Ɗiɓaŋ dá ka ɓil gáŋ pû a Johanesburk, kú mbuŋ gun wûnynjuku a há̧na. Gunké, ɓá mǐ.

Mama a mǐ hí̧ mi rɛ́ŋ a Miriyam. Miriyam Makeba.

Mama a mǐ, kaw ɓá saŋgoma, zi ɓay a sá ɓá wûny ŋgɛ́rɛ njuku, dáy, ké niŋ péna a féké kɔ́, péna mɔny ɓil vûn rá̧ turu ɓil vûn a njuku a fékéri.

Mama a mǐ tɔ́ʼɔsêe mambá ɓay a ziŋ lari ké ma ɓurú sére. Nǎŋnɔ́ ké tí ɗɔʼɔ von a zé ɓay a ké ziŋ lari tɛ̧̂w ɓá ŋgɛ̧́náké.

Dáy sáŋna a pû ɓurú de von a kú ɗɔʼɔ a ɓil pû. Nǎŋnɔ́, ŋgawbéreri gí ŋgbá mama a mǐ, a ɓá nɛ́ sé vbú vûn sɛl ɓay a fêw zêe.

Mǐ, mi erú ka nam 18 yáŋ, mi erú ka háŋ a mama a mǐ. Nǎŋnɔ́, ka mi kaw ɓá gun a pɛ̂ŋ ɓáy, mi sé vûn sɛlké kɔ́.

Ka mi kaw ɓá gun a léléy, mi zi ɓay a ɗí si̧ŋ mambá. Gelka mi gí hɔ̧́ dáy, mi hí̧ ndɔ̂ʼɔ hí̧ mama a mǐ a turu ɓil vûn.

Mi kaw niŋ péna lé, mi ɗí si̧ŋ, nǎŋnɔ́ pénari̧ sé ɓá gánáké, nâmri̧ tá ɓá bélaké. Ɗí si̧ŋ kaw hí̧ mǐ mûn rína ka ndé mi sá táŋákéy.

Mi kaw ɗí si̧ŋ ka ɓil mára̧ a gun a Gáŋvbônri̧, nǎŋnɔ́ si̧ŋké kaw hí̧ mûn rína hí̧ njuku a fékéri. Si̧ŋ erú ka kpɔ́ŋa mára̧ njukuri.

Gelka ná ɗí si̧ŋ, ná kaw ziŋ mûn kpúna rá̧ ŋgɛ́rɛ.

Njukuri kaw sá ɓá kɔŋ ní ɓá hɛ̧hí̧na rá̧ si̧ŋ a mǐri̧ ná ɓórí.

Mi kaw ɗí si̧ŋ kuu njuku a fékéri, kú kaw lá si̧ŋ a ɓurú lágelri too ka tísiri.

Mi ná pû Sofiatoun, gel ka kú kaw niŋ hɛ̧ pû rá̧ si̧ŋri̧. Sofiatoun, ɓá gel ka njuku pû a Afirik ŋgboro a zabawri kaw ɗí si̧ŋ kɔŋ mbêw rá̧ nday mbêw.

Dáy, njukuri ka ná mbây a pûké ka ɓil nâmkéri nɔ́, zi zi mára̧ mbaŋáké yá. Njuku ná mbâykéri nɔ́, zi zi ɓá njuku a yíríri kuu mbây pukíri, kú kaw ɓá mbaŋari̧ yá.

Mi tu ɓá, zi bel ko njukuri ɓórí ɓáy tûl ɗên mûn a kuriri yá. Mi zi mú hɛ̧ kɛrɛ a mi sé tûlké yá rá̧ ɓay ka njuku nɔ́rí̧ ka kaw mbây a tûl pû zi ɓá mi sáy.

Gelka mi ɗí si̧ŋ ka nzáʼa Amerik, kú sá hí̧ mí ɓá, mi tí réka̧ nzáʼaŋgboro a mǐ nya.

Gel too ka tísiri, njukuri lá sa̧a a mǐ. Si̧ŋ a mǐri̧ rá̧ sa̧a a mǐ, ŋgburu ŋgboro hí̧ njukuri ɓá ŋgɛ̧́náké, ɓay a kú tu ɓá káwa a ndáráké zi tí a tísiri a Afirik a ŋgboro a zabaw hí̧ njuku a yírí yá.

Mi mbí mûn ní ɓay a ɗí si̧ŋ, a sá gbátɓay sé tûl hɛ̧ ka kaw tá a ɓil pû mǐ, zi lé ké ɓá hí̧ too pé e ziŋ mí.

Njuku a tísiriri too zi ɓay a si̧ŋ a mǐ, kú ziŋ nyá mǐ ka ɓil pûri ɓá ŋgɛ̧́náké. Kú hí̧ mǐ mbulí ɓay tûl si̧ŋ a mǐ, mi ɗí si̧ŋ a mbɛl a gáŋnjukuri ɓá ŋgɛ̧́náké lágelri too a tísiri.

Káwa a mǐ ná ɓá bélaké, dáy zi hɛ̧ mbêw. Mi zi ma ɗí si̧ŋ a ɓil pû a kú mgbúŋ mǐ rú yá, njukuri zi tí ka ŋgboro baa a sa̧ yá.

Dáy, béla sêe tɛ̧ a sêe a há̧na, ka Nelson Mandela nyá mbây a Afirik a ŋgboro a zabaw. Njuku a fékéri gí kaw tûl pûké, nǎŋnɔ́ sáŋna a ndáráyákéri retɛ̧ sa̧a a tâ̧wké.

Nǎŋnɔ́, mi ziŋ resé pû a mǐ ka kɛrɛ a féké a law ní.

A falké, mi ziŋ ŋgboro baa ɓá ndáráké ɗí si̧ŋ a ɓil pû a mǐ. Njukuri ka ɓá njuku a ɗên mûnri̧ ɓórí ɓórí, ziŋ zi bɔʼɔ si̧ŋ a mǐ mbêw.

Mi hí̧ ndɔ̂ʼɔ ɓay hɛ̧ nǎŋ ké ka̧, ɓayhí̧lé, mi mbí mûn ní a ew ɓá kpúnáké. Mi sá gbátɓay a ɓil si̧ŋ a mǐri̧ too.