Sêe a há̧na, Anansi nyánzélé fa̧ kpêe kpay ka ɓil wâʼa a mɛ̌.

Ɓá béla kpêe ka ri mambáy kɔ́, ké kara kpêeké, dáy a kaw ka sɔ̧́náké.

Gelka Anansi kaw ɓay sɔ̧̧́ kpêe a mɛ̌, ké lá njuku ka háŋ nzáʼaŋgboro. Anansi kɛrɛ. "I sé ɓá gé lé ?" Dáy a ŋgburu nzáʼaŋgboro.

Ɓá Pɔl pé gí, mûn nɛ́ ta̧ mambá. Pɔl sá: "Anansi, mɔ́ pɔŋ mí ri vûn, kɔʼɔrɔyá. Mi séséna ɗí mambá a sêenɛ́, mi ta̧ mambá, nzala í mí mambá kɔ́."

A goló a̧hí̧ Anansi e niŋáké lé, ɓá pɔŋ nɛ́ ri vûn?

Anansi niŋ sɛ̧ŋlâʼa mambá ɓay a wal béla a kpêe a mɛ̌ kuu njuku. Dáy a tí niŋ gala law. Gelka Pɔl kaw nzáʼa lâʼa ka ndárá ndɔ̂ʼɛ ɓay a mbí kpêe, Anansi vbá nzáʼa: "Pɔl, ndɔ̂ʼɔ ná ɓá ɗaʼam! Mɔ́ ma sɔ̧́ lâʼa ka ndɔ̂ʼɔ ɗaʼam nyá ! Mɔ́ sé turu ndɔ̂ʼɔ."

Katína, ndɔ̂ʼɔ a Pɔl yírí mambá. Dáy Pɔl koro ɗere sé
mbii, sé turu ndɔ̂ʼɛ a rekoro regí kaw nzáʼa lâʼa.

A ɓil a nɔ́, Anansi tí sɔ̧́ kpêe a mɛ̌ a sɔ̧́ too. Gelka Pɔl regíy, ké kó ɓá kpêe ɔ dá. Pɔl ɛrɛ Anansi a sá hí̧ nɛ́: Awá hí̧ mɔ́, ka mɔ ɗí mǐ gí lâʼahɛ̧ a golóy.

Sêe a há̧na, mɔ̌ mí há̧ra̧ sé ŋgboro gel ní lé, mɔ́ gí kó mǐ, a mi niŋ hɛ̧lâʼa hí̧ mɔ́. Nǎŋnɔ́, Pɔl rekoro a kála sé gélé.

Fal nâm kpay, Anansi tí kɛrɛ ɓay a lâʼa ka Pɔl sá hí̧ nɛ́y.
Nǎŋnɔ́ sêe a há̧na, ké uru a sé gel a Pɔl. Anansi gé ka̧ vûn a Pɔl ka sɛl a sêe lâʼahɛ̧, ka sêe kaw ríŋa ka tûl mbii.

Pɔl ná tûl lara a kaw nɔ́ sêe, ɓá báŋké ka Pɔlri kaw niŋákéy. Gelka, Pɔl kó Anansi, ké sá: "A̧ní Anansi, mɔ gí sɔ̧́lâʼa kuu mǐ lé?"

Dáy Anansi zi a sá : "Náŋ, ná ɓá béla hɛ̧, awá hí̧ mɔ̌." Ké lá nzala mambá.

Nǎŋnɔ́, Pɔl ri mbii ɓay a sé mɔny hɛ̧lâʼa rá̧ hɛ̧ri̧ too. Anansi kaw zoko ka tûl lara a gbaŋ mbii. Zaa tɛ̧̂w lé, Pɔl u mbii tɛ̧ gí, a sá: "Ô Anansi, lâʼa ná ɗɛ́ŋ a ŋgɛŋnɛ́, mɔ́ gí lâʼahɛ̧ kuu mǐ."

Dáy a relé mbii ɓáy, a tí gé sɔ̧́ goy a ké mɔny ɓay a lâʼa a bɔʼɔlêw.

Anansi lé zɔ lé mbii sé táʼa mbii, dáy ké ɓá nyánzélé,
ké zi tí ɓá Pɔl yá, ké zi ma riŋ sé táʼa mbii yá.

Ké ɔ ɓá tûl mbii dad. Ké lé zɔ vbú mbii, ka zɔ, ké zi riŋ mbii yá. Ké zi ma ɗere sé sɔ̧́lâʼaké yá.

Kɔ́rɔ́ké, Anansi ziŋ kɛrɛ a há̧na. Ké fa̧ sawri ɓá ŋgɛ̧́náké kɔ̧ ɓil laa a mɛ̌, ké niŋ nǎŋ ɓay a ké ɗere sé táʼa mbii.

Ɓá báŋké ka ké erú ka hɛ̧túna mambáy ! Ké kó táy
lâʼa a Pɔl, mbá ka goy rá̧ béla hɛ̧ri̧ rá̧ lâʼa a bélákéri. Anansi erú ka mbii mbá ɓil nzɛ́ʼɛ.

Dáy gelka Anansi ndárá ndɔ̂ʼɛ gé mbí lâʼay, Pɔl ŋgbá ndɔ̂ʼɛ a sá: "Anansi, mɔ tí sɔ̧́ lâʼa a kaw ka gáŋ laa a mûn nɔ́ nyá ? A gel ní kú zi niŋ nǎŋ nyá."

Anansi, zi kɛrɛ ɓay a féké yá, rerú a sá Ô, katína, Pɔl, a̧hí̧ mi kaw kɛrɛké lé? "Ké gí lú gáŋ laa a mɛ̌."

Dáy, ka saw zi tí ɓil laa a mɛ̌, ɓay ŋgbá nɛ́ kaw táʼa mbii yáy, Anansirehe gí tûl mbii a sâa.

Anansiɓá tûlé riŋ mbii a ɛrɛ gel lé, ké kó Pɔl kaw sɔ̧́ béla lâʼa ráy too!