Tô ôbô berien, araî nyia Hitojo iko Ibou ôlônyîharî hullo oyiji ꞌtô bêbê. Iyabatie nyia isi êrrê hutto haŋitek hosi, buo fê îyabatie êrrê hunne êlamanî tô faû.

Owon nyia Ibou iko amana honyi ônnô ôbôlô buo fê omuno amana honyi nyia bêbê, atî obeŋ nyia inyi oremik îrômô amana ônnô ôbôlô ꞌtô nyia inyi hama.

Itoŋotio nyia Hitojo îhaŋ buo obeŋ îgîama ôbô arîŋ, buo alla acohuno Ibou tô rômô, êttê fê Hitojo îmôjô ômûk aŋahî hunne îyaŋuno Ibou tô mana honyi.

Obeŋ nyia Ibou omuno êrrê hûnîa bêbê. Owon Ibou iko neruk jio êgîamak buo obeŋ ara arûmatta hîrrê asaî hunne lôbô îgêmû.

Tô ôbô nôlôŋ, igigilo Ibou jio, "Agalîk lûŋa jihonyi îrômôrî amana ana hama oŋitek ꞌdaŋ. Ara hôlô Hitojo iluak anî ta arômô buo nî adûmak inyi aŋahî."

Iruk Hitojo êram Ibou anîa, êttê iko ꞌdaŋ îfûanyanio nyio igigilo inyi jio oyiji ôfîôrô Ibou hûnîa. Iruhi nyia buo fê isi jio ôlô amaji ênnê eromu isi ibolori buo fê aŋiria ottu iremehina jio hutto haŋitek hosi ꞌdaŋ.

Aromotie nyia isi ônnô oyyu ꞌdaŋ arabotie. Orômôî, îtafûddîaî buo fê osuhotiei arabotie. Orômô nyia Hitojo buo fê îdûlatta enyiomo, buo Ibou oluahio inyi buo fê idolo afure alla arômôî isi.

Omuno nyia Ibou bêbê bêbê nyio aromuni nyia isi amaji ônnô ôbô agalîk ottoloŋi.

Orômô nyia Hitojo bêbê bêbê tê iduoŋi-hôlôŋ many îdôrrôrî ôlôŋ buo fê obeŋ ôyîrîûtta. Orruhio nyia buo fê inyi arômô honyi.

Igigilo nyia Hitojo jio tê êgîama honyi anîa bêbê, awak inyi ijiara Ibou ôfônîk êdûmîtî honyi nyio ômûtarî êdûmîtî hunno ôdûmatta Ibou inyi bêbê.

Iyarû Hitojo Ibou itua mana, attatî îtahûtana inyi amat hunyia isuruni 'tô êttê ijiaran jio Ibou, "Iko îmîja hûnîa ꞌdaŋ, anî aromu hûnîa ꞌdaŋ. Osîrû bu êllê îfônîk iyye êdûmîtî hoŋ."

Attatî Ibou imijio buo obeŋ omuno êttê ijiaran, "Obeŋ, êrômô nyiabu ꞌdaŋ ara abotie, abeŋ nî afônîk êdûmîtî hôî. Heguoro amana hoŋ baka anîa," êttê iwuwoŋonia.

Atî, obeŋ nyia Hitojo omuno êram anîa bêbê, êttê îlêtên êllê îjôrîa.

Ihawwa nyia Ibou bêbê. Alô îhaŋ honyi êttê igigilo bêbê, "Alô adî nî îhan êram anîa aŋaî nyio îgîama Hitojo bêbê buo nî abeŋ awak ijiara inyi ôlô."

Anîa, iloŋu Ibou Hitojo jio ôŋîda isi ofuonni iwwahuna êram anîa. Attatî îfî Hitojo jio, "Iwak iyye ijiara anî afônîk iyye aŋahî ômûk ajia?" Ilôfîôrô nyia Hitojo êttê igigilo. Ojio gaa diyya êttê ijiaran buo ômôm afaŋ jio, "Mmmmm îmîjak iyye arîŋ ênnê oremik ꞌtô îtamuno nanî? Arîŋ ênnê îtamuno ꞌto nanî êllê ebuany amana hôî anîa tê ihiji. Ebotie ŋati jihoŋ buo ebotie ŋati jihoye."

Adûarû Ibou dô buo igigilo. "Oŋîda ôlô nî ibuanyana iyye ômûk êllê ilo iyye iduloro arômô jihoŋ bêbê ihuo ottoloŋi."

Asuhotio Hitojo ŋûyûû. Amîjak jio afuoi êdûmîtî hûnîa îlûajî bêbê. Ettê iruk êdûmîtî Ibou hûnîa teyya-teyya.

Ojio gaa diyya, abeŋ Hitojo inyiak iromotio bêbê ihuo ottoloŋi. Itoŋotio îfaû buo idolotio afuretia many îddôrrôrî ôlôŋ.

Igîama nyia Ibou bêbê bêbê fuur, êttê iko ꞌdaŋ itterio eyyalara Hitojo. Aŋûŋûsîa nyia inyi buo fê êttê îŋîŋa jio anyio idehi inyi eruk afônîhîna êdûmîtî Hitojo.

Ihawwa nyia Ibou bêbê bêbê tê êmanyît Hitojo ônnô ôrrôhô ꞌtô anîa. Tô ôbô nôlôŋ, attu Ibou iko ôfîôrô hunno oyiji ꞌtô bêbê îhûhûmaniere êram honyi iko Hitojo. "Awak nyia nî jio ôŋîda hôhôî êsô alôrrîahat iko alônyîharî hulle emuno ꞌtô ahûattêk bêbê, atî owon êram," Ajio Ibou.

"Oyyu nyia arrîaha hôhôî êhôr iko ꞌdaŋ amana hoŋ, abaŋatie ôrrîahat hullo oyiji ꞌtô ahûattêk," Iruk Hitojo.

"Abeŋ nî awak êrrê hunne îhanio iyye hûnîa, ibuoyo iyye buo fê ibeŋ îgîama êrrê hunyia eruk," Ajio Ibou.

"Ellê ibeŋ iyye îwak iluak nanî tê êgîama, ilo atî addi tô mana hoŋ," Ajio Ibou. Iha Hitojo alêtên addi nyio amôk inyi aŋiria ênnê isiatta inyi ibou asaî. Ayyuho nyia Ibou Hitojo êttê îtîlaŋara inyi addi buo fê êttê îsar inyi jio, "Ellê enyiak nî igonyuna iyye tô mana hoŋ, êttê nî îhûanya iyye."

Many jio ôlôŋ ana ahana êllê igonyu fê Ibou Hitojo tê îgêr mana honyi buo êttê fê itiloŋio Hitojo, buo Hitojo tênê êttê îdîmatio îgêr loti ôŋîda inyi ahoholutta aŋiria honyi tô tûa matta Ibou.