Tô berien, ihiji mur, igigilo Hobu Haworu amoi honyi.

Igigilo nyi jio, "Emîmaruahuno nî, alô nî îyê. Onyimutta eyyahani êllê îlôfîô ꞌtô arûtanî honyi hôgôl ahûan buo fê aŋuaî hobeŋi ojiŋani inyi."

Atî, ôlô ꞌtadî Hobu inyimuna arûtanî honyi aŋaî? Omuno inyi acîaŋî honyi ꞌdaŋ buo fê obeŋ igigelio isi.

Iyiu Hobu Haworu ômûk ôfîôrô honyi. Ifak êfahat honyi itua muri. Iramak êfahat jio ꞌdaŋ igiera aciaŋi ottubuniei îhabuore.

Olô amuno îwanan îhaŋ Hobu buo fê Hobu awak itibuoŋuna ôbô êkîana ônnô oyyu ꞌtô bêbê.

Aŋeri êfahat hulia atua gûlî mur aŋûan ꞌdaŋ.

Jio attarî ônô nyia, attubuniei nyia ꞌdaŋ aciaŋi îhabuore. Oheheunei nyia isi ta amuno, attatî buo isi îhîa îhaŋ hobu.

Hinyia iduoŋ ayafa sûûr tô hîdê ꞌyani, êttê Hobu Haworu ittuna, attatî iwotia ihosiere hosi. Itawôj ôbô aciaŋ ahîa. Ninyia itterio Hobu Haworu êkîana, adûahînie nyia isi ꞌdaŋ jio sîk.

Anîa, ajio Hobu Haworu, "Egigilotio nî oŋitek huna jio ijiara anî anyimu aciaŋ ôllô/ônnô ottu ꞌtô îrûtana elohobu hoŋ. Atî, ta amuno hoŋ îtaî ꞌdaŋ, ôgôl jihoŋ inyimuniere ôbô tê ihiji hataî aciaŋ ôllô/ônnô îlôfîrô bêbê. Ihuania, êfûr nî jio ijiara apuasa fêrê ôlô inyimuna aciaŋ ôllô/ônnô ôlô ꞌtô îrûtana anî."

Akaf Hobu Haworu afêrê ahîdê. Ettê ijiaran, "Aciaŋ êttêrî ôllô/ônnô opuasa ꞌtô afêrê ana ahîdê attatî îhên many ꞌtômôn hobeŋ afêrê ana îmûk îfaû, inyi ôllô îrûtana elohobu hoŋ."

Hinyia atuhok Hobu Haworu êkîana honyi, êttê aciaŋi hûnîa îtayîrûna ewiwoŋita ônnô okuat bêbê tê îhalû hosi. Ayitoi nyia isi ꞌdaŋ êhalû êttê igonyuna Tômê orrieuno tôttô ihiji hosi ajio Hobu.

"Hottina ꞌdaŋ tê îkôî. Anî abôlô ꞌdaŋ, igiara anî asô a hobu," ajio Tômê.

Idûhû Tômê afêrê, êttê înnînnêk ta aanî honyi. Attatî buo ipid ahûan, êttê ipuasara afêrê anîa ahîdê idou. "Abotie! Arrîhaî! Hunihoi! aii!" Aluahi Tômê.

Imôk afêrê îfaû buo êhênîta hôsôhînî aŋûan ijiaî. Ilôŋôjîta Tômê êttê iko ꞌdaŋ iburaŋarû adiyya. Iramak inyi Hobu Haworu jio, "Atuho ônôhôî apuasa fêrê."

Hinyia iburaŋarû Tômê adiyya, ahahayaî nyia aciaŋi daŋ buo fê omunoi. Gaa diyya, inyiahi fê isi îtayîrûna ôbô ehosok tê îhalû hosi.

Aŋeru abatak tôttô ihiji ciaŋi buo fê ikikenuno jio, "Hottina tê îkôî addi, hottina tê îkôî addi. Alô nî îsôhîna ahobu. Awon nî iko arroŋi huno obolori ꞌtô. Anî agalîk ta agôlôn. Igiara anî asô a hobu."

