Document

Iye'i i bò wàyn

Abraham Bereket

Adonay Gebru

À n-læ nà ghɨ à ntè' ìlvɨ̀, wayndà ɨ̀lumnɨ̀ ɨ̀lvɨ̀ nà ghɨ, izɨyn i ŋweyni ghɨ Abula.

Wù n-læ nà kôŋ wì sɨ nà jàŋà kèsa sɨ yàsì ŋwà'lɨ̀ ŋweyn. Wù n-læ nà yoli-à a ndô ŋwà'lɨ̀, fi kelɨ chɨ̂nɨ̀ ìbɨ.

Abula n-læ choŋ ɨkwo nà ŋweyn sɨ yuyn mɨfolɨ ɨ̀n tofɨnɨ ateyn. Nô mɨ ta nà ŋweyn nà leytɨ̀ ɨ̀kwo ɨ ŋweyn, a wù kɨ̀ŋ yeyn ɨ̀ lì.

À nì nà sɨ ghɨ tèyn ta wù yɨ mìsì ɨfwo ɨ tofɨnɨ nâ vzɨ̀, a Abula na sɨ dɨm ŋweyn suynsɨ ŋweynsɨ

Ghɨ chɨ̀tɨ kɨ̀ têyn, Abula fvɨ̀ sɨ-a ndô ŋwà'lɨ̀. Wù n-læ faŋ nà sɨ dɨm kɨ achi a fɨblà ŋweyn suynsɨ ŋweynsɨ, wù nì kfa a ndo kɨ̀ aleŋ a likfa.

Nà Abula ɨ yeyn keli iwo nâ yèynì yi nà fu nge' sɨ ŋweyn.

"Wayn ɨlumnɨ̀ nɨ̀ ghès nɨn chî wì a dzɨ̀ ìjùn. Mɨ̀ n-yeyn na wù bu fi se' wi a ndô ŋwà'lɨ̀. Wù fi choŋ kɨmɨ ɨkwo wom," iyeyn ɨ bè nà Abula sɨ lum ŋweyn.

"Wu bê si wî ŋweyn na 'wà n-læ̂ se sɨ lèytɨ̀ sɨ̀ kfèynsɨ ɨkwo ɨ̀ va, wa lèyt ɨ̀ àntêynɨ̀ tɨfɨtɨ ŋwà'lɨ̀. Wù n-lum bu yaytɨ̀ wì ŋwà'lɨ̀ ŋweyn, tèyn a ɨ̀kwo nâ vzɨ̀ na ghɨ kɨ nô ale' a juŋ-à."

Ɨtu' ɨ layn kfeynsɨ̀, Abula nà sɨ kɨŋ ɨkwo ɨ nà ŋweyn. Wù n-læ kɨŋ kɨ̀ ɨlwe' ɨ̀jɨ̀m mɨtɨ̀ faŋ tɨ̀ yeyn ɨ̀kwo ateyn.

Tèyn wu kfà'tɨ̀ na yì kà' a yì ndu ɨwe vzɨ̀ a wu nà ba'sɨ.

Bò ŋweyn ɨ yeyn ale' kì, a wù nà ndu ateyn.

"Wayn wom, mɨ̀ n-kya ìwo zɨ̀ a wà n-ndu ɨ̀we bòm ìnyeyni. Lvɨ̀yn, kasi ndu ki ɨkwo ateyn a wa àntêynɨ̀ ŋwà'lɨ̀," bò ŋweyn ɨ̀ kæ bè.

Abula nà ghɨ nɨ̀ ìkani, mɨ̀tɨ̀ ɨ̀ ndù ɨ̀ kɨŋ a ŋweyna ŋwà'lɨ̀sɨ̀.

Ɨ yeyn ɨkwo ateyn ta nà ŋweyn n-læ ley'tɨ̀ àfu.

Ɨtu' ɨ layn kfêynsɨ, wu fi ndù sɨ̀ kɨŋ àntêynɨ̀ ŋwà'lɨ̀sɨ̀. Mɨ̀tɨ̀ afo ghɨ wi ta ghɨ̀ ley'tɨ̀ ateyn.

Wu ndù sɨ bɨf sɨ bò ŋweyn na bòm ghà ta ghɨ bu fi lêm ɨkwo àntêynɨ̀ ŋwà'lɨ̀sɨ̀ -a.

Bò ŋweyn ɨ bèynsɨ̀ na, "Wayn wom, wà kɨ̀ŋ sɨ̀ keli ɨ̀kwo sɨ̀ yuyn mɨ̀fôlɨ̀ ɨ̀n tofɨ̀nɨ̀ no sɨ̀ dvɨ̀-à?"

Abula ɨ bèynsɨ̀ na, "Samo' a bà."

Bò ŋweyn ɨ bè na, "Yvɨtɨ iwo zɨ̀ a ka mà bê. Wa jaŋ ŋwà'lɨ̀ syasɨ fì ndù a ndô ŋwà'lɨ̀. Wà læ̀ yeyn ɨ̀mwa'tɨ àntêynɨ̀ ŋwà'lɨ̀. Ka wa n-kàsi ìbàm."

"Mɨ̀tì, Bà, ijaŋi nɨn nto chwôsɨ-à. ijaŋi ŋwalɨ̀sɨ̀ nɨn boli-à!" Abula ɨ bèynsɨ̀ bè.

Sɨ̀ a fɨ ntɨ̀mlɨ̀ fɨ̀lvɨ̀ tèyn, bò Abula ɨ chìmi moŋ. Wu kfàtɨ̀ na yì kà' a yì tutɨ ti-a wâyn ŋweyna.

Ɨ kæ bè sɨ̀ Abula na, "Ghèsɨ̀và na jàŋ kɨ̀ a mo. Mɨ n-gàmtɨ̀ và sɨ keli igha' toynɨ̀ a ŋwà'lɨ̀."

You are free to download, copy, translate or adapt this story and use the illustrations as long as you attribute in the following way:

Iye'i i bò wàyn

Author - Abraham Bereket, Hardido Temesgen, Yohannes Firew
Translation - Yoh Edelquin Nabi
Illustration - Adonay Gebru
Language - Kom
Level - First paragraphs