Di daa yaa niŋla lala ka niŋ lala, ka bɛ daa dɔɣi bipuɣiŋbila yuli booni Phyllis, Joburg yaɣ' shɛli bɛ ni booni Orange Grove la.

Niriba ayi ban daa yu taba pam la, daa laɣim n-gbaai bɛ bile' viɛlli m-mɔisiri o.

So daa na bi mi ni wawari biinga n-yɛn nti nye lala bia maa.

O ni daa ti yɛn m-paai yuma anahi, o daa pun bohimla yɛla pam. O yɛla daa niŋdila o karimbanima lahaʒibsi domini o ni daa mi o naba ni dambu shɛm maa.

O daa kuli warila waa biɛɣu kam. Shɛli n-daa kani pahiri o suhupiɛlli nti paai waa wabu, poi ka o chaŋ shikuru bee o yi daa yi shikuru na.

Phyllis ni daa ti paai yuun pinaanu, o daa paana tiŋ karili yuli booni London, ni o ti tum o nam tuma. O daa chɛbisi o zonim' zaa.

O daa lo nia ni o kuli labi pili biɛhigu. Royal Ballet School nima! Phyllis paana ni o ti zali yuli.

Phyllis ni daa ti wa waa din yuli booni Swan Lake la, di viɛlim daa saɣiya ni di wa n-wuhi Napaɣa! O daa zaŋla yuun gbaliŋ m-bɔhim, ka di pa saɣi ni o yi polo.

O ni daa ti yɛn wa n-wuhi salo, o daa dam o maŋa, n-wolim o maŋa. Nyama! Ka sokam bahi lari! Nyam bɛ ni kpahiri bɛ nuhi ka yohiri shɛm!

Mexico zaŋ ti kpa Canada. USA zaŋ ti kpa France. Phyllis daa go n-kpa bɔba ni yaɣa, din yɛn che ka anduniya zaa nya o waa.

O mini Royal Ballet Company, nti tabili o wawari taba daa wuhi bɛ yurilim zaŋ kpa waa wabu polo. O daa naʒin bori ni di naai.

Phyllis daa kuli mi ni waa be o suhi ni. O daa kuli borimi ni o labi kuli yiŋa, nti labi pili yɛlli kam.

Dinzuɣu o daa johiya, n-yiɣi jam, n-labi o ya din viɛli la ni. O daa lahi labi o wawari tiŋ la ni. O daa lahi lɛbi South Africa nira.

Waa wabu daa kuli pala diɛma ko, ka Phyllis ni daa mi li shɛm saha kam. O daa kuli biɛla nimmohi ni saha kam, m-bohindi waa, ka mi daa zoori di ni.

Saha kam, o daa kuli bahirila lari, ka mora, yɛla ni ti chani viɛnyɛla ni di yi ti bi chani viɛnyɛla, Phyllis daa kpaŋdi o maŋa pam saha kam. O daa bi nya m-paai o ni daa bori li shɛm.

Romeo mini Juliet, Swan Lake mini Giselle. Phyllis daa wa ŋɔnim zaa n-wuhi salo viɛnyɛla, ka wumsim ka o.

O mini o taba, Gary Burne ni Eduard Greyling baŋsim daa ti salo maa ninyambo. Salo maa daa kuli bahiri o mi binpuma.

A yi kuli kpaŋdi a maŋa, anfaani nyɛla din yɛn doli di nyaanga na. Phyllis daa baŋ dimbɔŋɔ saha shɛli bɛ ni daa ti boli o "Gaŋdu."

Bɛ daa ti o pini gahindili shɛli din yuli booni 'Prima Ballerina Assoluta' la. Wawari biinga ŋun gaŋdu! Phyllis nyɛla ŋun yuli ku kpi. O daa bi lahi bori binshɛɣu yaha.

Zuɣusuŋ! Nyam gbaari suŋ! Phyllis daa nya o yura. O yuli n-daa booni Philip Boyd. O gba daa nyela wawara.

Bɛ daa lo amiliya. Bɛ daa yɛn laɣimdimi wari waa. Shaba n-daa lahi kani n-lunzahim taba ka bana, hali biɛla gba.

Di mini bɛ daa ka bihi maa zaa yoli, bɛ daa naʒin mali suhisaɣingu. Bɛ niriba ayi maa daa bo soya ni bɛ sɔŋdi Manima ni Banima.

Bɛ daa kpala waa bohimbu shikuru ka boli li Dance for All, ka bihi ban daa nye faranima gba daa bohindi waa ni.

O daa zali yuli waa wabu ni, nasara din nye din galisi. O lahaʒibisi ŋɔ daa nyɛla din zaŋ galisi n-ti niriba pam, n-sɔŋ ba bɛ gba di nasara.

O shikurubuhi daa nyɛla ban wuligi n-gili duniya zaa, ka di nyɛla ŋuna n-ti ba ninyambo. Bɛ daa kuli warimi ka ti lihira, n-ʒi ti ʒishɛhi ka wumdi nyaɣisim.