Eyaba ana ônô êyahanî iko elele honyi ônô ahohio ciaŋi.

Obôlô nyia êgîama elele îyafa on ômômô jio eyyahanî alîa iko aluak honyi.

Iyaŋunie nyia Fagîla ahosiere buo inyi hara êêŋa abotie.

Iyaŋunie inyi ta attoromile ênnê imaruak ꞌtô buo ôsô ôbô êgara.

Owon nyia amehino eyyahanî alîa iko aluak honyi jio Fagîla.

Ijîrîŋa nyia Fagîla buo fê îhany.

Jio oŋitek ômûk kaî, agôl nyia ahûan Fagîla.

Ettê inyi itterio êsahutta iko aŋarriok ciaŋi hunno ômûk ilele diyya.

Jio ôbô nôlôŋ îyafa ônô Ofîllîma, îmôk ôgûgûrû ilele eyyahanî alîa.

Arracarî eyyahanî alîa iko aluak honyi jio ôgûgûrû nyia.

Owon nyia aŋarri tômê ênnê imuhoni ta abattania itua ôgûgûrû diyya.

Ottille nyia lîa. Hôsôhînî nyia oŋitek honyi miyet.

Itamacio eyyahani alîa Ittagô alei te ekurok.

Iyaŋunie nyia buo fê Imoi, ahohi êtahunihi, îyafa Ofîllîma.

Iyaŋunie inyi ilele diyya ta attarattara anna ariet. Araî nyia ayafajin honyi îllê.

Gaa diyya, arrîahaî Imoi iko Aŋanya, aŋarri hasuani.

Adahaî nyia isi amasik ꞌdaŋ arabotie.

Tô ôbô attarî, ahênyûnî aatî ꞌdaŋ ta afanyan Iŋara.

Araî nyia ayafajin Iŋara miyet.

Aniemuno nyia Iŋara ta alamaji miji ninyia îyaŋunierek inyi.

Ta ahodori Iŋara, adak nyia eyyahanî alîa îhîdê ꞌyani ittoŋiere ekurok êtamatî lei.

Iyaŋunie nyia atturot Oddîr iko Iddîr ihiji yafa Ofîllîma.

Hôsôhînî nyia asahien hosi araki many hesiuni isi. Oŋuaî nyia isi bêbê.

Obeŋi nyia aatî ꞌdaŋ omunoi hinya ayê Oddîr.

Imînî, Orrum, Haworu nyia araî ecuŋita hohio hunyia eyaŋunie îyafa ônô Ofîllîma.

Osôhînî nyia isi êsabîtî arrîhaî many hesiuni isi. Hinya afanyî isi, oniamaî nyia bêbê.

Omuno nyia eyyahanî alîa iko aluak honyi aciaŋi hûnîa, iko hunno îkûarraŋaî ꞌtô ꞌdaŋ.

Onyêŋûl nyia îkûarraŋa jihosi ꞌdaŋ.

Idîmatta nyia inyi amanarat eyyahanî alîa.

Igiamaî nyia êgîamak elele anîa bêbê iyyahatiere aŋarriok ciaŋi hûnîa.

Iyihini nyia isi jio moi diyya ofuonni addî ahohio ciaŋi hûnîa îmanya itua mur ta ahûêttêk hosi hama.

Osôhînî aŋasi/oŋitek iko êlûlûŋ aciaŋi hûnîa baya? Ihîana êyaba anîa inyia, êttê iyye îtarraŋana êfîîta hûna.

1. Iyafa ônô ôfîllîma, baya aciaŋi hunna afanyî ꞌtô ilele?
2. Ananî êttêrî ciaŋ ênnê îyaŋunei îyaffa ônnô Ofîllîma?
3. Araî aŋasi/oŋitek êttêrî ciaŋ anîa baya?
4. Ananî ecuŋi/ ciaŋ (ŋi) hinyia îyaŋunei?
5. Hunanî ciaŋi hunyia ômutarî aŋasi