Mëë ŋuot Nyaluaak kɛ kuɛ̈, la man a tɔ̱ɔ̱c kɛ bi̱ri̱c mi gɔaa.

Ɛn bi̱ri̱c ɛmɔ takɛ waydɛ ɛn Nyaluaak kɛ ga̱a̱p nöör.

Ɛn bi̱ri̱c ɛmɔ tëëkɛ biɛɛl ti ŋuaan.

Tëëkɛ biɛl mi diŋ kɛnɛ biɛl mi tɔ̱c la̱l kɛ biɛl mi tɔ̱c juayni. Jɛn tëëkɛ dääk kɛ bi̱ri̱c tin kɔ̱ŋ tin tekɛ man rɛy duëël ɛ.

Ɛn wec ëë tekɛ thin ɛ wec mi leth ɛlɔ̱ŋ kä tëëkɛ pääm. Kä tëëkɛ jiɛth kɛnɛ thɔ̱ɔ̱l kɛ makaari ti ŋuan.

Duŋdɛ ɣöö /cɛ la dualɛ ɛn Nyaluaak kɛ kɛn mɔɔl piɛny diaal ɛ tɔ̱.

Cu man wee, "Ɛn bi̱ri̱cä mɛmɛ gaŋɛ jɛ ɛlɔ̱ŋ kɛ mi dee jɛ kac."

Ɛn Nyaluaak ɛ gat mi pɛlpɛl. Ŋäcɛ jɛ amäni gua̱a̱th puɔ̱ɔ̱l in janyjany min thiäk kɛ dhɔɔriɛn.

Nyaluaak ŋäcɛ jɛ amäni dhɔr mandɔŋdɛ bä.

Jɛn ni ciaaŋ laa wëë rueeth kɛ cak thɔ̱a̱rɔ̱a̱a̱l kɛɛl kɛ mandɔɔŋdɛ.

Kɛ cäŋ kɛl, ɛ jɛn i̱ wëë mandɔɔŋdɛ gui̱l dhɔɔrɛ, kä cuɛ bath rɛy päämni. Cuɛ dual ɛlɔ̱ŋ.

Cuɛ nyuur thaar jiaath mi thep kä cuɛ te thi̱n lipɛ rami mi dee jɛ luäk, kɛ pɛ̈th cuɛ niɛɛn kä cuɛ läk läkikä.

Cuɛ rɔɔdɛ jek tɔ̱cɛ rɛy bi̱ri̱cä min gɔaa. Cuɛ ciek mi di̱t mi cäätkɛ mandɔɔŋdɛ nɛn guic jɛ piny. Doothɛ duɔɔth kä kämɛ jɛ cak thɔ̱a̱rɔ̱a̱a̱l kɛ liɛɛr. Niɛ gua̱a̱th ɛmɔ cuɛ tetkɛ riny kɛ käpdɛ kɛ cak, kä cuɛ cu ke̱e̱r.

Cuɛ wäŋkɛ lɛp ni määth.

Mëë cɛ nhial guic, cuɛ dit mi tɔt mi tɔ̱cla̱l nɛn tëë kaarä jiaath nhial.

Mëë ci Nyaluaak rɔ jiɛc, ɛn dit ɛ tɔt ɛ tɔ̱cla̱l ɛmɔ cuɛ gɔ̱kɛ tɛ̈ŋ kä cuɛ Nyaluaak böth dup.

Cu Nyaluaak ɛ guɔ̱ɔ̱r.

Nyaluaak cuɛ cop gua̱a̱th mi tekɛ dup ti ŋuan ti däk piny gööli, cu dit ɛ tɔ̱cla̱l ɛ tɔt ɛmɔ ko̱l yuɔr piny mi ce̱tkɛ bi̱ri̱c Nyaluaak.

Mëë cɛ bi̱ri̱c ɛmɔ kuany piny, Nyaluaak cuɛ ci̱ök ti ce̱tkɛ mi man kɔn ja̱l kɛ jɛ.

Kɛ pɛ̈th jɛn cuɛ wa̱l in janyjany nɛn ɛ thia̱kɛ kɛ gua̱a̱th ëë laa kɛn pi̱w ɛ jɔm thi̱n.

Ciëŋmani Nyaluaak cuɔ diit kɛt kä duthkɛ kɛ ɣöö loor kɛnɛ.

Kɛn cua ŋuɔ̱t dɛl, cua ri̱ŋ bul kä tɛth lo̱ckiɛn kɛ ɣöö ci nyaadiɛn lunyjɔk kɛ mal.

Nyaluaak cuɛ nyuur rɛy bi̱ri̱cä dɛ min gɔaa ɛ camɛ ri̱i̱ŋdɛ min ca buɔ̱lɛ ni kɛ tɛ̈th lɔaac.