Apid ahûan, înêf afêrê côcôk, êttê ipuasara ahîdê. "Abotie! Arrîhaî! Hunihoi! Aŋûan! Miyet! Aii!" iyihi Batak.

Imôk afêrê îhênî êtîllêjî. Ilôŋôjîta inyi bêbê. Aruasak abôrô ahîdê ta ajôrê.

Iramak inyi Hobu, "Batak, isiaranî aciaŋi ꞌdaŋ epuasit ababô, atuho ônôhôî." Alô Batak.

Hinya attohu Batak, êttê iŋuŋunihina ômûk hunonyi jio, "Aii! Ogôl arrîca ana! Obeŋ Tômê ottulok, buo ôbôlô buo ꞌdaŋ asaî. Obeŋ buo fê Batak oremik ipuasara ônnô oremik, buo Batak ôgôl bêbê. Obeŋ ciaŋ oremik ittulonia arrîca anîa."

Igonyuni isi Gorrila ottu ahosiere. Hinyia attu inyi, êttê îttîr, "Attulok nî. Amîjak nî alô nî îgêm, Atulok nî."

Idûhû inyi afêrê êttê îŋîŋad. Attatî ipid ahûan, êttê ikikor ahosiere, allûa ahîdê êttê ipuasara afêrê.

"Abotie! Arrîhaî! Hunihoi! Aŋûan! Miyet! Illê! Hattarîk! oh!" Aluahi Gorrila.

Imôk afêrê îfaû buo êhînîta hôsôhînî hottohunik ijiaî. Addudduho Gorrila. Ijôrîa nyia inyi bêbê êttê itterio ayitotio fêjêŋ-fêjêŋ, êttê îlahan, buo fê êttê ilolia asaî-asaî.

Itterie nyia aciaŋi ômûk afuatan îhaŋitek hosi. Hinyia itterie isi atturo, êttê isi igonyuna abôtôr Bûrê ôllô odiha ottu tôttô ihiji ciaŋi. Hinyia îŋalaû Bûrê, êttê ijiaran, "Itîlaûna, îtîlaûna. Ijiara nanî akiem. Alô nî ittulonia. Alô nî ittulonia. Ijiara nanî akiem."

Hinyia îtayîrûnî aciaŋi êkîana honyi, êttê isi ꞌdaŋ itterio asuhotio wooo.

Adîôtô Hobu Haworu jio ꞌyek êttê îkîana buo îjôrîa, "Itawajata asuhotio hataî anîa! Hêttadduhiete Bûrê! ŋaî ôllô ojio ꞌtô jio obeŋi aciaŋi hullo odihara ꞌtô ôttênûnî êrrê hunno ôttênûnî aciaŋi hunno obolori ꞌtô? Alla awak Bûrê ikiem, ijiara esiarak inyi, ijiara okiem ihuo aciaŋi hunno ômûk ꞌdaŋ huduo okiemi ꞌtô. Ihutôtô addi. Ijiara Bûrê opuasa afêrê anîa."

Irrafa Bûrê jio Hobu, ayito, êttê îhasana afêrê îhûtûk. Iŋîŋad êhalû, êttê îŋîôrôn bêbê bêbê fîr-fîr. Hinyia afany ipuasit, êttê ifirri ahîdê bêbê.

Attatî îmûhûna ôlôyîrî, êttê ipuasara afêrê buo ihenio woŋ-woŋ, "Miyet iko Miyet araî ꞌtômôn." Imûk îfaû jio cut.

Adûaî aciaŋi. Ittayataî ꞌdaŋ. Ikukubok Hobu jio, "Aafê, Bûrê! Miyet iko miyet araî ꞌtômôn. Olûajî êkôta hunne iheniere many ꞌtômôn."

Obeŋ arrîca ana ottufia ôlôbôlô kuyya buo fê ôlôgôlô bêbê. Arrîca ana ônô aciaŋ êllê/ênnê îlôfîôrô ꞌtô bêbê! Inyi ônnô ôsôhîniere Bûrê ahobu ciaŋi hinyia ayê Hobu.