Kɛ gua̱a̱th mi ci wä, tëë kɛ mäthni ti cieŋ kɛɛl, ɛ Yak kɛnɛ Pɛlpɛl.

Yak ɛ puur ka̱a̱kni mi di̱i̱t. La kerɛ nikɛ runwaŋ kä bɛ wä lät rɛy kakädɛ.

Pɛlpɛl la kerɛ nikɛ cäŋdäär.

Jɛn la ŋa̱a̱ mɛ kä ri̱i̱nyɛ rɔɔdɛ. Kɛ kɔrɛ bɛ kulɛ wä gör kua̱n.

Kɛ runwaŋ ni ciaŋ, la mocɛ rɔɔdɛ kä kuay rɛy tue̱cä kiɛ yiirä Yakä. Kɛ kɔrɛ bɛ wä rɛy kakä kɛ pɛ̈l kacä ce̱tkɛ mi cɛ lät.

La dɔpɛ ni mac mi kɛɛlɛ kɛ kuay. Thiɛlɛ mi la luäŋɛ kɛ lätni, ɛ ni kël bɛɛl kärɔadɛ.

Kɛ gua̱th ŋër, Pɛlpɛl la jiɛnɛ kɛ ɣöö bɛ rɔa̱a̱th bɛɛl mäthdɛ wä kual.

Jɛn la naŋɛ kɛ rɛy tue̱cdɛ kiɛ yiirɛ.

Yak cuɛ wi̱cdɛ yi̱c kɛ kuël kuaynikɛ.

Pɛlpɛl cuɛ loc i̱, "Dɔ̱ŋ kɛ ji̱ thi̱eekädan tɔ kualkɛ bɛlku tɔ. Kɛn tekɛ cucä näk buɔth kɛ ɣöö /ca la̱t luäŋ."

Yak cuɛ jääny caarɛ riɛkdɛ. Cuɛ ben nhial kɛ ca̱r. Cuɛ luaac kuɛth pua̱nyni jiɛɛn.

Jɛn cuɛ kak gekdɛ kɛɛliw thiäŋ kɛ luaac ti dɔapdɔaap. Ɛn kueel ba käp ɛ luaac.

Kɛ wäär, cu Pɛlpɛl jiɛɛn wë manytaapni kual rɛy kakä Yakä.

Ɛ ŋot /kenɛ ni cop rɛy kakä cuɛ ɣɔw guic kɛɛliw mi puɔlɛ.

Pɛlpɛl /kenɛ luaac tin ca go̱lni kak ɛ Yak nɛn.

Pɛlpɛl cuɛ cuɔ̱ŋ rɛy luacä kä cuɛ dɔp thi̱n. Cuɛ rɔaal kɛ gör lua̱k.

Cu Yak rɔal liŋ kä ri̱i̱ŋɛ raar kɛ ɣöö bɛ kueel ben käp. Jɛn /kenɛ ŋäth kɛ waŋdɛ i̱, dɔ̱ŋ ɛ jɛn määthdɛ ni Pɛlpɛl min ci dɔp rɛy luacä.

Niɛ gua̱th ɛmɔ, cu Yak duɔ̱pdɛ kuany kä cu Pɛlpɛl wä kɛ duɔ̱ɔ̱p dɔ̱diɛn. Cuɛ cua̱ jɛn tuk däkä määthädiɛn piny.