Document

Ɨ wâyn nto' wu kelɨ wi izɨyn

Kaka Gana Abba

Awwalu Sakiwa

À n- læ meyn nà ghɨ ɨ̀tu' fɨ̀li, wâyn foyn ɨ̀lvɨ̂ nà ghɨ kelɨ wi izɨyn. Wù n- læ nà ghɨ kɨ̀ ŋweyn imò' sɨ̂ Fòyn Dunoma ta wù nà sɨ kɨŋ yɨ-àbe. Ghɨ læ bzɨ ŋweyn ibàm i bèŋsɨ̀ sî dvɨ ta nà ŋweyn nà chiytɨ ko', kelɨ wi wayn.

A nà ghɨ ta ghɨ bzɨ ŋweyn, fòyn nâ wêyn nà sanglɨ chwòsɨ-à , ɨ kfà'tɨ̀ na wu lèy'tɨ̀ izɨyn i wayn nâ wêyn nô ta ka wù læ lèma. Tèyn, a no mɨ wâyn wi ɨ̀ kfà ta wù keli izɨyn i ŋweyni, a wù nà ghɨ wî wâyn nto'.

A nà sɨ ghɨ tèyn ta wàyn nâ wêyn lèma kfèyn sɨ mala, fòyn ɨ tum ntum fòyn nà wù là'ì sɨ ghelɨ̀.

"Iyeyni nɨn ghɨ ntum ì jùŋ sɨ woynda ngòynsɨ̀ a ntè' àfèyn! Fètɨ izɨyn i wâyn fòyn, nà ghɨ wî wâyn nto'."

Woynda ngòynsɨ̀ a ntè' ɨ lêm mɨchi nâ mvì sɨ̀ nà ba'tɨ̀-à. Àŋena bò ɨtu, i seli ngèysɨ̀ ɨwu. Àŋena nywòtɨ̀ iwu nɨ̀ ɨvɨ nɨ̀ fɨ̀kàynfɨ̀, ɨ ndù sɨ tas ndɨ̀sɨ̀ fisɨ.

Ghɨli ndù nô ɨlwè' mɨfɨ̀ nà ghɨ jèm sɨ àŋena nà atu àŋena jof. Yì, a ghɨ nà keli wi iweynsɨ, ɨ lù se' ifɨŋ i fɨ̀nya' nà ghɨ fetɨ iwo zɨ̀ a ghɨ n-gâyn sɨ̂ aŋena.

Achi àteyna gvì kfèyn, dzɨsɨ jɨ̀msɨ̀ nà ndù kɨ a nto'. Wâyn fòyn nâ vzɨ̀ ŋêyn bò ŋweyn, nɨ̀ nchîsɨ nto'sɨ gvì alè' a nchîyntɨ nâ yè.

Ngòynsɨ̀, ma sɨ faytɨ meyn laf, nà dèŋsɨ̀ jêl ndù a nto'.

Ghɨ ba'tɨ no mɨ ghà, ntum fòyn ɨ fètɨ̀ na ɨlvɨ kfêyn meyn. No mɨ wayn wi ɨ̀ kfà ɨ fvɨ̀ gvî fètɨ àzɨyn a tal.

À jof mɨ àtu a nda, a no mɨ ghà mæ kɨ̀ layn. Mɨ̀tì wù faŋ tɨ̀ keli, a wayn wi ɨ̀lvɨ̀ fvɨ gvi boŋ bè.

Wâyn wi asɨ fvɨ̀ gvì ɨ bê na, "À n-ghɨ Modu, kesa Mommodu, kesa Mattaa?"

Wâyn fòyn bê na, "Ngaŋ, à n-ghɨ wi tî a jèmtɨ̀. Wà bû keli."

Wâyn wi ànkùmtɨ̀ fvɨ̀ gvì ɨ bê na, "À n-ghɨ Buka, kesa Uma, kesa Usman?"

Wâyn fòyn bê na, "Ngaŋ, à n-ghɨ wi tî a jèmtɨ̀. Wà bû keli."

Wâyn wi ɨ̀lvɨ̀ ɨ fvɨ̀ gvì na tal, ɨ bê na, "À n-ghɨ Ali, kesa Zubay, kesa Abba?"

