Keke a palama mo swinking ya gagwe. O ne a rata swinki ya gagwe. E ne e le swinki e di phalang tsotlhe

O ne a ikgorometsa ka bonya. Go ya pele le morago fela jalo . Fa a ntse a ikgarametsa, swinki ya gagwe ya tsamaya ka bonako thata. Go ise go ye kae ke fa a le ko mankalekaleng.

Keke a leba fa fatshe. O ne a le ko mankalekaleng. "Heelang" a goeletsa. "Bona gore ke ko mankalekaleng jang"

O ne a itumeletse go bo a le ko mankalekaleng. O ne a kgona go bona motse otlhe. O ne a tloga a kgoma dinonyane tse di fofang mo masimong.

Morago ga lebakanyana keke a batla go fologa. Swinki e ne e gana go ema. "Ijoo, Ijoo, Ijoo," a goeletsa. "Ga ke itse gore nka emisa jang swinki e!"

Swinki ya ya hela jalo ka mokgwa o le mongwe. Godimo le tlase, godimo le tlase. Keke o ne a tshogile. "Swinki e e nkisa kae? ke ka nna ka fofela ngweding. Ke tshwanetse ka fologa!" a lela.

Keke a tlogela dithapo tsa swinki. A wela ko tlase, tlase, tlase.

"ijoo, Ijoo, Ijoo!" ga goeletsa bananyana ba bangwe. Keke a wela fatshe. A golafala mo tlhogong. "Iiiii, Iiiii, Iiiii,"a lela.

Bananyana ba banngwe ba ne ba tshwenyegile thata. Keke o ne a sa itse o ka reng. "Iiii, Iiii, Iiiii,"a lela

Bananyana ba bitsa morutabana wa bone. "Mma Mpho, ka tsweetswee tlaya kwano!" ba bitsa. "Keke o wele mo swinking. O golafetse mo tlhogong."

Mma Mpho a ragogela kwa swinking. A tsholetsa Keke a bo a mo atla mo tlhogong. Keke a nyenya, "Go botoka jaanong, ga nkitla ke palama swinki e ke le nosi" a bua jalo. "Ga ke sa batla go ya ngweding."

"Nako e tlang ke tla swinka le wena, Keke," ga bua jalo Mma Mpho. "Re tlaa ya ngweding mmogo!"