Naane, mboju bee fowru ɗi soobiraaji.

E ɗi kawti dow kuuɗe ɗuɗɗe, ndenno ɗi ngimidii, ɗi ngamidii.

Nyalnde feere, sey mboju wi'i, "Soobaajo am fowru, en ndemu en ndiskay."

Fowru wi'i, "Ee, ɗum goonga, en aaway nyamdu ɗuɗndu, ngirbooɗenndu, coorenndu."

Mboju ƴami, "Too, ɗume aaweten?"

Fowru wi'i, aawugo butaali ɗum boɗɗum. Mboju jaɓi. Sey mboju wi'i fowru, ndikka ɗi cennda kuuɗe ngesa.

Mboju ɓeydi wi'ugo, "Kuugal am woni aynugo ngesa ngam colli."

Sey mboju hokki fowru rema, aawa nden remtoo.

Fowru sali, wi'i kuugal maaru ɓurii ɗuuɗugo piw. Ammaa, mboju wi'i, aynugo colli ɓurii saɗugo bee marugo saman.

Mboju famtinindu, "Kuugal am hoyaayi. Mi ƴeeŋay leɗɗe mi riiway colli jemma bee naange. Nden an, a waawataa ƴeeŋugo leɗɗe."

Sey fowru jaɓi haala mboju. Ndu jaɓi remugo feere maaru. Ɗum kuugal ɗuɗngal, nden mboju wallaayindu koo seɗɗa.

Ɓaawo remugo, fowru aawi ngesa fuu feere maaru.

Nde ngesa waɗi geene, fowru remtiika. Ɗum kuugal ɗuɗngal soosey.

Mboju e jooɗi dow hayre e yima, "Soobaajo am no kuwoowo, min darwantamo. E mo huwa bana ga'i demooji, min woni mawɗo maako, leydi ndi mo irtata, ƴoole ɗe mo fusata, awdi ndi mo aawata, geene ɗe mo remtoto, butaali ɗi min ngirbotoo."

Nde butaali ɓadii ɓenndugo, mboju e seyi e yima ngam riiwugo colli nder ngesa.

Riiwugo colli naa' ɗum kuugal caɗngal. Mboju nanaayi gulɗum sam.

Butaali ɓenndii ɗi kewti sodeego. Mboju wi'i fowru, en cennday girbol hakkunde meeɗen. Mboju wi'i, "Min, mi sodata ko fuɗi wurti dow leydi fuu, an boo a soday ko fuɗi nasti leydi."

Fowru sey jaɓi numi ɗum dabare soosey.

Mboju wi'i, "Haa mi arta mi soda jey am, nden soda jey maaɗa."

Sey mboju sodi butaali gonɗi nder ngesa fuu, sigiiɗi nder beembal.

Fowru yahi ngam sodugo ko fuɗi nasti leydi. Ndu wasi, e ndu numa ndu heɓay girbol deydey hikka.

Ammaa ɗaɗi tan ndu tawi puɗii nasti leydi. Ndu wasi ngesa fuu, walaa ko ndu heɓi.

Sey fowru heɓti ƴoyraama. Ndu ɓerni ngam ndu hooti bee boorooje meere. Alaasara ndu yahi wuro mboju, ɓernde maaru e metti naa' seɗɗa.

Ndu wi'i mboju, "En ndemay fahin, soobaajo am."

Fowru wi'i mboju, "Jooni, min sodata ko fuɗata wurtoo dow leydi ndin, an boo a soday ko fuɗata nasta leydi ndin."

Mboju sey jaɓi. Ɗum wi'i, ndikka alugo butaali, sey aawa goɗɗum feere. Sey ɗi narri ɗi aawa dankali.

Fowru tabitini, wi'i, "En fuu no en ndemiday, en aawiday, en ndemtoto."

Mboju jaɓi, sey ɗi kuwidi nder ngesa e ɗi ngima.

Nde dankali hewti itteego, sey mboju wi'i fowru yaha itta ko fuɗi wurtii leydi. Fowru yahi ngam ittugo ko fuɗi fa'i dow.

Ammaa walaa ko ndu heɓi. Ndu tawi haako dankali tan. Sey ndu hootidi bee boorooje meere.

Mboju sey yahi itti dankaliiji mawɗi ɗuɗɗi. Ɗum resiɗi nder beembal. Nde fowru yi'i ko mboju itti, ndu ɓerni. Fowru sey ƴami mboju, "Ko waɗi ƴoyruɗaayam?"

Mboju numtini fowru, kayru suɓti ittugo ko fuɗi wurti dow leydi.

Fowru ɓernii waanee. Ndu wurnii mboju ngam ndu waato. Ammaa mboju doggi daɗindu.

Diga ɗon, soobaaku fowru bee mboju timmi.