Tô ôbô, owoni nyia ômûk ôrrîahat arrîhaî. Hattiri iko Anyalam. Ilôfîôrô nyia Hattiri bêbê buo Anyalam obeŋ îlôfîôrô.

Ilôfîôrô nyia buo fê ŋoruo Anyalam. Buo ŋoruo Hattiri obeŋ îlôfîôrô.

Tô ôbô nôlôŋ, îyabaî ôrrîahat hulia, ajio Hattiri jio Anyalam jio, "Ilôfîôrô ŋoruo hôî, buo iyye ibeŋ îlôfîôrô. Obeŋ buo fê ŋoruo hoŋ îlôfîôrô, ara hôlô amanya ŋoruo hoŋ îsîrûna iko iyye."

Ifî Anyalam jio, "Anî iko iyye, ŋaî êllê îlôfîôtô ꞌtô bêbê?" Attatî inyiak ijiaran, "Elôfîôrô nî ꞌdaŋ ihuo iyye."

Attatî Hattiri ijiaran, "Alla ara ihuonyia, efuo atî jio aŋotoni-hîram. Oŋîda anî alô îfî iyye êfî abotie teyya."

Tô hosiere haŋotoni-hîram, îfî Hattiri Anyalam jio, "Araî elelefi tô hîdê idou ômûk ajia? Owon ehiji fau jio ananî maji? Itarraŋak jihoŋ êfîîta hulia, buo êllê ibeŋ iyye îttarraŋak jihoŋ ônnô ôbîs, aii nyio, êttê bu îttôbô aŋoruo hôhôî hûnîa."

Tô ôbô attarî, adak Anyalam îhîdê haji honyi, êttê itterio ehenio ilelefi.

"Nanyio ênnê îhanio iyye?" Ifî ŋoruoi inyi.

Itarraŋak habî jio, "Ifî nanî ôrrîahata hoŋ jio asaî elelefi tô îhîdê idou ômûk ajia, buo fê îfî jio owon ehiji faû jio ananî maji. Inyi ênnê eheniere nî anîa elelefi hûnîa."

"Hêhawwa, alô nî îramana iyye êtarraŋî êfîîta hûnîa," îtarraŋak ŋoruoi. Ettê isiarana jio habî êdêê hîma.

Attatî ijiaran, "Ellê îfî isi iyye jio araî elelefi îhîdê idou ômûk ajia, ijiara jihosi jio araî ihuo êma hutto tua êdêê ana."

Ettê buo fê isiarana habî êtôî, attatî ijiaran, "Ellê îfî isi iyye jio owon ehiji faû jio ananî maji, oruhok êtôî ana îfaû êttê iyye îramana isi jio owon ehiji faû jio amaji ênnê iruhoniere iyye nyia êtôî. Ellê îtarisaî isi, ijiara isi okiemi amaji nyia."

Afany Anyalam ike êsîŋîta ŋoruoi hûnîa ꞌdaŋ ꞌlur ihou.

Jio êfî êttêrî îtarraŋak inyi jio, "Osôhînî elelefi ihuo nêma hutto tua êdêê ana."

Jio êfî êtarrîhî, êttê iruhonia êtôî îfaû, attatî ijiaran, "Owon ehiji faû jio amaji anna aruhoniere nî anîa êtôî."

Illîllîha nyia aŋotoni-hîram bêbê, êttê îfî jio, "ŋaî îramak iyye ôfîôrô hûnîa?" Itarraŋak Anyalam jio, "ŋoruo hoŋ."

Adulo aŋotoni-hîram efiyo, "Ilôfîôrô ŋoruo hôî bêbê, ijiara bu inyi owoni iko Hottiri êllê îlôfîôrô ꞌtô. Ifuatta ôttôbôtî aŋoruo hataî hûnîa." Ettê aŋotoni-hîram îramana isi nôlôŋ ônnô ofuattarîk isi îttôbôrî aŋoruo hosi.

Alô Anyalam îramana ŋoruoi jio, "Attênû nî êtarraŋîta îfîîta hûa ꞌdaŋ, atî ojio aŋotoni-hîram jio îlôfîôrô iyye bêbê, tanîa, ibeŋ iyye îsîrû îwanarî ikoŋ."

Itarraŋak ŋoruoi, "Hêhawwa, owoni buo fê êtabîsîta êram alîa jihoŋ."

Attuba nôlôŋ analattarî aŋotoni-hîram îtattobiere aŋoruo hûnîa. Anîa, attatî ŋoruo Anyalam isiarana aŋotoni-hîram esiori anna ara ꞌtô ahifuoi.

Hinyia aŋa aŋotoni-hîram efuoi nyia, êttê igonyuna ahôhôrô ônnô ômûdî iko oofir ꞌdaŋ! Ettê iŋuŋunihina jio, "ꞌAttattattatt, egonyu atî buo nî lûŋa, ôsîrû aŋôttê ana hôdê jio habî ôllô obeŋ ꞌtô alîa îlôfîôrô!"