Tamen or ugen lu, iti na er Hogos. Lu a mbayev utar.

Hogos soo er mbayev nav ve lu a inyaregh zum u una kpe kela yô. A ver ve mbaakwati utar.

Hogos za hen orwandor a na Haile.

A kaa a na er, "M soo mer mbayev av ve lu a inyaregh. M ver mbaakwati utar sha ci ve. M soo mer na ve zum u me kpe kela yô."

Zum u Hogos kpe kela yô, Haile yila mbayev nav.

A kaa a ve er, "Ter wen yange nam mbaakwati utar sha ci wen. Hanmô wen nana tôô u iti i nan i lu sha min la."

Mbayev mbela tôô mbaakwati mbela man bugh ve.

U hii hii la zua a zanaria keregh. U sha uhar la lu a inya keregh. U sha utar lu a ambi a uile keregh.

Wan u zua a zanaria la ember kpishi. Mba uhar mbela saan ishigh sha ga.

Ve hii u eren ayôôsu vea na.

Haile kaa a ve er, "Ne mba aningbianev, de zehe nen zwa ga. De me za a ven hen gyanden or u fankwagh u gen a wa ne kwagh."

Haile za a angbianev mba utar mbela hen gyanden orfankwagh ugenegh.

Haile sugh igyanden or la, "U nder vee? Se va u va keren kwaghwan hen a we sha kwagh u dyako."

Haile pase igyanden orfankwagh ne kwagh u akwati mba dyako mba utar mba Hogos ver sha ci u mbayev nav la.

"Hegen yô mba zôhôn zwa vea u a tee zanaria la," Haile kaa un nahan.

Orfankwagh la kaa er, "Ter wen yange lu a ityôkyaa i veren hanmô wen akwati u a ver ne yô."

A za hemen er, "We u u ngohol zanaria la, tereu soo er we u lu or u eren kasua. We u u ngohol inya la, tereu soo er u lu orsule."

"We u u ngohol ambi a uile la, tereu soo er u lu orkuran ilev. Yange soo er hanmô wen nana lu a tomaveegh u nan," a mase kulen kwagh la.

Ve ungwa kwaghwan ne shi ve lumun amin.

Hanmô ve kôr tomaveegh u nan dôông nahan ve cii ve lu saan saan man ken mkpeiyol.