Wâyn fòyn bê na, "Ngaŋ, à n-ghɨ wi tî a jèmtɨ̀. Wà bû keli."

Iwo nâ yèyni ɨ fi ndù kfêynsɨ sɨ-a mɨchi, mɨ̀tì nô wul ɨ yɨ wi. Ntum fòyn ɨ fi jàŋ na ghɨ kfeynsɨ meyn mɨchi.

Wâyn wi ɨ̀lvɨ̀ læ na ghɨ ma à tùtɨ̀ kɨ̀ nà ŋweyn na wù boŋ ndù àfu. Wù se sɨ ndù na ŋweyn ɨ bê na wù ndù kɨ̀ nyà'à -nyà'à.

Wù se sɨ ndù, ɨ yeyn fɨ̀nìni fɨ lifɨ wu du' a dzɨ kɨ ŋweyn nìnyɨŋ. Wayn wi na weynɨ̀ toŋtɨ ŋweyn ɨ bɨf na wù kelɨ nge' a?

Nìni wêyn ɨ bèynsɨ̀ na, "Mɨ n-ghɨ afèyn, chiytɨ̀ na wùl bo atu akema. Woyn ghɨkɨ̀ yì a ghɨ chwò afèyn, le' meyn nô sɨ timi. Àŋena kelɨ wi ɨlvɨ sɨ̂ mà."

Wâyn wi wêyn ɨ kfɨmtɨ nìni na vzɨ̀, ɨ bo atu a ŋweyna. Nìni ɨ bɨf sɨ ŋweyn na, "Wayn wom, wà n-ndù wo?"

Wu bèynsɨ̀ na, "Nô wùl kya wi izɨyn i wâyn nto', à n- kya kɨ bò ŋweyn, mɨ̀tì ma à fètɨ̀ nô mi ndà izɨyn i ŋweyni a wù nà ghɨ wî ŋweyn."

Nìni nâ vzɨ̀ ɨ bè na, "Izɨyn i wâyn nto' nɨn ghɨ Tatasko."

Wâyn wi nâ wêyn ɨ̀ fu ayonɨ̀ sɨ̂ nìni nâ vzɨ̀, ɨ lù nà ndù ale' iwo nâ ghàyn. A nâ sɨ̀ ghɨ teyn ta wù gvì chem, wu chɨl gvɨ̀tɨ̀ ta wù yeyn inoyn i ghel i dvɨ kɨ teyn. Wu nà sɨ wumi- à, nà kɨŋ wi sɨ fvɨ̀tɨ̀ sɨ ndù asɨ.

Wu kasi kfà'tɨ̀ na, "A n-ghɨ kɨ ɨlvɨ wêyn imo sɨ̂ mà." Wu fvɨ ndù asɨ.

Woyn ghɨki ghɨli nà sɨ chye' ŋweyn, mɨ̀tì wâyn nto' ɨ bè na ghɨ visi wù boŋ fvɨ̀ gvì be yi ŋweyni.

Wu fvɨ̀ gvì ɨ zɨ̀tɨ̀ na, "À n-ghɨ Ibrahim, kesa Kassim, kesa Kagu?" Wâyn fòyn bê na, "Ngaŋ, à n-ghɨ wi tî a jèmtɨ̀. Wà bû keli." Wu bê na, "Mɨ n-kya mɨ̀tì fàyn gha' sɨ toŋtɨ."

Wâyn nto' ɨ tùtɨ̀ kɨ na wù be. Wu fi bè na, "À n-ghɨ Tatosko?" Wâyn nto' ɨ byal na wù keli meyn.

Ghelɨ læ lù gvi ɨlwè' wu ba'sɨ-a, ɨlvɨ ɨ dyèblɨ̀-à kɨ̀sɨ yɨ achi a malà nɨ̀ àŋena. Tèyn ichi àŋena nà jôf kɨ tèyn.

You are free to download, copy, translate or adapt this story and use the illustrations as long as you attribute in the following way:

Ɨ wâyn nto' wu kelɨ wi izɨyn

Author - Kaka Gana Abba
Translation - Yoh Edelquin Nabi
Illustration - Awwalu Sakiwa
Language - Kom
Level - Read aloud