Bogologolo-tala, Letsatsi, Ngwedi, Pula le Phefo di ne di lwana.

Bothata e ne e le gore Letsatsi le ne le batla go phatsima motshegare otlhe. Ngwedi o batla go phatsimisa lesedi la gagwe letsatsi le letsatsi. Pula e batla go na letsatsi le letsatsi. Phefo e batla go foka letsatsi le letsatsi.

Di ne di sa batle go neelana sebaka.

Tsa fetsa ka go nna mmogo le go buisana ka ga se. Letsatsi la botsa Ngwedi, "O dira eng se se thusang Lefatshe?"

Ngwedi a araba,"Ke phatsima bosigo gore diphologolo di tsome."

Ngwedi a botsa Pula, "O dira eng se se thusang Lefatshe?"

Pula ya araba, "Ke naya Lefatshe metsi gore ditlhare le dimela di kgone go gola sentle. Ke naya metsi gore diphologolo di nwe."

Pula ya botsa Phefo, "O dira eng se se thusang Lefatshe?"

Phefo ya araba, "Ke fiela Lefatshe phepa. Ke phatlalatsa pula mo lefatsheng lotlhe."

Phefo ya botsa Letsatsi, "O dira eng se se thusang Lefatshe?"

Letsatsi la araba, "Ke naya Lefatshe lesedi le mogote gore diphologolo le dimela di tshele."

Letsatsi, Ngwedi, Pula le Phefo tsa reetsana ka tlhoafalo.

Jaanong Letsatsi la re, "Ke nnete gore mongwe le mongwe wa rona o thusa lefatshe ka tsela e e kgethegileng."

"Ee," ga rialo Ngwedi, "ga gona ope mo go rona yo o gaisang ba bangwe."

"Re ka dira mmogo," ga rialo Pula.

Phefo a re, "Mme jaanong, a re kgaoganeng malatsi."

Botlhe ba dumelana.

Gape ke sone se nako e nngwe o bonang ngwedi fa letsatsi le phatsima. Gape ka dinako dingwe o utlwa phefo fa pula e na.

Letsatsi, Ngwedi, Pula le Phefo di dira sentle mmogo. Di a tlhaloganyana.

A o rata letsatsi, ngwedi, pula kgotsa phefo?

Thala se o se ratang go gaisa.

Re tlhoka Lefatshe gore re tle re tshele. Le re naya dijo le tshireletsego, diphologolo le dimela. Tsotlhe di re thusa ka tsela nngwe.

Le rona, rotlhe re ka dira sengwe go thusa Lefatshe la rona. O tla dira eng go thusa Lefatshe? Se kwale fatshe.