I jur lo luŋu a Buŋgu, kakuruk siꞌda i kadijik na rema ko döru.

Lepeŋat köti gweja guguö kase rema ko döru gwoso na kadijik na. Lepeŋat ꞌdeꞌya kinyojin kase i gugu.

Nan, ko kayuŋwök kwe ko lupudiet kwe, yi liŋ siꞌda i kadijik musala, pajo ko melesen.

Yi kata ko gugu duma ꞌdelet lo kinyojin kaŋ.

Yi a ꞌyuddu gweyarijin ti kinyojin jore i melesen nikaŋ.

Yi a ꞌyuddu bakaya, bömuk, gwanda, loputu ko sörömöndi.

I diŋit ꞌdumet na kinyo, nan ko lupudiet ko kayuŋwök kwe liŋ kikita parik, a yi jondi kinyo mede a tikini i gugu.

Gwiliŋit likaŋ liŋ gwon i kinyo lo melesen nikaŋ. Ŋote nikaŋ ŋupi jojoŋga kulye kinyo i tugwörju.

A yi ꞌdeꞌyi kulye kinyojin lo nye nyei ko a nyomot lo ꞌyuꞌyutu i diŋit na popo.

Lor lele nagon yi ꞌyuddu nyomot i melesen nu, luba lo kole na luŋaser lio a ꞌbeleŋo.

A ŋote nio sondi nan mede i galundya na nene kole i gugu.

Nan ko ꞌdure mede, a nan ꞌbiꞌyi gugu.

Nan a tupe i meddya nio na mijok jore, lobot ko loꞌdiꞌdik wöwöki a bur, gaꞌyu pirit ꞌdanaet.

A lepeŋat wöki i ꞌdome lo bakaya ko i kiden na jurakan ti bömuk ko ti gwanda ko loputu. ꞌDeꞌde kijik lopeŋat a likin.

Ŋo liŋ gwe taliŋ. Nan kirut a den, nyo nagon jurakan kaŋ ti sörömöndi kulo wowoson perok liŋ.

Nan ko taki money lo, lepeŋ ako sörju.

"Jore ti mijok pondya muꞌdiŋ a kuruji dilyö i gugu. Mijok toreja twana. Ko na kwe nan ŋupi jambu adi ti kinyo na derani dera ꞌbura," kulya money likaŋ.

Yi ko gwe midi, kinyo a dera ꞌbura.

Yi ko aje jo nyesu kinyo, a monye likaŋ jamakindi yi adi geleŋ lo twana logon mijok lo yegga a Muri lo Lassa, logon leleŋga.

Mijok köti bubulö toreja kulye twana jore lorok.

I koꞌbure na lele lor, a yi gwoloŋe midi.

Yi a yekun kinyojin kaŋo liŋ i gugu a yi ꞌdiꞌdiji dilyö na kuru lepeŋat kune ko sumenti.

A yi köti tokeꞌyi bor na mede na.

Ŋina de ŋaŋarakindu i teŋgu na pondya na mijok kayaŋ i kadijik ko i guguö.

Mijok ti ꞌbön piritön nake, naꞌbut.