Itoŋoi aduri iko hahanyi hosi, Orônyô, ihiloŋoni. Amunoi nyia aduri hûnîa nyio omunotie isi êyêbîta hahanyi hosi.

Itterio Orônyô êyaba jio, "Tô ninyia berien." Ettê îdûarû lioo...attatî îmî omomite aduri hûna hunna afaŋî ꞌdaŋ buo fê awahî îtayîrûna êyaba nyia.

Adulo Orônyô êyaba honyi nyia, "Ihoruoŋ adoŋiok iko adiali hûa, Owon nyia ôbô namiji anna anya Torit. Afuonni nyia ômûk latî tô harî tôgôl îmanya Torit. Arrosoni nyia latî hulia êgîama jio monyomiji Torit asahien arriaî buo ôdûmaî monyomiji hulia anyahuo kaî.

Iyattaî nyia latî hulia nêrrê ꞌdaŋ hunyia îgîamanî monyomiji jihosi aharî-tôgôl. Buo êttê itinyiaŋio idehini isi Torit ta anyahuo arriaî.

Tô ôbô nôlôŋ, êttê monyomiji Torit iwwaha. Iwwahuni nyia isi ꞌdaŋ jio aremik ettigemio aatî hulia isi. Ihuania, êwak isi ihoruna afaû hosi jio aatî hulia. Iŋîŋaî nyia isi jio ehoru ꞌtadî afaû anîa aŋaî? Omîjanî nyia isi jio ômîjanî monyomiji arrêm, buo fê ahucoli hosi agalîhînî bêbê.

Olûajî nyia ôfîôrô hunne îŋîŋaûnî isi arriaî, atî ôbôlô duo bu ewwaha hosi nyia hobeŋi nyia isi ôttûbanî êkîana hosi arabotie. Hinya awahî isi iyyuhoronia ewwaha nyia, adîôtô ôbô anyar-haluti êttê ijiaran, "Egigilo nî amîjak nî êkôî êram anîa."

Awahî nyia isi ꞌdaŋ îtayîrûna, êttê isi îfî, "Iramak jihôhôî!" Attatî anyar-haluti alîa itterio êkîana, "Iramak nyia hohonyi hoŋ jihôhôî jio owon nyia ôbô latulo alla amanya ꞌtô itua mur. Afure honyi Hacûr. Idûlatio nyia atulo lîa ôbô nayyani buo aŋêr ayyani nyai anyaî ahouno-hûattêk. Isiarak aŋerio anîa agôlôn îgîamarî êrrê ꞌdaŋ. Hottina attittifiarû nî Hacûr."

Adûahinie nyia monyomiji jio sîk buo fê obeŋi ômîjanî êtarraŋak adî isi êram anîa aŋaî. Abeŋ ôbô atulo owon iko ôfîôrô hunno oyiji agalînî huno anyar-haluti alîa, attatî isi ꞌdaŋ ijiaran, "Ilo ottittifiarû Hacûr many îrûmak iyye inyi."

Attittifiarû anyar-haluti alîa Hacûr. Hinya allaŋî oŋitek miyet, arûmak anyar-haluti alîa aaji Hacûr. Omuno nyia inyi bêbê. Arûmak nyia buo fê inyi Hacûr diyya êttê Hacûr îfî inyi jio, "Iwak iyye anyio?"

Itarraŋak anyar-haluti alîa jio, "Awak nî ahouna-hûattêk." Hinyia îramak inyi, îllîllîha nyia Hacûr bêbê êttê iko ꞌdaŋ îdalûna oŋite. Abeŋ nyia tulo inyiak ittuna jihonyi îmôjôrî ahouna-hûattêk.

Ikîanaî nyia isi êram anîa fuur. Iruk Hacûr esiarana anyar-haluti alîa ahouna-hûattêk. Attatî ijiaran, "Ihûma atî îtayîrio, êllê înya iyye aŋerio anîa ôllô isiarana iyye ôfîôrô hunno ofuoi ꞌtô iluak monyomiji ahouna-hûattêk iko abuanya faû. Iyye baka ilo îsôhîna eyyahanî watî Torit. Eyyahatie aatî tê êlîk tua."

Isiarak aŋerio nyia jio anyar-haluti lîa êttê inyiak ijiaran, "Ihana nêrrê ihuo ajio nî ôŋîda afaû hôî ilobia. Ihuania, ilo, atî hêramak ôbô atulo awon nî ajia."

Acaharû anyar-haluti alîa Torit. Ihuo hinyia ojiattarî Hacûr, îtîlaŋarî nyia monyomiji atêrôjôk hia to miji hosi êttê iko ꞌdaŋ ihoruna afaû hosi jihosi. Attatî monyomiji iyyom.

Obôlô nyia namuno iko ahîa. Itahuyei nyia isi êŋêrê anyar-haluti alîa. Ilôfîôrô nyia anyar-haluti lîa bêbê buo fê îbûŋatio aatî ônnô oyyu. Iyyahatio nyia inyi miji ta abijon tua buo fê igigilo tê isi alla awak îhan ômûk êrrê.

Ajio Orônyô, "Ŋarriok-ŋarriok hoŋ, ofuonni aŋêr houna-hûattêk jihôhôî ꞌdaŋ ababô tô oŋitek hosi. Oŋîda îgîamarî isi tô ôfîôrô hunno oyyiji ꞌtô. Iyiu jio obeŋi êrrê hunne îgêm amad iyye hama, ôlô îmad miji ꞌdaŋ."

Amunoi nyia aduri hûnîa êttê ijiŋara itua haji. Buo Oronyo êttê îrasa etoŋ ihiloŋoni, buo idorok ajiŋara aduri hûnîa itua haji. Iyihi nyia inyi jio ôlô êyaba anîa îtagôl isi îsôhîniere awatî hunno oyyiji ꞌtô buo fê ôsônî aheyyak moi.