Naane, dabbaaji e njooɗodi jam nder ladde.

Asugumri wonno laamiiɗo maaji.

Asugumri anndini dabbaaji, geegerewol maari bee hiite waɗira.

Ngam maajum, dabbaaji fuu no kulayndi.

Balɗe ɗen, hiite bee kardumbal huɓɓirte. Sey nyalnde feere ndiyam toɓii, kardumbal ciiwooru soofi.

Ndu heɓaayi huɓɓugo hiite ngam ɓikkoy maaru aytino.

Sey ciiwooru lili ɓikkoy njaha keɓa hiite to geegerewol asugumri.

Ɓernde asugumri e metti. Ndi riiwi ɓikkoy ciiwooru, koy keɓaayi hiite.

Ciiwooru ɓerni nde ɓikkoy ngarti meere.

Nde jemma jenngii, asugumri ɗaanake, sey ciiwooru bee ɓikkoy ngari ngam wujjugo hiite diga geegerewol asugumri.

Ciiwooru solti geene jorɗe bee hakkiilo yaasi suudu asugumri.

Ciiwooru ɓattini geene ɗen haade geegerewol, asugumri e ɗaanii. Ammaa geene hubbaayi.

Ndu meemi geegerewol asugumri bee hakkiilo. E ngol feewi!

Ɓikkoy ciiwooru maa meemi geegerewol ngol. Hiite walaa!

Sey ciiwooru bee ɓikkoy ngaɗi ka jalugo.

Sey jaleeɗe ciwooru ummini asugumri bee gerooɗe fuu.

Asugumri wuuriri geegerewol muuɗum heedi maaji, e hoola, "Mburtee, ndoggee, on kulataayam na?"

Ciiwooru jaabi, "Min meemi geegerewol maaɗa, min keɓtii ƴoyre maaɗa!

Min co''oto min mbi'ayka dabbaaji luttuɗi fuu, ɗi ɓernante."

Gerooɗe fuu kultori. Sey ɗe ndoggi, asugumri maa tokki.

Gerooɗe ali ladde kooti haade himɓe njooɗi.

Diga ɗon, gerooɗe no kulay ciiwooji e ɗe njooɗi haade himɓe ngam ɓe aynaɗe.