Ottu hahanyi hoŋ îfûanyarû hôhôî.

Iyaŋûttatio inyi aful jio Ocôŋôddôk iko aŋahî, buo fê tô ômûk oŋitek îyaŋûttatio oserri iko abattiak.

Oyyu esiori anna ara ꞌtô abuk, ôlô ꞌtadî hahanyi hoŋ îmîjana îhîana? Alla alô Ocôŋôddôk îdûkanî, ôlô ꞌtadî îrûmana ôbô esiori ônnô oyyu ꞌtô diyya?

"Ijiara êhûhûmak inyi aputti," ajio Ocôŋôddôk. "Aputti anna ara ꞌtô êgara-ôdîl, ônnô ôbôlô buo fê ôgôl."

Idûhû îyaŋ abôŋô ênnê inyiaŋuno inyi tô dûkan. Attatî inyi îfîatana îfaû, êttê îŋôt.

Têttêrî, oŋotu inyi aŋacio arrîhaî hunno alatî ꞌtô buo fê obolori.

Attatî buo iŋotuna aŋacio hunno ômûtarî ꞌtô ôŋîda ofuoi isiarana aputti ewojit honyi.

Abûbûnak Ocôŋôddôk isi iko aŋacio huduo obolori ꞌtô hûa. Inyiak hônyê îdûhûna abôŋô nyia buo Ocôŋôddôk omijio kok-kok.

Aŋotu hônyê aŋacio arrîhaî hunno ofuoi îrîfana tôttô faû hunno ohodori. Ofuoi hûnîa îtagôl aputti bêbê.

Ettê fê Ocôŋôddôk îbûbûnana hûa, buo hônyê inyiak îdûhûna noduo bôŋô.

Aŋotu hônyê îyîhîtî aŋûan hunna alatî buo fê ohodori.

Ofuoi îrîfana arrîhaî îhûhûmûniere îyîhît abotie. Olô anîa îtagôl aputti enyiahita arrîhaî.

Attatî honyoŋ îyaŋuno êrîfît-boŋojin honyi.

Ettê îrîfana aŋacio putti huduo hûa ꞌdaŋ îhûhûmûniere aputti hahanyi hoŋ.

Attatî buo inyi isiarana jio Ocôŋôddôk, hinya osuhotio ꞌtô ŋûyûû, êttê ijiaran, "Hûmô îyaŋ, tê îhûhûmûna hôî aputti hahanyi hoŋ ônnô ôsô ꞌtô îgara-ôdîl!"