Tô ninyia berien, imiji Imêhêjêk, amanya nyia ôbô anyar-haluti iko mônyê buo hônyê.

Anyalam nyia anyar-haluti alîa bêbê jio hônyê, mônyê iko miji ꞌdaŋ.

Anya nyia afure eto alîa Ohîma Anaŋa.

Obolorita êgîama tê Itabotie imiji tê êdûha duri ifuarrî isukul, nyio îjîfak ôlôŋ alîa eyyom Itîllêjî iko Dominika.

Tô ôbô ôlôŋ, hinyia alô inyi isukul, aruaŋanie Ohîma iko ôbô leto alla anya Omîjîlûk. Iyîyîbaraî nyia isi tê êkôî êttê isi iko ꞌdaŋ îrrîahino.

Aŋalafatie Omîjîlûk iko aatî ga-ga-ga, îtafôyôŋio hullo ômûk, buo fê obeŋ adahatio isukul. Osô nyia inyi atulo abalanî-gûmar ôllô ôrrôhô ꞌtô buo fê ôrrîaha iko aatî hullo obeŋi ꞌtô oyiji. Kai-kai, îtadihok ômîjîlûk Ohîma.

Obeŋ nyia Ohîma awak jio ijiara ôrrîahat Omîjîlûk ojiori jio arrôhôja inyi ta abîaŋan honyi wahan êmanyît hosi anîa. Ettê îfôyôŋô ônnô ôrrôhô bêbê ihuo Omîjîlûk.

Arraŋanio Ohîma êtafôyôŋio watî, buo fê êttê îbîaŋan îwahan êkîana jio mônyê, hônyê, iko jio miji ꞌdaŋ ta anyalamî.

Arûmatio Ohîma, buo fê êttê idehina ahûan ꞌdaŋ ênnê îbôt.

Abeŋ nyia Ohîma inyiak îmanya ta ahîahîara, êttê înêfûna amêjêl. Aŋîrîm nyia ahûan Ohîma bêbê êttê Omîjîlûk iko ꞌdaŋ îttaddûhio inyi ta aŋîrîmî honyi nyia, êttê iko ꞌdaŋ îhara arrîaha iko Ohîma.

Attanaî nyia mônyê iko hônyê jio ijiara ôhîma ôlô îttalîa ôŋîda batî ofuoi isiarana inyi ayyaniꞌ teyya. Hinyia atuk Ohîma idil ayyaniꞌ hûa, êttê iyyak.

Igigilo Ohîma amanya honyi. Attatî iyiuna jio arrîaha nyiadî inyi iko amîôttônoni.

Ettê itterio adahatio isukul, attatî buo fê iliehina ononyi êkîana jio ettiyanak honyi iko jio mônyê iko hônyê.

Aŋari nyia atua Omîjîlûk amanya Ohîma anna ayyu ꞌtô anîa. Atî, anyahînî nyia buo fê inyi ariri ta amanya Ohîma anna ayyu ꞌtô anîa.

Attatî buo Omîjîlûk buo fê iloit ononyi amanya attulo ôllô oyyu ꞌtô bêbê.