Kariza wakali kuyandisya kubuzya mibuzyo. Ciyanza eeci wakacijana kubazyali bakwe.

Bakali kunga balamwaambila kabati, "Kuti kotabuzyi mibuzyo nocili mwana, uyakukomena kakunyina ncozyi!"

Bumwi buzuba, Kariza wakabuzya bayi bakwe kati, "Ino nkaambo nzi bazyali besu ncobatwaambila kusamba kumaanza katutanalya cintu, nikuba kuti maanza eesu alibonya kubula dooti?"

Basicikolonyina mukkilasi bakauyanda mubuzyo wakwe. Abalo tiibakali kuyanda kwaambilwa kusamba kumaanza.

Bayi bakaingula bakati, "Ooyo mubuzyo mubotu, Kariza. Nikuba kuti maanza eesu alibonya kubula dooti, alakonzya kuti kaajisi tuzunda."

Mpoona bayi bakapandulula bakati, "Tuzunda tuletela malwazi. Tatukonzyi kutubona tuzunda kwiinda mukubelesya meso eesu, pele tweelede kubelesya cimwi cintu cilaa nguzu kapati kucita kuti tutubone tuzunda."

Bayi bakabweza maikkulosikkopu kuzwa mukkabati. "Maikkulosikkopu ncibelesyo ncotubelesya kubona zyintu zyisyoonto kapati zyitakonzyi kubonwa ameso," bakaamba bayi.

Bayi nibakamana kupandulula boobu, bakabelesya kasamu kucumba-cumba maanza okwa Kariza akukasansamwida akagilazi kamaikkulosikkopu kasamu aaka.

Bayi kagilazi bakakabikka amaikkulosikkopu alimwi nceeci ncibakabona mucimboni-mboni.

Nikuba kuti maanza okwa Kariza akali kulibonya kubula dooti, kwakali tuzunda kumaanza akwe.

"Kuli tuzunda tujanika muzyintu zyituzingulukide, zyintu nzyotujatauka mukkilasi yesu, mubbuwa lyakusobanina antela amunzi mpotukkala.

Tuzunda ootu tulakonzya kutuletela malwazi mapati," bayi bakacenjezya basicikolo babo.

Bayi bakatolelela kwaambaula bakati, "Kujaya tuzunda ootu, tweelede kusamba kumaanza ameenda atajisi dooti kubelesya nsipa, kapati katutanalya cakulya.

Alimwi, ciindi nitucisidwe, tweelede kusamba kumaanza kucita kuti tutayambukizyi tuzunda kubantu bambi."

Kariza naakasika kumunzi kookwabo, wakajana bausyi babamba cibelesyo cibotelezya. "Ino mubamba nzi batata?" Kariza wakabuzya.

"Eeci ciitwa kuti 'imikila akusamba,'" bausyi bakavwiila. "Cibelesyo eeci ncakubelesya kumaanza noozwa kucimbuzi, alimwi anotanalya cakulya."

Kariza wakagambwa akwaamba kati, "Oh inzya! Bayi besu batwaambila kujatikizya cibelesyo eeci, pele bunji bwesu tatucizyi bwakucibelesya. Ino cibeleka buti?"

Bausyi bakaseka akumwaambila kabati, "Swena munsi-munsi ndikutondezye, omwanaangu musimbi."

"Cakutaanguna, tanta akapulanga aka kayalidwe ansi," bausyi bakamwaambila.

"Mpoona cibikkilo cilasendeka ameenda alazwa kukutila kumaanza.

Koyeeya kusamba ansipa," bausyi bakamwaambila Kariza.

Kariza wakakkomana akwaamba kati, "Ino nindacizyiba buti eeci kakunyina kubuzya mibuzyo?

Masimpe ngakuti mibuzyo iletela luzyibo."