Bupe aalitemenwe ukwipusha ameepusho. Ayambwile iyi misango ku bafyashi.

Baalitemenwe ukumweba abati, "Nga tauleipusha ameepusho ilyo uli umwaice, lyena ukakula uwakukana ishiba ifintu!"

Ubushiku bumo, Bupe aalipwishe bakafundisha bakwe, "Bushe mulandunshi abafyashi lyonse batweba ukulasamba ku minwe ilyo tatulatampa ukulya, nangu iminwe yesu ilemoneka iyabusaka?"

Abaanankwe mu sukulu baalitemenwe ilipusho lyakwe. Nabo tabaleetemwa ukubeba ukusamba iminwe yabo.

Bakafundisha balyaswike, "Ilyo lipusho ilisuma,Bupe. Nangu iminwe yesu ingamoneka iyabusaka, kuti yakwata utushishi twa majeemu."

Baalilondolwele ukuti, "Utushishi twa majeemu tulaleta ubulwele. Teeti tumone amajeemu ukubomfya ameenso yesu, tufwile ukubomfya icintu icakwatisha amaka ukumona amajeemu."

Bakafundisha baalibulile icintu icitwa maikolosikopu ukufuma mu kaabodi. "Maikolosikopu ciibombelo icibomfiwa ukumwenako utuntu utwacepesha saana uto ameenso yengakana ukumona," efyo balandile.

Bakafundisha baalibulile akamuti na ukupisha pa minwe yakwa Bupe elyo na ukupukutila pa mulu wa maikolosikopu.

Bakafundisha baalibikile igalasi pa mulu wa maikolosikopu elyo bamwene ifintu fimo.

Nangu iminwe yakwa Bupe tayalemoneka iyafiko, lelo amajeemu emo yali.

"Amajeemu yalasangwa mu fintu twikata mu kaalasi, mu fibansa twangalila, nangu pa ng'anda.

Aya majeemu kuti yalenga ukulwala saana," efya sokele bakafundisha.

Balikonkenyepo ukuti, "Napakuti kube ukwipaya aya majeemu, tufwile ukulasamba ku minwe ukubomfya ameenshi ayabusaka na isopo, maka-makailyo tatulatampa ukulya.

Kabili ilyo twalwala tufwile ukusamba ku minwe yesu pakuti tatusalangenye amajeemu."

Ilyo abwekelemo ku ng'anda, Bupe aasangile bawishi baalepanga icintu cimo. "Cinshi mulepanga?" efyo aipwishe.

"Ici eco beta, 'kandagirukarabe' icakunyantapo ilyo ulesamba kuminwe," efyalandile bawishi. "Kuba ukubomfya ilyo ulesamba ku minwe yobe panuma yakubomfya icimbusu, elyo nelyo tamulatampa ukulya."

Bupe aalipapa elyo na ukusosa ati, "Oo, cishinka! Bakafundisha beesu nabatweba pali ici cibombelo, lelo abengi muli ifwe tatwaishiba ifyakucibomfya. Cibomba shani?"

Baalisekele elyo bamweba ukuti, "Isa mupepi elyo nalakulanga, we mwana wandi."

"Pakubala, nyanta pali uyu mutengo uli panshi," efyasosele bawishi.

"Elyo konteena muli ameenshi alalosha icipunda cakufuminapo ameenshi paminwe yobe.

Ibukisha ukusamba ukubomfya isopo," efyo baebele Bupe.

Bupe aalitemenwe elyo alandile ukuti, "Bushe nga naishibe shani ifi ukwabula ukwipusha ameepusho?

Kanshi cishinka ukuti ameepusho yapeela amaano."