadî ahou hôî ôbôbôrô! Ahîrrî Môlôŋ anîa!"

Attatî Belliaŋ îdala. Itoŋo nyia Môlôŋ îhîdê îbak ninyia ônyîha ꞌtô îgêr hîrrî diyya, buo ômûda arraboloi.

"Atî, ibuoto bu nî bêbê, ayôhô aŋadief hoŋ," ajio Belliaŋ. "Arûmak ꞌtadî nî aarî ajia?"

Iguoho Môlôŋ. "Obeŋ ara êram hoŋ anîa! Ilo addi kûak! ŋadî ahou hôî ôbôbôrô! Ahîrrî Môlôŋ anîa!"

Igonyu Belliaŋ Môlôŋ ôŋînyak inyi anyîgîta êttê îbaŋî. Ayito fôfîŋ êttê iruat.

Ojio gaa diyya attu ababaluno Fotir. Hinyia ajio amat aarî, îtayîrû fê ôbô narîŋ îkîana ta ajôrê jio, "Hôrrê! ilo addi kûak! ŋadî ahou hôî ôbôbôrô! Ahîrrî Môlôŋ anîa!"

Attûrûbîaha Fotir, êttê iyito. Igonyu Môlôŋ itoŋo îhîdê îbak ôttô îgêr hîrrî buo ômûda arraboloi.

"Aii, atî ibuoto bu nî bêbê, ôsô lûŋa ihuo alla anûra duo nî asûlûŋayô," ajio Fotir. "Arûmak ꞌtadî nî aarî ajia?"

Iguoho Môlôŋ. "Obeŋ ara êram hoŋ anîa! "ilo addi kûak! ŋadî ahou hôî ôbôbôrô! Ahîrrî Môlôŋ anîa!"

Agusur Fotir dô, atî hinyia igonyu inyi anyigita Môlôŋ, êttê îbaŋî. Ayito fôfîŋ êttê ifuho ika alisa ahîdê mîdîr-mîdîr.

Ojio gaa diyya attu Hitiho îhîrrî diyya. Hobeŋ îsûbû ômûk aarî, îtayîrû fê ôbô narîŋ îkîana ta ajôrê jio, "Hôrrê! ilo addi kûak! ŋadî ahou hôî ôbôbôrô! Ahîrrî Môlôŋ anîa!"

Ayîrîta Hitiho hau-hau, attatî ibonno ahîdê. Igonyu nyia inyi Môlôŋ itoŋo îbak ôttô îgêr hîrrî buo ômûda arraboloi.

"Aii, Okibak, ebuoto bu nî bêbê, ayôhô lûŋa aŋadief hoŋ ihuo êllê îllacauno addî ŋattarî," ajio Hitiho. "Arûmak ꞌtadî nî aarî ajia?" "Obeŋ ara êram hoŋ anîa! "Ilo addi kûak! ŋadî ahou hôî ôbôbôrô! Ahîrrî Môlôŋ anîa!"

Aŋînyak fê Môlôŋ anyîgîta honyi hunno ohodori ꞌtô hûa jio Hitiho. Obeŋ nyia Hitiho abaŋ. Ika alêgê honyi hûa, attatî Hitiho îbûranio Môlôŋ. Ilôŋôjîta nyia Hitiho bêbê, êttê iko ꞌdaŋ îŋîôrôn tôttô tua hîma Môlôŋ. Akur êêma ahîdê duai-duai iko arraboloi hûa ꞌdaŋ. Attatî êêma anîa ifurui jio duk-duk.

Hojio Môlôŋ afuho, abîaŋarak nyia amiji jihonyi. Attatî Hitiho îdîaŋara inyi ta agôlôn ahîdê. "Aji!" Aluahi Môlôŋ.

Imôk Môlôŋ îbak ênnê îtanôk ôlôŋ jio fôŋ-fôŋ. Asuak êbak anîa awoi Môlôŋ jio madalak, êttê isuahuna iko oofir ꞌdaŋ. Many jio nôlôŋ lîa abeŋi oofir woi Môlôŋ inyiahi isuruna.

Abeŋ buo fê abelelio Hitiho inyiak ibuaran ꞌtulaŋ. Asuak êêma Môlôŋ anîa allôrî ibelelio Hitiho.

Abeŋ afuatan îmatuno aarî tô hîrrî inyiak îrrôhôjî jio aciaŋi hûnîa.

Motie-motie, alla afuonni fê isi îmata harî, iddiddolunie Belliaŋ, Fotir iko Hitiho jio, "Waŋ îtafujo amurut hôî tênê, buo îŋalata, ahîrrî ciaŋi ꞌdaŋ ana."