A ng'ikaru, awei emoru Olokwango emaisani alokiding ng'aratin a Kwere. Alotooma ng'aidonoreta ng'arei keng etiuna ng'akipi na arapita emoru eteni kwap eyaunito ang'olol. Emanmana ang'olol Temu ekiling'at topedor ng'aratin a Kwere. Arai ng'akipi kech ainakinet ani a ng'atuk, ng'amesekin ka ng'akinei anakwap ka nabo edir lo alomit naratin.

Ajok ibore daang tani na aliworor Matata Ekapolon. Abu tolimok ng'itung'a tochapasi erot akisiakin kidiama emoru tani natorom sodi todokoria alolomu nabo kibelebeleunor loge natorom. Abu emoru Olokwango tongo kotere akinyasuno a epenek keng, nabo atitinyikinit.

Nacha enang'ia esal aukit, adokanarete ng'ide a Matata ka ta lopayakech kidiama emoru abolia. Akerenete wadaang, ebilete ng'akui ka ng'aten, inokete ng'akimia a ng'aboliasinei kech, na emenakinete kesi ekisidi enokete. Na cha a ng'irwa, abu atitiuny a Olokwango todaun. Abu amaisan najokon tong'opia loge. Apotu ng'aidonoreta toditiakut nabo toditiakut kinyesun nabo ereet keng toliwor lorinyok. Esal apotu ng'iitan a ng'akipi tong'opiasi.

Apotu ng'ikwasin ang'olol Temu kidong'o ing'olikina iyalolong'ete. Abu edir a ng'aratin towot kotere amam ng'inya lukooyak lupalem ebolianar nabo amam ninyusuk niperiet. Abu kikar ng'atuk, ng'akinei ka ng'amesekin noi. Abu itwaan daang toyen esinyoi a emoru Olokwango.

Apotu ng'itung'a a Kwere toyena atamar achamakina ibore idio esubakinio. Apotu toting'as ng'akan nabo kibelosi Matata anapolou. Nados keng apotu tolemut Baraka lo atamari atipei kitak itwaan daang aturot na itamunere Olokwango. Apotu Baraka ka ng'itunga keng kinumnuma nabo yaut ng'ainakinet a epini, ekurichanait ka ekadeli ni a Olokwango.

Amam nabo itwaan alosene moru, na kaneni ayakatar ng'inya alolomu na epoloto towoyeketa nabo. Loge abu amaisan aloreet emoru Olokwango tabalanyany nabo towoyeketa ng'aidonoreta. Anaidonoreta apotu ng'iitan topudut nabo. Abu ang'olol Temu Toyaru. Apotu ng'aratin topuseketa akidwang nikolong a eking'aren. Abu edir nado kichur elakara alonyia. Apotu ng'atuk, ng'akinei ka ng'amesekin tabaras tolalaketa alotelimo a ng'ikito.

"Toyar nikooyen Baraka, toyar nikooyen Baraka, "Toeokis ng'itung'a a Kwere. "Toyar nikooyen, Olokwango," tamasi Baraka ka ng'itung'a keng." Kiinakinete iyong ng'ide kosi ka ng'ide a ng'ide arimatoi ng'ikaru ka ng'ikaru."