Nde ceeɗu waɗi, ndiyam walaa nder laynde.

Balɗe ɗuɗɗe, nyuungel heɓaayi ndiyam.

Nyuungel woyi, "Sey mi heɓa baadel ndiyam, koo simtooyel diga to haako."

Ammaa, koo sammam walaa.

Nyuungel woyi, "To mi heɓaayi ndiyam, mi maayay."

"Mi nani e woodi maayo, sey mi yaha."

Jiire wagginingel, "Maayo e heewi tep, ilaagol maajam yoolete."

Nyuungel nanii ɗonka waanee, "Mi maayay to mi yarataa ndiyam."

Ngel dilli ɗaɓɓutugo maayo.

Raa laawol ngol nyuungel tokki.

Ngel saalii daƴƴe geene e lise leɗɗe jorɗe.

Ngel yahi haa ngel nani saa'o ndiyam.

Ɗum maayo! Ngel nani ƴuuge ndiyam.

Nyuungel yari ndiyam pewɗam ɗuɗɗam.

Ngel nanii belɗum, ngel nanaayi ƴuugere ndiyam e wara.

Nyuungel haɓdi nanngugo geene beeyuɗe dow ndiyam.

Ammaa ndiyam ilningel.

Ngel noddi, "Mballeeyam, mballeeyam!"

Poola ndanewa jogii lisal wi'i, "Yaawu, ƴeengu."

Sey poola hisni nyuungel yoolaago.

Nyuungel numi, "Mi munyay ɗo'o, sey to poola so''ake ngam yarugo ndiyam, nden mi yettanga."

Nyalaande feere, e ngel reeni, ndaa ɓiɓɓe ɗiɗo bee piɗirɗum maɓɓe.

Gooto wi'i, "Poola mawnga ndanewa e yara ɗo'o."

Oya wi'i, "En kirtotonga hannde jemma."

Sey ɓe cuuɗii nder baafe e ɓe ndeena poola.

Nyuungel wi'i, "Mi yiɗaa ɓe mbara poola. Ammaa mi pamaro, ko mi foti waɗugo?"

Sey poola jippii diga dow lekki ngam yarugo ndiyam.

Ɓiɓɓe e taskano fiɗugo poola.

Sey nyuungel heɓi dabare.

Ngel ƴeeŋi koyngal ɓiɗɗo, ngel ŋatimo bee semmbe maagel fuu.

Ɓiɗɗo diwi wulli, "Wayyoo!"

Poola ndanewa sey riggii, fiiri, nga hisi.

Non nyuungel yettiri poola ndanewa ngam hisnugongel.