Köju ꞌberon, lele kine karin kanyit a Lobeke. Lobeke köju a Mor lo kijakwa ko kwen liŋ ti mede. Lepeŋ a gwoloŋ ꞌbura.

Lor lele, Lobeke a luŋgu kijakwa ko kwen liŋ i momoret.

A lepeŋ lo jambi adi, "Julin kwe, nan luŋgu ta kogwon nan a rude," kijakwa ko kwen liŋ a yiŋa adi mid.

Lepeŋat gwon i yiŋga na Mor lose i jambu.

"Nan a rude adi kinyo kode pioŋ gwe ꞌbayin i jur. A jore ti karo kaŋ aje twa twa!" kulya Mor.

Kijakwa ko kwen liŋ ko yiyiŋga rude na Mor, a lepeŋat uŋgö rigwökö. "Yi de ŋona kondi nyo?" Pija Burön.

Sukuri ko Bata a po ko yeyeet. A lepeŋat kulyani adi, "Ti ŋadi geleŋ jondi kinyo a tikine ko Mor i gugu."

Kijakwa liŋ a ruggö ŋina yeyeet.

A Mor tindi saret a kulyani adi, "Jondi ta pata. Tore ta tor nye logon ako jondya kinyo i gugu lo Mor. Kirut jo ta lepeŋ köyö ni."

Madaŋ naꞌdit, a gwe a diŋit na Mor ludukötyo lo ꞌdebbi jur.

Kijakwa ko kwen liŋ a siꞌdaki kak a wulundi Burön a Mor lose ludukötyo.

Ama Kine a renya ruggö adi Burön a Mor.

"Nan lo gwon a Mor. Lele Mor ꞌbayin kwöŋ. Nan ti kuk lele kijakutat asut," kulya Kine.

A kijakwa joŋgi kinyo i gugu lo Mor ludukötyo. Ama Kine ako joŋga nene ŋo.

"I diŋit nagon Kine köju a Mor na, yi liŋ a kuk lepeŋ. Sunana lepeŋ tine ꞌbön kugga Mor likaŋ ludukötyo, yi de kondya nyo?" pija Kiteŋ.

Kijakwa ko kwen liŋ ti mede a woran parik.

"Lepeŋ yeyeju adi nye gwon ko tukaꞌde ko yi," lopeŋat lo wiwinyani.

ꞌDioŋ adi, "Nan a ŋarakin lepeŋ i diïnit nagon nye a Mor na. Nan ti doto ko kwaje. Nan gwon ko lepeŋ diŋitan liŋ, ko nan gwon a jo i ŋarakindya."

Köbilityo adi, "Nan köju a tin lepeŋ kupir kwe liŋ anyen mugi ŋwajik kanyit."

Wuri adi, "I diŋit nagon lepeŋ a Mor na, lepeŋ a takin julin kanyit adi nan lo nyesu parik. Ama nan köju gwon kanyit i melesen kukurju ko ꞌboꞌboja bömuk ko leyot kanyit."

A Köbilityo lo piji, "Lepeŋ jambu adi nyo? Adi do nyesu parik? Lepeŋ yeyeju adi nye de gwe a Mor ꞌbak ꞌdutet?"

A Kabilityo ꞌyalakindi adi, "Ti lepeŋ deneden adi nye gwe ꞌbayin ko Mor. Nan ti den ko nyo nagon lepeŋ yeyeju adi nye a lele."

Kijakwa liŋ a kweni a toruköki adi Kine agi jojoŋga kinyo ko Mor ludukötyo i gugu.

Burön a luŋgu Kine ti po kanyit ni.

Kijakwa ko tini i meddya na Kine, se a ryö lepeŋ sisiꞌda i siꞌdet a kalabu mokosi.

"Nan ti tu ko Burön yu. Lele Mor ꞌbayin ake nan. Ko do aje gwon a Mor, do gwe a Mor diŋitan liŋ," kulya Kine.

"Yi de totor do ko pata a joŋgi do ko Mor ludukötyo yu," kulya Köbilityo.

A Kiteŋ nu torji Kine ko kotet nanyit, a jiggi lepeŋ ko Mor yu.

A kulye kijakwa kulo, ako Köbilityo, Loꞌdioŋ, Lowuri, Bata ko Losukuri wowoŋoro i mukök ni pupuraddu Kiteŋ i jiggö na Kine adi, "Joŋe ŋilo gworoko, joŋe ko Mor ludukötyo yu."

Suluja i ŋinu diŋit teŋ ko sunana, kine a renya tu, ko jijikö.

Lepeŋ yeyeju adi ta joŋga nye ko Mor mede.