Khulwe tsimbaka tsinyinji, eshikulu shia Sang'alo shiema nishimwenya hakari weshikuri shia Nzoia. Tsisebele tsiafutukha nitsikha okhubukana, ne nitsikasia omwalo okhurula khu tsinzafwa echiakukha tsiambeka tsibili tsieshikulu esho. Omwalo Chwele kwekotiombola nikunyololokha nikukhalasia mushikuri shia sanga'lo. Amatsi kako kali eshihanwa khung'ombe, amakondi nende tsimbusi tsiolukongo olo nende kata efichwaya fiamenya mushikuri esho.

Efindu fiali busa efilayi, okhula shinga Eshifuluko yanyoola bwe likuru. Yarusia obukmu mbu injira yikulwe okhurula khushikulu hekulu, okhula hasi mbu kho anyalenje okhunina khushikulu mubwangu, khandi yekha mundalira ubulanyakhana tawe. Eshikulu shia Sang'alo shiasinyikha khulwa okhunyasibwa emimela chiashio, ne nishiisumilisia busa.

Mwijuma, abaana nende abetsa be Shifuluko baninanga hekulu weshikulu okhubaya. Berukhananga buli habundu nibafunaka tsisala nende amasaka, ne nibakalekha nikayia. Inyuma we efise Eshikulu shia Sang'alo shiachonya. Eshimwenyi shiasho shawua. Emiare chiesuba ne ifwani yeshikulu esho nibiiya ne nishilikulukha obubi. Inyuma wa kosi, tsisebele tsiakhama. Tsinguku tsia omwalo kwa chwele tsiatong'a nitsilingane busa neshibeela.

Efichwaya fiauya mushikuri omo okhuba amakale kafiabayilangamo shikaliwo khandi tawe. Nende ubunyasi obutorotoro bwokhulia na okhubayakho. Tsing'ombe, tsimbusi na amakondi fiang'aya ne fing'ayilila. Buli mulala yalola uburuma bwe eshikulu shia Sang'alo.

Abandu ba Sanga'lo balola mbu eshindu shikhoyere okhukholekha. Baliimana ne nibarusiayo we likuru Eshifuluko. Bemekha Ikhabi, ne narusia obukumu mbu buli mulala akhoere okhuraka eshimuli shiokhwitsulira Eshifuluko. Ikhabi nende abandu be bakhola efisashilo, ne nibarerera Eshifuluko efihanwa fie tsisiola, tsindaa nende emilulusia.

Abulawo owaninakho khushikulu khandi. Ne obunyasi nibunyalirwa okhukhula, niburambiya khandi. Kalakala eshimwenyi shieshikulu shia Sang'alo shiabangukha ne nzinzafwa nitsiarukha mukari khandi. Munzafwa etso tsisebele nitsinyalukha khandi. Omwalo kwa Sang'alo kwetsula khandi. Eshikuri esho shiasebukha obunyasi buli hosi okhushirakho lwambeli.   Efichwaya fiasolasola khandi mushikuri imo. Tsing'ombe, tsimbusi, nende amakondi fiebulanira mubunji mufinikha wemisala.

"Omenye obulamu oburambi Ikhabi, omenye obulamu oburambi Ikhabi," abandu ba Sang'alo bemba.   "Omenye obulamu oburambi Eshifuluko," Ikhabi nende abandu bebe nibaboola. "Abaana befu nende abetsukhulu befu bakhuheresie oluyali inziayo."