Chalew ka nyinya u ulugh kyekye.

Ka a tôô ikyav mbi yuhwan sha igbudu mba Debre Birhan.

Ka a er tom hii pepe zanzan aikie.

Chalew zough a shien u memen kuman un ga.

Zough a kwaghyan ka kom un ga.

Or hendan ikyekye ka a shi gbidyen un er a yevese fefa.

Iyange i gen yô, mba hendan anyinya a ulugh akeke zua u tsan ku.

Anyinya a ulugh akeke zua a ian i yan gwer gwer nongo hen jiir imôm.

Ve hii u timen sha atsan a ve.

"Mo shidi wam la nyôrom ga. Ka atsulem gbang a tôndom avav iyol," nyinya ugen kaa nahan.

"Mo kpa sha zwa la," ugen tsôrough.

Tse nyinya ugen kaa er, "M ngu nôngun u kpen nguhar sha ukusa mba manden mo shin apande a ngahar."

Anyinya kpishi kpegher sha tyo.

"Ka se er tom taveraa kpa ior asev ve nzughur a vese. Ve kpishi ve fa u nengen sha vese ga," Chalew kaa nahan.

Anyinya cii rumun.

Chalew yôô er, "Se soo mkpeiyol. Se gba nen num !" Anyinya cii ger!

Ve rumun u zan maape môm ga er saa mbahendan ve rumun u geman anza.

Mbahendan akeke fa kwagh u vea er ga.

Môm ken mbera ta ihiagh er, "Me faityô u yamen nyinya u genegh."

Kpa mbagenev ken a ve soo anyinya ve u zan hemen a ityom ve.

Mbahendan akeke mbela zua mtem sha u tôvon sha num gban u anyinya la. Ve nyiman kwagh shie gôgônan.

"Kam er anyinya ne nga a ishô nahan," or ugen ôr nahan. "Ityôkyaa i ve soo mkpeiyol yô ka nyi jimi?" u gen pine ve her.

Num gban u anyinya ne samber hii hen gar u Debre Birhan tser tar u Itiopia.

Anyinya kuma milien utar cii venda u eren tom.

"Kuma se nahan! Er nen a vese sha inja," ve kaa nahan.

Gande mba hendan akeke tsô ve gema anza.

Ve rumun er a eren a anyinya cii sha inja shi a na ve mkpeiyol kpaa.

Ve hii u wan ve ikyo shi eren ve twer kpaa.

Kule kule tsô anyinya hingir u zuan a mkpeiyol.

Ve zua a kwaghyan man m-mem u kuman ve. Shidi kpaa nyôr ve vough. Akôv a shin apande a ve kpaa lu guda.

Orvesen Chalew hingir icuwan nyinya hen a ve.