Document

Duma nɨn bê na yi na sû ɨ̀wu ɨ̀ vzɨ̀

Nathi Ngubane

Iyeynì nɨ ndû sɨ woyn ghɨ̀ jɨ̀m, a tɨla' tɨ̀ jɨ̀m a Aflikà.

Izɨyn ì yemi nɨn ghɨ Duma. Mɨ n-kelɨ bèŋsɨ̀ ivɨm.

Mɨ̀ n-chi ghès ɨ̀ jêmtɨ̀ yem ɨ̀ Zinle. Wù n-ghɨ bèngsɨ̀ njvàsɨ̀ tal.

Ghès nɨn chî ghèsɨ̀ nà wom, nɨ̀ bò wom, nɨ̀ wayna wès ɨ̀ twelâ Wandile , nɨ̀ bɨ ghes Bubesi.

Sɨ ɨtu' a kòlonà gvì, ichi ɨ̀ ghesi ti meyn kfɨ̀nɨ.

A n-ghɨ kɨ fɨ fôlɨ̀ teyn mɨ̀tɨ̀i ma fɨ kà' a fɨ nî na ghèsɨ̀nà na ko'i nô sɨ a ŋaŋ. No mɨ̀ ndà kà' a wù fe iko'i bòm kòlonà.

Mɨ n-kumî wuyn bòm ta mà kà' a mà bu na dɨm ghèsɨ̀ sùyn semsɨ.

Wandile nɨn nsàŋlɨ wì bòm ta wù kà' wù bu ba'nɨ sùynsɨ ŋweynsɨ.

Zinle nɨn kumi kɨmɨ wuyn bòm ta wù kà' wù bù fì gwòtɨ̀ àmbàŋsɨ̀ ɨ̀chfɨ̀ nɨ̀ ŋweyn ŋêyn suynsɨ ŋweynsɨ.

Nà wàyn nɨn sû ɨ̀lwe' a ndô àfɨ̀ a ghèsa ntè'. Bàba bêy'lɨ mɨ̀tam nɨ̀ mbàysɨ̀ a ntè'.

No mɨ nɨ̀ bɨ̀sì-bɨ̀sì achi à kà, àŋena nɨn fvɨ se' alè' a felɨna, a Zinle nà kɨ̀nî ghès.

Wul ntè' nɨ̀ ghès ɨ̀lvɨ̀, izɨyn i ŋweyni ghɨ Gogo, wù n-ghɨ ma wu lema meyn fi kelɨ iko'I atem.

Ghɨ n-visi wì na nô wul ndù bà'sɨ̀ a ŋweyna ngùŋ lvɨyn. Kòlonà yèyn nɨn bem chwòsɨ̀ sɨ̂ ghɨ̀ lema.

Ghès nɨn kôŋ wì na wù na ko'i-a.

Ɨlvɨ ɨ̀kfanɨ, nàwayn ɨ̀ ndù sɨ yeyn nâ Gogo yìsi ti-a, wù fu mɨ̀tam ɨ̀n yvɨ̀ sɨ̂ ŋweyn.

Nàwom nɨn ndû lêm mitam màteyn kɨ ɨchfɨ ndo bòm ta wù kà' wù bu zɨ a ndo.

No mɨ nɨ̀ bɨ̀sì-bɨ̀sì achi àkà, Zinle n-ndù tu mu a bôm sìsɨ̀ ta sɨ n-ba'sɨ.

Ghelɨ ghɨli nɨn chɨ̂ytɨ achfɨ̀ àŋena nɨ̀ ɨ̀byàsɨ̀ ndzɨsɨ, ghɨli chɨ̂ytɨ wì. Zinle ti meyn fàytɨ ànkul ɨchfɨ̀ nɨ̀ ŋweyn nɨ̀ ndzɨsɨ ŋweynsɨ.

Wù n-sû ɨ̀wu ɨ̀ ŋweyn a ndo, nàwom wêtɨ àfo a ŋweyn awu sɨ laynsɨ.

Nɨ̀ ntu' no mɨ achi àkà, nàwom ɨ̀ bètɨ̀ sɨ̀ ghès na:

"Wà tuŋ ànkul ɨchfɨ̀ nɨ̀ và afi-a mɨchi ɨ̀n jɨ̀m. Wà sù ɨ̀wu ɨ̀ và nɨ̀ àsù-à sa mɨntɨ̀mlɨ 20 ɨlvɨ ta wa ndu no mɨ awo. Wa chɨ̂ytɨ ɨ̀chfɨ̀ ɨ̀ va ɨlvɨ ta wa n-kesi kèsa ichem."

Ghèsɨ bê na, "Ghèsɨ̀ yvɨ meyn a nà."

1. Wa sù ɨ̀wu ɨ̀ va nɨ̀ mû.
2. Wa sù ɨ̀wu ɨ̀ va nɨ̀ asù-a.
3. Wa sù silæ silæ sa mɨntɨ̀mlɨ 20, kèsa wà na taŋtɨ̀-à sɨ
zɨ̀tɨ̀ a 1 sɨ̀ chem a 20.
4. Wa chù'ti iwu ɨ̀ va nɨ̀ mû.
5. Wa yes ɨ̀wu ɨ̀ va nɨ̀ àbas a ndzɨsɨ a yumina.
6. Lvɨ̂yn, ɨwu ɨ̀ va nɨ̀n ghɨ nɨ̀ ìlayni!

You are free to download, copy, translate or adapt this story and use the illustrations as long as you attribute in the following way:

Duma nɨn bê na yi na sû ɨ̀wu ɨ̀ vzɨ̀

Author - Nathi Ngubane
Translation - Yoh Edelquin Nabi
Illustration - Nathi Ngubane
Language - Kom
Level - Longer paragraphs

© Nathi Ngubane, Azad Essa, Social Bandit Media, African Storybook Initiative 2020
Creative Commons: Attribution 4.0
Source www.africanstorybook.org
Original source https://sacoronavirus.co.za