Faɓɓiino, woodunoo muusuuru perndu e ɓoosaaru bilkiiru.

Puusuuru perndu e jooɗi to saare marɓe njawdi. Ɓoosaaru boo e wancitoo dow ɗate.

"Ko waɗi yimɓe marɓe njawdi accu-maa a jooɗii saare maɓɓe," nder suno, ɓoosaaru bilkiiru ƴami muusuuru ferndu.

Muusuuru paatuuru ferndu jaabii, "E mi yeeɗa caka yimɓe ngam mi tunwataa nden boo e mi ira suule am. So mi ƴamay nyaamndu mi wi'a, meow."

"To mi waɗii non, mi accay-yam mi yeeɗa e maɓɓe?" ɓoosaaru ƴami.

Muusuuru jaabii, "Eeh, waɗu ba mi wi'ima nden ɓe accete. Ɓe ndokkete nyaamndu."

Ɓoosaaru bilkiiru wi'i, "Hannde, mi toonyataako-ma."

"Seɗɗa daa mi nastii juuɗe maako. Mi yiɗaa mi meeta fottugo e maako," muusuuru wi'i, ndu daɗi.

Ba no muusuuru sawri, ɓoosaaru bilkiiru wari ŋohi e semmbe to dammugal saare.

Jawmiraaɓe saare nden koppi-ndu e sawru.

"Muusuuru hiilake-yam. Mi nyaamay-mo so mi nanngii-mo," ɓoosaaru e hoola-hoolina.

Nde muusuuru e fija yaasi saare, ɓoosaaru wubbi-ndu.

O wi'i, "Ko en pottunoo ragare a hiilii-yam. A wi'i-yam mi ŋoha haa dammugal. Jawmiraaɓe saare ngari koppi-yam. Jonta mi nyaamete."

"Heɗitam ɓoosaaru, taa yiɗi a nyaama-yam, ammaa arannde accam mi fija seɗɗa. Ba no mi waɗata mi acca doomburu fija nden ɓaawo mi nyaama-mo," muusuuru ferndu jaabii.

Ɓoosaaru ƴami, "Noye doomburu fijirta?"

Muusuuru jaabii, "Mi acca-mo o dilla seɗɗa, nden mi wi'a o lima yahgo tati. Wakkati o limata, mi wubba-ndu."

Ɓoosaaru bilkiiru acci muusuuru dilla nden wi'i ndu lima yahgo tati.

Muusuuru ferndu doggi ƴenti lekki.

"Jippa gila dow lekki a lima yahgo tati," ɓoosaaru torii.

Muusuuru ferndu jaabii, "Heɗitam ɓoosaaru, a meetataa a nanna-yam fahin. Naa mi bilkiijo.

Foti a lima yahgo teemerre, ujuneere koo miliyoŋre ammaa a meetataa a nannga-yam fahin."