Wuro amin e wi'e Colliire, yoorngo marngo gulɗum, e ngo heewi leɗɗe ɗe gi'e, be'i ɓuri himɓe ɗuuɗugo.

Luumo amin maa e yeewi, filooɓe no seɗɗa tan. Ɓurnaa fuu, himɓe bee baskur ngancirta.

Fajiriire feere, daada am noddiyam, mo wi'iyam, "Yusufu, hannde a cikii duuɓi joweego'o. Min kokkete dokkal." Mi ƴami bee seyo,"Ɗum ɗume? Ɗum ɗume?"

Daada jaabi, "Jaango min njahay luumo Garwa bee moota mawnga." Sey mo wi'i, "Min njaaday bee maaɗa!"

Mi meeɗaayi yahugo wuro mawngo! Mi nani belɗum, haa ɗum saloriiyam ɗaanaago jemmaare nden.

Nde fini, e tasa Malarba, e mi darii hakkunde daada am bee googo am. E mi haddi salla kesa ciwɗiha, e mi ɓornii limsel boɗeyel.

E mi rammi, e mi famɗi hakkunde daada am juutuɗo bee googo am mawɗo, payɗo.

Moota ngan heewi tep, sey daada am huufiyam.

Ɗoyɗi nanngiyam ngam gulɗum bee belɗum yaadu amin, sey mi ɗaani nder moota, walaa ko mi yi'i.

Naange fuɗii wakkati min njottii luumo Garwa. Haade dammugal luumo, e woodi debbo e mo soora gawri. Sey mi yi'i worɓe ɗiɗo e taskoo kasaago dankaliije maɓɓe. Sey mi raari juungo nano, mi yi'i debbo feere, e mo jogii ruusiyel ciwɗiyel boɗngel.

Mi noddi, "Daada, daada, raaru ruusiyel ngel ɗaa'e!" Ammaa daada am fooɗiyam, mo daraaki.

Ton, caka luumo, min tawi soorooɓe ɓikkon leɗɗe feere-feere. Mi meeɗaayi yi'ugo ngokkon. Sey mi ƴami daada am, "Noye inɗe ɓikkon leɗɗe ko'on?"

Mo sappii, "Ɗo'o ɗum leemu, ɗo'o ɗum goyaabe." Mi wayliti, mi ƴamimo fahin, "Ko'on boo?"

Nder ɓikkon leɗɗe fuu, dukuuje mi ɓuri yiɗugo. Noone dukuuje fottaniyam soosey. E mi numa, to mi mettake, no ɗum wa'i?

Mi wayliti, mi wi'i daada am, "A foti, a soodanayyam dukuure na?"

No mo hokkiriyam dukuure nden, sey mi yoofi juungo daada am, mi jogorii dukuure nden juuɗe am ɗiɗi, mi fuɗɗi nyaamugo.

Mi meeɗaayi nanugo belɗum nyaamugo ɓinngel lekki, bana mi naniri belɗum dukuure. Hakkiilo am fuu e dukuure am tan woni.

Nde mi timmini nyaamugo dukuure, sey mi tijji ngam wolwango daada am. Ammaa mi yi'aayimo! Daada am bee googo am ndilli.

Mi raari juungo am nyaamo e nano, mi raari koo toye, ammaa mi yi'aayiɓe. Mi ƴami soorooɓe dankali haade ɗon, "On ngi'i daada am na?" Ɓe paalaaki. Sey mi fuɗɗi woyugo.

Yeeso seɗɗa, debbo feere nanngi juungo am, yaariyam to ɓikkon feere njooɗi.

Gorko mawɗo mo wakkude tekkunde ƴamiyam, "Suka, noye innde maaɗa?" E mi woya, sey mi wi'imo, "Yu-su-fu."

Sey mi numi, koo e ɗum soora ɓikkon maa e luumo? Mi acci woyugo, e mi raara, koo woodi coodoowo ɓinngel ton to min njooɗi? Ka neeɓaayi, debbo feere wari, hoosi ɓinngel gootel.

Mi huli, "Koo min, ɓe koosata ɓaawo?" Mi numi, "Mi meetataa yi'ugo wuro amin fahin." Sey mi fuɗɗiti woyugo.

Sey mi nani gorko, marɗo wakkude tekkunde, mo ƴami, "Toye Yusufu?"

Mi ɓeydi woyugo, mi wi'i, "Mi yiɗaa dilludugo bee maaɗa!" Sey mi suuɗiimo.

Nde daada bee googo am nani ɗum noddi innde am, ɓe njaawoyi.

Daande nde mi anndi noddi, "Yusufu, Yusufu!" Ɗum daada am.

Mi ummii mi harɗoto daada am, sey googo am wi'i, "Yusufu, e min ɗaɓɓitaynoma ngam hokkugoma dokkal maaɗa."

Diga booroore mawnde, googo am wurtini ruusiyel ciwɗiyel boɗngel. Mo wi'iyam, "Ɗum jey maaɗa."